pausa d'unviern

La sesiun da ballapei digl onn 2022 ei terminada. Nus engraziein a tuts pils buns discuors, las bialas emoziuns ed il sustegn – seigi quei als giugs a casa ni era ordeifer! Tals aspectaturs e fans ein semplamein grondius!

Nus selegrein gia ussa da puspei seveser sil plaz da bal la primavera 2023!

bènaltè! 2022 – 7. ediziun

Ina nova sesiun da ballapei stat avon porta – e sco usitau ils davos onns astga era il «bènaltè!» buca muncar en quei connex. Suenter ina perioda signada dil virus da corona essan nus sefatschentai da rudien cul plascher che quei bellezia sport porta a nus. 

Denter auter havein nus dedicau entginas paginas all'infrastructura dil CB – ed agl idealissem che regeva e che regia aunc adina en caussa. Quels capetels muossan ch'ins astga era haver siemis ed illusiuns el senn da «Dream Big!». 

Plinavon vegnan era persunas arrivadas da nies club purtretadas. Tgisà, forsa vegnis vus gie sissu enzatgei che vus savevas aunc buc da quels tals? 

Era las monduras cotschnas han in plaz special en nossa siatavla ediziun, gest sco ils camps da trenament dallas differentas equipas. À propos equipas: L'equipa dalla giuvnas vegn uonn presentada vastamein. 

En quei senn giavischein nus a vus tuts bien divertiment culla lectura e selegrein sch'igl ei reussiu da svegliar vies interess cun in ni l'auter tema. Ina buna sesiun e sin che quella porti alla glisch novas historias che valan la peina da vegnir screttas el «bènaltè!». ;-)

Il «bènaltè!» 2022 en fuorma da PDF saveis vus telecargar cheu

 

bènaltè! 2021 – 6. ediziun

Punctualmein sill'entschatta dalla nova sesiun da ballapei astgein nus tener enta maun – ni sil admirar en fuorma digitala sin tablets, computers, smartphones etc. – la sisavla ediziun dil «bènaltè!». Questa ediziun sefatschenta oravontut culla collaboraziun dils dus anteriurs rivals – il CB Trun/Rabius e l'US Danis-Tavanasa – e siu futur. 

Secapescha vegnan era nos juniors buca alla cuorta. Igl ei adina stau ina finamira da nossa redacziun d’era porscher als juniors, nies futur, spazi ed ina plattafuorma. Sco usitau vegn era il humor buc alla cuorta. Cun ina rubrica cun leghers maletgs vulein nus contonscher ils lecturs e las lecturas che legian meins bugen e prefereschan comics.

Malgrad che la sesiun 2020/2021 ei stada speciala, eisi era vegniu dau ballapei a Trun. Sil scalem da juniors ha la sesiun saviu vegnir menada atras pli u meins normal. Entginas equipas han era saviu festivar grond success. Per exempel han nos juniors C fatg il pass naven dalla 2. ella 1. classa da fermezia. Quella equipa vegn prida sut la marella in tec pli en detagl.

Nus sperein da saver svegliar vies interess, giavischein a vus bien divertiment culla lectura e selegrein da bunas discussiuns davart il CB Trun/Rabius. Manteni il humor e stei sauns!

Il «bènaltè!» 2021 en fuorma da PDF saveis vus telecargar cheu

 

bènaltè! 2020 – 5. ediziun

Cun grond plascher astgein nus annunziar la tschunavla ediziun da nies magazin cul num «bènaltè!» – in'ediziun speciala che sededichescha uonn oravontut allas persunas che s'engaschan davos las culissas pil club da ballapei Trun/Rabius. Ellas stattan normalmein buc el focus dils schabetgs ell'Arena Pustget – e tuttina ein ellas il cor da nies club, senza las qualas ei dess negin ballapei. 

Co ei nies club baghegiaus si? Tgei s’auda tut tier il complex CB Trun/Rabius? Tgei lavurs vegnan fatgas davos las culissas? Tgi ademplescha quels pensums? Prendi investa da nies cor dil club e smarvigliei tgei che s’auda tut tier nies CB. Deplorablamein havein nus buca saviu dedicar a mintga «luvrer» dil club in agen text. Las paginas da nies magazin ein era limitadas. En quei connex seigi denton gia dedicau a tuts che sustegnan sin ina moda ni l’autra il CB in cordial engraziel, vus saveis sche vus essas manegiai! 

El decuors digl onn ei nossa redacziun carschida e sa garantir aschia per niev slontsch els texts. Ei fa plascher che era nos giuvens giugadurs activs s’engaschan per il «bènaltè!» e portan vinavon el. La redacziun spera ch’ella sappi era crescher e vegnir regiuvinada els proxims onns. 

La sesiun 2019/2020 ha mo giu liug il 2019. Tuttina ei lezza stada interessanta. Nossa emprema ei returnada en 3. ligia cun buns resultats. Ed era la secunda, l’equipa da giuvnas sco era nos juniors han purtau bunas prestaziuns. Il 2020 ei capitau nuot sin basa sportiva. Ei astga denton tuttina vegnir menziunau ch’igl ei era vegniu luvrau cheu davos las culissas ed il temps para dad esser il dretg per in niev act en la historia dil CB … 

Lein uss sperar ensemen che las equipas vegnien da mussar vinavon prestaziuns sco igl atun vargau e quei senza surpresas da virus. Gudi nies magazin e schei semegliar cuort duront spitgar sin il niev campiunadi ed empau normalitad en nies mintgadi. Stei sauns! 

Il «bènaltè!» 2020 en fuorma da PDF saveis vus telecargar cheu

 

bènaltè! 2019 – 4. ediziun

Il «bènaltè!», il magazin che beinenqual adherent da nies club da ballapei spetga vess mintga uost, va ella quarta runda. Sche vus fageis era part da quella categoria lectura/lectur, sch’ei il spitgar sepagaus e vus astgeis finalmein sfegliar ella nova ediziun e leger plein marveglias las novas dil CB Trun/Rabius.

La sesiun 2018/2019 ei secapescha puspei succediu ina massa sil e spel plaz da ballapei – e quei ha la redacziun dil «bènaltè!» naturalmein buca schau passar sperasvi mo aschia. Forsa essas vus era stai perdetga d’in ni l’auter schabetg. Cun totalmein 56 paginas sto la quarta ediziun dil «bènaltè!» en mintga cass buca sezuppar. Aschia sperein nus era uonn da saver svegliar vies interess, giavischein a vus bien divertiment per la lectura e selegrein da bunas discussiuns davart il CB Trun/Rabius. Pertgei leu nua ch’ei vegn discussiunau ei veta – e nies club viva! 

Il «bènaltè!» 2019 en fuorma da PDF saveis vus telecargar cheu

 

bènaltè! 2018 – 3. ediziun

Miez uost ei la tiarza ediziun dil bènaltè! cumparida. Ils habitonts dallas vischnauncas Sumvitg e Trun han astgau prender quel avon paucs dis ord lur scaffa da brevs. Ils ulteriurs interessai san retrer ina ediziun gratuitamein duront ils giugs da casa al kiosc - ni telecargar la versiun digitala. Il link leutier anfleis Vus giudem igl artechel.

«Aller guten Dinge sind drei» senumna ina enconuschenta locuziun. Per talian vegn quella translatada cun «La terza volta è quella buona». Stregn priu («pren striu») ;-) savess quei pia haver num per romontsch «La tiarza ga ei la buna» – denton vala quei era per la tiarza versiun dil «bènaltè!»? La finfinala ha ei num per engles «All good things come in threes». Na – buca tut il bien vegn en plontas («trees»), mobein «tut il bien vegn en treis». Era il franzos va la medema via cun «Toutes les bonnes choses sont trois». En cumbinaziun stuess quei consequentamein pia esser aschia che questa versiun dil «bènaltè!» ei la megliera – denton era la davosa … 

Avon che denton daventar memia filosofics arisguard il futur dil magazin e seprofundir en fantisems linguistics, lein seconcentrar sil present e prender sut la marella la versiun actuala. Cun ina dimensiun da 72 paginas – pia 28 paginas (!) dapli che l’ediziun digl onn vargau – porscha la tiarza ediziun dil «bènaltè!» primo inaga dapli artechels documentai cun ina pluna fotografias e secundo era empau dapli «carn vid igl ies». «La carn» ei tenor meini dalla redacziun stada empau zaia e munglusa ella secunda ediziun, aschia ch’ins ha vuliu reagir en quei grau. Ultra da quei ei la redacziun dad uonn era sedecidida da cungir quella «carn» empau pli fetg – vul dir da mirar sin fatgs, schabetgs e decisiuns cun egls empau pli critics e da tscheu e leu dar ina (fina) tecca ni l’autra che duei provocar emoziuns e discussiuns da vart dils lecturs ed interessai. La finfinala porta in «bènaltè!» la pli gronda part dils cass era discussiuns cun el; schebein gl’arbiter ha giu raschun da schular quel ni schebein ei fuss stau pli prudent da desister dad in schul! «Last but not least» seigi aunc detg: Savens fa ei senn dad observar ils schabetgs ord in’autra perspectiva e cun empau distanza – adina denton cul respect duiu viers las persunas pertuccadas. 

En quei senn sperein nus che la locuziun taliana «La terza volta è quella buona» mondi a prau culla tiarza ediziun dil «bènaltè!» e giavischein a Vus, preziadas lecturas e preziai lecturs, bien divertiment – e secapescha era bunas discussiuns. 

Il bènaltè! 2018 en fuorma da PDF saveis Vus telecargar cheu

 

bènaltè! 2017 – 2. ediziun

Punctualmein sill'entschatta dil campiunadi 2017/18 ei la secunda ediziun dil "bènaltè!" cumparida.

Era questa ediziun porscha in vast cuntegn e tracta denter auter puspei historias ed anecdotas ord temps vargai, purtrets ed intervestas cun giugadurs anteriurs ed actuals, sco era treis giuvnas che dattan ballapei - e buca d'emblidar nos juniors. 

En quei connex engraziein nus er uonn grondamein a nos fideivels sponsurs per lur generus sustegn finanzial, il qual possibilitescha insumma a nus quei magazin. Engraziel fetg! 

Il "bènaltè!" 2017 en fuorma da PDF saveis Vus telecargar cheu.

 

bènaltè! 2016 – 1. ediziun

Igl uost 2016 ei l'emprema ediziun dil "bènaltè!", il niev magazin dil CB Trun/Rabius, vegnida lantschada. Sper historias ed anecdotas ord temps vargai, purtrets da "legendas dil club" e tops e flops d'anteriurs giugadurs porscha il magazin era ina plattafuorma al rival da Danis-Tavanasa. Plinavon sefateschenta il "bènaltè!" culs giugadurs dallas differentas equipas da juniors e dils activs, sco era cul giug da ballapei en general - pia in cuntegn fetg variont en connex cun nies club da ballapei. 

L'idea per in magazin vegn al secretari dil club Patrick Rothmund duront in giug da ballapei da plitost bassa qualitad - per cletg! El decuors dalla sera e dils proxims dis daventan ses patratgs pli e pli concrets. La finala pren el la curascha e contactescha in pèr commembers dil club che vegnessen en damonda per la redacziun. Igl echo ei gia dall'entschatta enneu fetg positivs ed ils giuvens ein incantai dall'idea da crear in magazin pil CB Trun/Rabius. En diversas sesidas vegn allura decidiu davart il cuntegn, il fil tgietschen e la finamira dil magazin. Nov meins pli tard schai l'emprema ediziun dil magazin sin meisa. Il rest ei historia ... La proxima ediziun ei planisada pigl uost 2017. 

Il "bènaltè!" 2016 en fuorma da PDF saveis Vus telecargar cheu. Plinavon anfleis Vus cheu l'emissiun dad RTR davart il "bènaltè!". 

En quei connex admettein nus a tut nos sponsurs in cordial engraziament pil grondius sustegn finanzial, il qual ha insumma possibilitau a nus l'ediziun d'in tal magazin e sperein vinavon sin Vies sustegn. Engraziel fetg!

 

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch