contact

CB Trun/Rabius

Caum postal 153

7166 Trun

+41 78 789 74 36

secretari@cb-trun-rabius.ch 

 

© 2018 by cb-trun-rabius.ch

debachel a vella

La sonda ha l'equipa da Renzo Albin, Carlo Tuor e Markus Steiner gastau a Vella. Igl ei stau il tierz davos giug dad ina sesiun plitost miserabla el senn sportiv. 

Aschia savessen ins era prender il giug da sonda sco simbol per la sesiun da ballapei 2015/16. L'emprema equipa dil CB ei sepresentada per gronda part dil giug sco equipa senza concept, tempo, engaschi e vuler. Bein dat ei tscheu e leu ina schanza da marcar in gol, ei reussescha denton buca da smaccar il bal sur la lingia dil caucasa. Mo lein entscheiver all'entschatta:

Dad aura pulit steppa dat igl arbiter liber il giug sil plaz da ballapei Bual a Vella. Lumnezia muossa gia naven dall'emprema minuta ch'els ein in'equipa ch'ins astga buca sutschazegiar. Aschia vegnan els gia baul malsegirs avon gol, quei entras ina flanca ella da sedisch. Cun empau cletg setschenta il bal allura avon ils peis digl attaccader lumnezian, il qual stat persuls avon il goli dil CB e marca agl 1:0. Era suenter il gol smaccan ils Lumnezians vinavon sil gol. Oravontut emprovan els da lantschar ils sperts attaccaders cun bals liungs. Ils biars da quels vegnan buc atras, denton reussescha ei duas, treis ga ad in adversari da mitschar cul bal encunter gol. Malgrad che Trun/Rabius vegn tier in pèr fetg bunas schanzas ed ei maunca mo pauc per in gol, resta ei tochen pausa tier in sulet gol. Igl ei nuota stau tut schliet quei ch'ils giugadurs han mussau ellas emprema 45 minutas - la perschuasiun da vuler semetter atras e da gudignar ils cumbats ha perencunter muncau empau tier memia biars. Il resultat da sulettamein 1:0 era denton buc ina sfida nunpusseivla per la secunda mesadad. 

Da pausa midan ils trenaders sil sistem da 4-4-2; culla speronza che l'equipa vegni da metter sut squetsch ils defensurs adversaris e da tener il bal ella zona prigulusa dil caucasa. Gia baul vegnan quellas speronzas denton destruidas entras in bal liung sin in attaccader lumnezian. Cun in tec cletg vegn quel avon il defensur vid il bal e stauscha allura tut persuls il bal sper il goli vi en gol - 2:0. 

Suenter quei gol va pauc ensemen pli tier il CB. Ils pass vegnan buca pli dai exacts, las cumbinaziuns serestrenschan sin in pèr paucs pass ed ils bals liungs anflan darar igl agen giugadur. Lumnezia dat perencunter vinavon a moda perschuadenta e vegn suenter in mument tier ina corna. Cun in bi culp da tgau settan els allura aunc il 3:0. El decuors dallas proximas minutas vegnan els tier duas, treis ulteriuras bunas schanzas avon gol. Communablamein reussescha ei denton al CB da tener il resultat en rama. Sporadicamein vegn Trun/Rabius la finfinala aunc tier in pèr paucas bunas schanzas da gol. Aschia setta Denis Monn p.ex. bein sin gol - il bal vegn denton tenius dil goli adversari. Era in culp liber vegn sittaus bein, anfla denton era mo ils vons dil goli adversari. 

Cuort avon la fin siara il CB Lumnezia allura aunc giu in conter cun success. Aschia temrinescha il giug cul resultat final da 4:0 pil CB Lumnezia. La fin ston ins dir che la megliera equipa ha gudignau - quei era fadigiau cun in tal resultat!

Pils giugadurs dil CB vala ei ussa d'emblidar quei debachel e da seconcentrar schon uss sil proxim giug encunter Lenzerheide. Quel vala ei da gudignar per finalmein radir naven tut ils quitaus e dubis concernent la relegaziun!

bènaltè! - il magazin dil cb

   
1. ediziun - 2016   2. ediziun - 2017   3. ediziun - 2018