contact

CB Trun/Rabius

Caum postal 153

7166 Trun

+41 78 789 74 36

secretari@cb-trun-rabius.ch 

 

© 2018 by cb-trun-rabius.ch

3 puncts dad aur

La sonda vargada ei l'emprema equipa da Trun/Rabius semesirada a casa a Pustget cun Laax. Laax sesanflava avon il giug cun dus puncts dapli sil conto dus plazs avon il caucasa. 

Il giug da 4. ligia havess giu da vegnir daus liber gia las 13:30 uras. Cunquei ch'ins ha denton a cuorta vesta stuiu procurar per in substitut pigl arbiter (ha piars il tren), han ils giugadurs ed ils aspectaturs stuiu haver empau pazienzia. Aschia ha ei la finfinala saviu ir liber las 14:15 uras - quei da bellezia aura e pulit cauldas temperaturas. 

Per Trun/Rabius era la situaziun avon il giug clara: Encunter in concurrent direct el cumbat encunter la relegaziun stuevan ins recaltgar 3 puncts. Cass cuntrari fuss la situaziun alla cua dalla tabella vegnida aunc pli malemperneivla. Da vart dils giugadurs tuts ch'eran pertscharts da quella situaziun. Quei ha en in senn procurau per motivaziun, da l'autra vart denton era per empau squetsch e malsegirtad. 

L'entschatta dil giug entscheiva il CB bein e muossa in pèr bialas cumbinaziuns. Aschia vegn ei malsegir suenter siets ord la secunda retscha ni era suenter corners. Duas ga vegn Clau Berther lantschaus sill'ala dretga e sa ir persuls encunter il goli. En quellas situaziuns maunca denton il cletg e la ruasseivladad, aschia ch'ei resta tiel 0:0. Sco igl ei denton savens el ballapei: Tgei che setta buca sez ils gols - cassescha els. Suenter in cumbat amiez il plaz recaltgan ils giugadurs da Laax il bal e tarmettan igl attaccader cun in bal liung. Goli e defensiun dil CB reageschan memia plaun, aschia ch'igl attaccader sa marcar il 0:1 pil hosp. 

Suenter quei gol para Trun/Rabius dad haver piars il fil: Il moviment maunca cumpletamein tiels giugadurs, aschia ch'ei reussescha buca pli da tener il bal sur pli liung temps ella atgnas retschas. Cuort avon la pausa vegn in attaccader da Laax schizun persuls avon il goli tiel siet. Ei resta denton tier il 0:1 da pausa. 

Suenter pausa muossa il CB allura ina reacziun. Ils giugadurs attaccan ils hosps pli baul ed emprovan da far dapli squetsch. Aschia vegnan els pass per pass tier bunas schanzas - e tier in penalti. Gian Andrea Beer vegn mess a tiara suenter ina bial'acziun singula. Il penalti setta Livio Janka suveran ella reit - 1:1. Quei gol porta puspei empau emoziuns e speronza el giug. Trun/Rabius emprova vinavon da metter sut squetsch la defensiun adversaria. Pliras ga reussescha ei als attaccaders da sittar sin gol; sulettamein il cletg maunca magari. Quel accumpogna silsuenter perencunter il siet da Clau Berther: Suenter haver vargau il goli setta el ord in anghel nunpusseivel. Il bal vegn pli e pli liungs e setschenta la finfinala ella reit dil cantun liung. 2-1 per Trun/Rabius! 

Ils giugadurs ein ussa perschuadi da sesezs e vulan per tut prezi gudignar quei giug. La fasa finala porta denton aunc in pèr scenas che pretendan gnarva e ruasseivladad da vart dil caucasa e dils aspectaturs. Laax vegn numnadamein aunc malsegirs tier divers culps libers e corners. Communablamein reussescha ei perencunter als giugadurs da Trun/Rabius da defender tut quei che vegn sittau sin gol ed aschia gudognan els il giug cun 2:1. Igl ei 3 puncts che valan aur ella situaziun momentana e che dattan empau aria. Nuotatonmeins vala ei da buca schar luc e da vinavon dar tut il pusseivel ils proxims giugs! 

bènaltè! - il magazin dil cb

   
1. ediziun - 2016   2. ediziun - 2017   3. ediziun - 2018