contact

CB Trun/Rabius

Caum postal 153

7166 Trun

+41 78 789 74 36

secretari@cb-trun-rabius.ch 

 

© 2018 by cb-trun-rabius.ch

emoziuns - si e giu - giu e si

Questa dumengia ha il CB retschiert en quarta ligia l'equipa da Linth 04 pil cumbat da relegaziun. Omisduas equipas sesanflavan avon il giug sut il streh da relegaziun - Trun/Rabius cun dus punts avantatg sil hosp. La finamira ei stau ina victoria, la quala havess procurau per empau aria e levgiament. 

L'entschatta dil giug muossa igl adversari da Linth denton ch'els quentan buc ir en tschunavla ligia, silmeins buca senza cumbatter encunter. Aschia vegnan els savens malsegirs avon il gol da Trun/Rabius, quei oravontut cun bals liungs che caschunan tscheu e leu empau malsegirtads ella defensiun dil caucasa. Il CB vegn buca da sedeliberar dil squetsch digl adversari, las cumbinaziuns van buca tenor giavisch ed aschia ei il bal la gronda part dil temps tiegl adversari. Cuort avon la fin dall'emprema mesadad gartegia ei denton a Clau Berther da mitschar dall'ala dretga si. Siu bal encunter il miez vegn il Daniel Monn (cuort avon midaus en) la finfinala da smaccar sur la lingia - quei suenter ch'igl arbiter ha buca schau valer in gol cuort avon. Cunquei va ei cun 1:0 avantatg en cabina. 

Da pausa ein ils giugadurs ferm perschuadi da sesezs e vulan per tut prezi prender cun 3 puncts ord il giug. Gia baul ella secunda mesadad vegn ei denton auter: Suenter che la defensiun dil CB ei buca stada 100% consequenta e cun empau discletg stat ei ella 51avla minuta 1:2 per Linth. Trenaders ed aspectaturs san buca capir tgei che succeda sil plaz da bal e las emoziuns creschan. Aschia ei il 2:2 pauc suenter in grond levgiament per tuts presents.

La proxima mes'ura ei allura ei empau in si e giu dallas emoziuns: Ferton ch'il CB havess saviu sittar in ni l'auter gol ord quellas paucas schanzas ch'els han creau, ston els mirar da buca survegnir in cuntergol. Entras culps libers e corners vegnan ils giugadurs da Linth per part numnadamein pulit malsegirs. Suenter ch'ina attacca dall'emprema equipa finescha culla spiarsa dil bal, va ei vonzei spert: In attaccader da Linth va en emblidonza silla vart dretg e stat la finfinala tut persuls avon il goli ed ha neginas miserias da marcar il gol. Entras quella malprecauziun meina il hosp ella 84avla minuta cun 2:3.

Quei che suonda silsuenter ei in crimi ch'ins savess buc inscenar meglier: Plein perschuasiun emprovan ils giugadurs dil club da casa d'attaccar e da marcar in gol. Cun in bi bal ella gassa vegn igl attaccader dil CB lantschaus e vegn allura mess a tiara dil defensur adversari - bènaltè!!! Igl arbiter muossa suenter liungas ponderaziuns la finfinala sil punct da penalti; ina decisiun ch'evochescha da vart dil CB e ses fans euforia infinita e tiegl adversari gretta e malcapientscha pigl arbiter. 3 Minutas pli tard pren Daniel Monn la curascha e setta il bal cun tutta forza el cantun dretg a bass; negina schanza pil goli - 3:3!!! Cun quei resultat schula igl arbiter cuort suenter giu il giug. 

Trun/Rabius ha puspei fatg grev a sesez la veta entras sbagls e malprecauziuns. Da l'autra vart eisi da valetar sco segn fetg positiv che l'equipa ha buca tschessau d'attaccar suenter il 2:3, mobein ch'ella ha sfurzau il cletg. Quei vala ei da prender cun pil proxim giug! 

bènaltè! - il magazin dil cb

   
1. ediziun - 2016   2. ediziun - 2017   3. ediziun - 2018