pausa d'unviern

Muort il virus da corona ei la sesiun d'atun 2020 vegnida strihada. Nus sevesein speronza puspei la primavera 2021 sil plaz da bal! 

ei tonscha buc encunter il capogruppa

La fin dalla jamna vargada ha il CB Trun/Rabius retschiert l'equipa dad Uznach, il capogruppa da 4. ligia. Suenter in'entschatta empermettenta tonscha ei denton buca per puncts. 

L'emprema equipa entscheiva il giug encunter igl adversari dad Uznach plein motivaziun ed engaschi. Ils giugadurs prendan encunter ils cumbats e mettan en lur tgierp - muossan agl adversari ch'els vulan tener ils puncts cheu a casa. Gia baul vegn Uznach denton tier in culp liber cuort avon la da sedisch, il qual els nezegian per ir en avantatg. Il bal sdrema la latta e sgola vinavon ella reit. 

Il CB reagescha denton immediat ed egalisescha agl 1:1, quei mo 3 minutas pli tard. Quei gol dat anim ed ils giugadurs muossan vinavon ina buna prestaziun. Ella 24avla minuta sto il goli dil caucasa perencunter prender il bal ina secunda ga ord la reit. Ils giugadurs lain denton era suenter quei gol buca pender lur tgaus, mobein dattan vinavon ballapei e vegnan schizun tier bunas schanzas. Cun in tec dapli perschuasiun havessen ils giugadurs segiramein saviu sittar in ni dus gols en quella fasa. Il cletg ei denton buca staus sin lur vart. Ella 39avla minuta vegn ei allura tier ina scena dalla categoria "curios". In defensur dil CB emprova d'impedir il pass sigl attaccader dad Uznach e tucca il bal empau disgraziadamein, aschia che quel sgola vi e digl agen gol viaden. Cun quei discletg van las equipas cul resultat dad 1:3 ella cabina. 

Suenter pausa dat Trun/Rabius per part buca mal, vegn denton buca da crear bia bunas schanzas e da nezegiar quellas. Insumma ston els tscheu e leu far adatg ch'igl adversari setti buc in ulteriur gol. Da corners ni culps libers vegn Uznach per part pulit malsegirs. 

Cuort avon la fin midan ils trenaders il sistem e dattan empau pli offensiv. En quella fasa reussescha ei la finala lu era da smaccar il bal sur la lingia digl adversari - Serafin Bundi marchescha cun in bi siet il 2:3 per Trun/Rabius. Per dapli tonscha ei denton buca pli, aschia ch'ils giugadurs ston danovamein ir giu dil plaz cun negins puncts. 

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch