pausa d'unviern

Muort il virus da corona ei la sesiun d'atun 2020 vegnida strihada. Nus sevesein speronza puspei la primavera 2021 sil plaz da bal! 

la secunda victoria en treis dis

La sonda sera ha la secunda equipa astgau esser hosp dall'equipa da Tujetsch. Las davosas duas partidas haveva l'equipa da Bruno Steiner e Rico Tiri gudignau suenter ina fasa stgirenta dad 8 onns senza victoria encunter Sedrun. Quei giug ei per il CB mintga onn in highlight.

 

Il CB emprova naven dall'entschatta da far squetsch sin ils defensurs da Sedrun. Gia ella empremas minutas vegn il CB tier bunas occasiuns. Sedrun perencunter vegn buca decisiv sur la lingia da sedisch dil CB. Ei varga biebein 15 minutas tochen ch'igl emprem gol croda. Ina biala cumbinaziun dall'ala dretga siadora cun ina pass sin Kevin che terminescha l'acziun cun in gol munta igl 1:0 per il CB. Legreivlamein va ei vinavon aschia suenter quei gol. Ei varga biebein 15 minutas entochen ch'il Kevin fa siu secund gol ei quei cun in volley. Las davosas 15 minutas dall'emprema mesadad vegn Sedrun pli ferms. Ord il giug vegn Sedrun denton strusch tier schanzas. Malsegir ein mintgamai ils culp libers ed ils corners. Cun ina corner vegn Sedrun da scursanir sin 1:2 ella 40avla minuta.

La secunda mesadad ei in crimi. Il CB ha schanzas da marcar il gol decisiv, denton quei vegn tralaschau. La buna organisaziun e la disciplina dil CB impedescha Sedrun da crear schanzas. Vinavon ein els denton malsegirs cun culps libers e corners. Cura ch'igl arbiter schula finalmein giu il giug ei il plascher tier giugadurs e fans gronds. L'equipa contonscha la finamira da 6 puncts enteifer 3 dis. Legreivel ei oravontut stau sco ils giugadurs ein curri in per l'auter. Aschia astga ei ir vinavon.

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch