pausa d'unviern

Muort il virus da corona ei la sesiun d'atun 2020 vegnida strihada. Nus sevesein speronza puspei la primavera 2021 sil plaz da bal! 

emprema victoria egl onn 2016

La gievgia sera ha giu liug il derbi tradiziunal encunter ils vischins da Tavanasa. Per la secunda equipa era quei ina buna caschun da mussar ina reacziun sin il debachel digl emprem giug encunter Panaduz.

Naven dall'emprema minuta pren il CB il giug enta maun. Gia ellas empremas minutas vegn il CB tier bunas schanzas da sittar gols. Deplorablamein nezegian ils attaccaders dil CB buca las caschuns aschia che la suandonta sabientscha veglia dil ballapei ei entrada en vigur: "Cura ch'ins fa davon buca las schanzas survegn ins in cuntergol." La sabientscha ei entrada en vigur ella 35avla minuta. Suenter ina corna setta Tavanasa cun in siet da dumengias igl emprem gol dil giug. Entochen pausa vegn il CB buca da reagar.

Legreivlamein vegn il CB ladinamein suenter pausa da far in gol. Allura d'ina flanca naven dall'ala dretg stauscha Severin Deplazes il bal cul tgau da gol en. Suenter il gol vegn il CB adina puspei cun bunas acziuns da seluvrar entochen la da sedisch. Il davos e decisiv pass maunca denton per terminar las acziuns cun success. Aschia vargan las minutas ed ins ha il sentiment ch'il CB vegn buca pli da sittar il gol decisiv. Ella 75avla minuta croda tuttina il 2:1 per ils da Trun entras in gol agen dalla USDT.

Ils 3 puncts pren l'equipa bugen a casa. Igl ei denton semussau ch'ei dat aunc bia lavur per la secunda dil CB. L'equipa selegra ussa d'astgar dar sonda il secund derbi enteifer treis dis e quei encunter ils vischins da Sedrun. Quei giug ei da gronda muntada per ils giugadurs ed ha liug sonda, allas 17.00 uras a Mustér.

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch