pausa d'unviern

Muort il virus da corona ei la sesiun d'atun 2020 vegnida strihada. Nus sevesein speronza puspei la primavera 2021 sil plaz da bal! 

kick and rush a mels

Dumengia endamaun ha l'emprema equipa giu da serender gia baul encunter Mels pil secund giug da campiunadi dil 2016. Suenter in'entschatta empermettenta ei il ballapei engles "kick and rush" dall'equipa da Mels denton semess atras ed ha menau il cau-casa alla victoria. 

Ils giugadurs dall'emprema equipa havevan fatg il ferm propiest da puspei marcar gols enteifer las proximas 90 minutas - ed oravontut dad ir per 3 puncts a Mels! Aschia ha l'equipa da Renzo Albin, Carlo Tuor e Markus Steiner entschiet il giug plein slontsch. Suenter 20 minutas menava il CB cun 0:1 ed haveva ulteriuramein gia tuccau inaga la petga, sco era inaga la latta dil gol digl adversari. 

Sco igl ei denton magari el ballapei - tgi che setta buc ils gols, cassescha els - ston ils giugadurs dil CB era schar mitschar in attaccader digl adversari suenter in bal liung. Il cuntergol porta malsegirtad ellas retschas da Trun/Rabius e quella nezegia Mels ellas proximas minutas (35 e 36avla minuta) schizun dublamein! La schinumnada moda e maniera englesa "kick and rush" porta success all'equipa da casa, aschia che las equipas van cul resultat da 3:1 en cabina.

Suenter pausa semuossa il CB puspei da sia megliera vart e dominescha bunamein l'entira secunda mesadad. Malgrad la dominanza reussescha ei buc al hosp da dumignar il bal da gol viaden e puspei eis ei in dils sperts attaccaders da Mels che marca il quart gol ella 71avla minuta. Ella 83avla minuta eis ei lu tuttina aschi lunsch: Trun/Rabius setta siu secund gol en quei giug. Per dapli tonscha ei denton buca pli, aschia che l'emprema equipa sto schar ils 3 puncts a Mels e puspei serender cun mauns vits a casa. 

 

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch