in remis el derbi rumantsch
La partida entscheiva cun ina duscha freida per Trun/Rabius; gia suenter 6 minutas gartegia ei a Surses d’ir en avantatg entras Mauro Simonet cun in bi siet da distanza. L’equipa da casa emprova da controllar il giug, Surses speculescha denton clever sin sbagls ed aschia sin schanzas entras conters. Suenter biebein 20 minuntas la megliera schanza per il CBTR, Patrizio Decurtins tucca denton la latta. Paucas minutas avon pausa aulza Julian Jenal il resultat schizun sin 0:2 per Surses! Dat ei ina surpresa quei di a Pustget? Tgunsch ha il te da pausa gustau als giugadurs da Trun/Rabius pauc aschi miserabel sco quei di. Ils trenaders da Trun/Rabius reageschan cun gest treis midadas. Ed il CBTR para d’haver capiu tgei che stat sil giug oz, numnadamein vesan ils numerus aspectaturs suenter pausa finalmein il ver CBTR. L’equipa dalla Cadi controllescha uss clar la partida e vegn suenter 61 minutas tier igl emprem gol entras Patrizio Decurtins suenter ina corna. Trun/Rabius fa vinavon squetsch e vegn 10 minutas pli tard da remisar entras Beat Cadruvi. Suenter danovamein ina corna era la situaziun pauc surveseivla, igl arbiter era denton postaus bein ed ha viu ch’il bal haveva surmuntau la lingia. Trun/Rabius enquera la victoria, Surses tegn denton petg cun in bien goli, buna defensiva e cunzun buna morala. Las davosas minutas vegn Surses tuttina aunc tier ina schanza, fa denton memia pauc ord la situaziun. Aschia ch’il giug el derbi rumantsch va a fin cun 2:2. Resumau ha Trun/Rabius cunzun ella secunda mesadad segir giu in ton dapli dil giug, il CBS ha denton fatg grev la veta al CBTR ed ha insumma buc engulau il punct.
informaziuns: 3. ligia gruppa 1; Trun/Rabius – Surses 2:2 (0:2); Pustget, Trun – 230 aspectaturAs
gols: 6. Mauro Simonet 0:1, 43. Julian Jenal 0:2, 61. Patrizio Decurtins 1:2, 71. Beat Cadruvi 2:2
Trun/Rabius: Pascal Schmed; Mirco Pfister (46. Denis Monn), Ramon Orlik, Livio Janka, Sandro Orlik; Remo Alig (71. Salvatore Stagliano), Silvan Muoth (46. Beat Cadruvi), Mathias Flepp, Daniel Pfister (46. Clau Berther); Patrizio Decurtins, Gianin Derungs
Surses: Niclo Devonas; Gianluca Augustin, Raphael Poltera, Robin Demarmels; Linard Augustin, Bernardo Bonifazi, Enrico Carisch, Mauro Simone, Manuel Simonet; Julian Jenal, Ivano Simonet
remarcas: Trun/Rabius senza Fabio Caduff, Mauricio Cathomas, Orlando Monn, Damian Schmed
