proxims termins

19-06-2022 Turnier da premis   Plaz da ballapei Trun

spitachel a glaruna en disfavur dil cb trun/rabius

La rama ei stada speciala pil CB Trun/Rabius a Glaruna: L’equipa che deva ils onns 1988 entochen 1992 aunc ella NLB cun giugadurs sco Hans-Peter Briegel – la generaziun els onns vegn a seregurdar – ha organisau quei di ina fiasta sut il motto «Legända-Fäscht», aschia ch’in vast publicum era presents la sonda sil Buchholz a Glaruna. La partida ha denton buc schau tschaffar l’entschatta da quella euforia. Ell’emprema mesadad eisi plitost stau in giug d’ir en tenda a guder la gervosa che da sesalzar dalla suppia. Sulettamein il gol d’Alain Hofer suenter biebein mes’ura ei staus da notar. Suenter pausa denton tut in auter giug: Paucas minutas ein dadas che Silvan Muoth setta igl emprem gol per Trun/Rabius. Il giug ha uss in bia pli ault tempo ed ei fetg interessants da persequitar. Gest en ina buna fasa dil CBTR capeta il 2:1 per Glaruna. Marco Conte seruschna ella da tschun e stauscha il bal dapli cul bratsch che cul rest dil tgierp el nez. Tut il reclamar gida nuot, ei va vinavon. Trun/Rabius reaghescha endretg e vegn puspei da remisar entras Gianin Derungs. 15 minutas avon la fin nezegia Gianluca Zimmermann in penalti per Glaruna e paucas minutas pli tard il 4:2 entras Marco Conte ord posiziun che ferdava fetg suenter in offside, mo era quella ga – e sco atgnamein adina - nezegia il reclamar nuot. Trun/Rabius fiera denton buc la faultsch el canvau e cumbatta vinavon. Mathias Flepp procura cun ina tgaua 6 minutas avon la fin che Glaruna sa buc selegrar memia baul. Mo Patrick Widmer decida il giug definitiv en favur dall’equipa da casa ellas davosas minutas.

Trun/Rabius havess bugen tartignau empau la suppa da fiasta quei di a Glaruna. La morala ei stada intacta, mo ils gols ein curdai memia sempels. Tuttina han las duas equipas aschia procurau pil spitachel giavischau a caschun d’ina fiasta. Proxima dumengia spetga Trun/Rabius il derbi rumantsch encunter Surses a Pustget.

 

informaziuns: 3. ligia, gruppa 1; Glaruna – Trun/Rabius 5:3 (1:0); Buchholz, Glaruna – 280 aspectaturAs

gols: 27. Alain Hofer 1:0, 47. Silvan Muoth 1:1, 62. Marco Conte 2:1, 66. Gianin Derungs 2:2, 75. Gianluca Zimmermann (penalti) 3:2, 78. Marco Conte 4:2, 84. Mathias Flepp 4:3, 89. Patrick Widmer 5:3

Trun/Rabius: Pascal Schmed; Mirco Pfister (89. Clau Berther), Damian Schmed, Livio Janka, Denis Monn; Daniel Pfister, Silvan Muoth (76. Beat Cadruvi), Mathias Flepp, Clau Berther (71. Sandro Orlik); Salvatore Stagliano (60. Gianin Derungs), Patrizio Decurtins,

Glaruna: Loris Micheroli; Patrick Widmer, Thomas Heinzer, Senol Kartal, Loris Künzle; David Dovicak, Franco Elmer, Gianluca Zimmermann, Eldon Bullaku; Samir Reshani, Alain Hofer

remarcas: Trun/Rabius senza: Remo Alig, Fabio Caduff, Mauricio Cathomas, Orlando Monn, Ramon Orlik

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch