proxims termins

19-06-2022 Turnier da premis   Plaz da ballapei Trun

trun/rabius cun fleivla prestaziun a casa

La partida entscheiva schliet per l’equipa da casa; igl ei buc dau quater minutas ch’ils hosps dil cantun S. Gagl van suenter ina corna ed entras Mike Jud en avantatg. Insumma ei Weesen dall’entschatta enneu bia pli presents che Trun/Rabius. Igl ei beinspert veseivel ch’ils hosps – che cumbattan encunter la relegaziun – vulan per tut prezi recaltgar puncts a Pustget. Il CBTR vegn mo plaunet ella partida ed entscheiva suenter in quart d’ura finalmein era a prender part al giug. Suenter ina biala e sperta acziun sin l’ala tauscha Gianin Derungs il bal a Daniel Pfister e lez setta igl 1:1 per Trun/Rabius. Mo il gol mida buc bia; Trun/Rabius controllescha uss zuar meglier la partida, denton van fetg bia pass ellas combas digl adversari. La secunda mesadad semuossa l’entschatta il medem maletg; Trun/Rabius ha il bal, mo fa pauc ordlunder. Ella 58. minuta vegn Weesen tier ina buna pusseivladad cun in culp liber ord 22 meters, e Zino Coppola nezegia tala cun in ferm e plazzau siet ella reit. Trun/Rabius aulza uss la cadenza, mo vinavon vegnan ils bals piars bia memia tgunsch. Ch’il plaz a Pustget ei buc pli in teppi ei enconuschent, perduna denton buc ils biars bals falli. 12 minutas avon la fin sto in giugadur da Weesen ir cun mellen/tgietschen en cabina. La schanza per Trun/Rabius? Na, gest la proxima acziun meina tier in penalti dispiteivel pils hosps e Noël Gehrig aulza il resultat sin 1:3. Il CBTR fiera uss tut anavon, mo quei senza success. Trun/Rabius havess quei di era buc fadegiau d’ir per puncts. Igl ei stau ina dallas fleivlas prestaziuns dalla sesiun. Che tala ha gest stuiu schabegiar a casa avon ils agens fans e quei suenter 8 partidas senza terrada ei donn. 

 

informaziuns: 3. ligia gruppa 1; Trun/Rabius – Weesen II 1:3 (1:1); Pustget, Trun – 190 aspectaturAs

gols: 4. Mike Jud 0:1, 19. Daniel Pfister 1:1, 58. Zino Coppola 1:2, 80. Noël Gehrig (penalti)

Trun/Rabius: Mauricio Cathomas; Mirco Pfister (81. Toni Cathomas), Damian Schmed, Livio Janka, Sandro Orlik; Salvatore Stagliano (72. Silvan Cajacob), Clau Berther, Daniel Pfister, Silvan Muoth (46. Beat Cadruvi); Patrizio Decurtins, Gianin Derungs (66. Remo Alig)

Weesen: Martin Mächler; Dario Büsser, Noël Gehrig, Sven Popp, Andreas Briker; Marco Tramontana, Zino Coppola, Mike Jud, Ailton Dervishi; Roman Eicher, Michel Büsser

remarcas: Trun/Rabius senza Fabio Caduff, Mathias Flepp, Denis Monn, Orlando Monn, Ramon Orlik

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch