proxims termins

19-06-2022 Turnier da premis   Plaz da ballapei Trun

in punct per trun/rabius a sargans

Meglier sa la partida buc entscheiver per Trun/Rabius; la lontschetta gronda dall’ura haveva aunc buc dumignau duas ga entuorn che Daniel Pfister setta l’equipa dalla Cadi suenter bi pass da Gianin Derungs ella gassa en avantatg. Las empremas 20 minutas s’audan lu era al CBTR cun duas ulteriuras fetg bunas schanzas. Plaunet anfla denton era Sargans el giug aschia ch’igl ei ina partida ulivada avon pausa. La secunda mesadad entscheiva bunamein sco l’emprema. Igl ei buc giugau 4 minutas ch’ei ha num 2:0 per Trun/Rabius – entras Gianin Derungs sin bi pass da Patrizio Decurtins. Il CBTR vegn zunghegiaus pauc pli tard tier duas midadas muort blessuras pintgas – e quei gest en ina fasa che l’equipa da casa entscheiva a smaccar pli e pli fetg. Quellas midadas paran da procurar per empau malsegirtad tier Trun/Rabius aschia che Sargans vegn enteifer duas minutas d’egualisar. Suenter quels dus gols sepeglia il CBTR puspei, cheutras dat ei ina partida interessanta cun schanzas per la victoria sin omisduas varts. Ella propi davosa secunda vegn Remo Alig aunc tier ina biala acziun, fallescha denton il gol per milimeters. Ils fans dall'equipa da casa sco era dils hosps sgratan en collectiv ils cavels en quei mument; quei fuss aunc stau. Mo tut priu e malgrad che Trun/Rabius menava 2:0 ei il remis segir reclis. Aschia resta Trun/Rabius gia 8 giugs senza terrada. Vinavon va ei en duas jamnas a Pustget encunter Weesen.

 

informaziuns: 3. ligia, gruppa 1; FC Sargans – CB Trun/Rabius 2:2 (0:1); Riet, Sargans. – 120 aspectaturAs

gols: 2. Daniel Pfister 0:1, 49. Gianin Derungs 0:2, 60. Kevin Willi 1:2, 62. David Becker 2:2

Trun/Rabius: Mauricio Cathomas; Denis Monn, Ramon Orlik (55. Damian Schmed), Livio Janka, Sandro Orlik; Daniel Pfister (58. Remo Alig), Silvan Muoth, Mathias Flepp (64. Salvatore Stagliano), Clau Berther; Patrizio Decurtins, Gianin Derungs

Sargans: Claudio Dosch; Sandro Willi, Benjamin Weber, Rahulan Sivalingam; Kevin Willi, David Becker, Marco Giordano, Sven Mathis, Fabian Schai; Chris Tanner, Marco Walser

remarcas: Trun/Rabius senza: Beat Cadruvi, Fabio Caduff, Orlando Monn, Mirco Pfister

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch