proxims termins

19-06-2022 Turnier da premis   Plaz da ballapei Trun

trun/rabius cumbatta finalmein puschlav

Suenter 94 intensivas minutas audan ins a Pustget ina deliberaziun collectiva; finalmein ha Trun/Rabius dumignau da gudignar encunter la AC Valposchiavo. Bia aua ei flessegiada dil Rein giuadora entochen che quei ei puspei gartegiau, ton pli gronda ei la cuntentientscha.

Gia dall’entschatta schenghegian las duas equipas nuot ina a l’autra. Igl ei la partida spitgada cun dabia emoziuns (5 cartas melnas per Puschlav), quei ch’ei savens il cass cu ei va encunter l’equipa dil sid da nies cantun. Suenter 26 minutas nezegia Marcello Raselli in’inattenziun dall’equipa da casa e sieta ils Puschlavins en avantatg. Las empremas 45 minutas ei la partida relativamein uliva, quei semida denton suenter pausa. Il CBTR dat uss en il tact dil giug e controllescha la partida. Quei semuossa ella 56. minuta tier igl emprem gol. Patrizio Decurtins plazzescha il bal bellezia ella reit. A Puschlav gartegia ei insumma buc pli da sedeliberar e lai cheutras smaccar ella defensiva. Trun/Rabius lai circular bein il bal ellas atgnas retschas e freda la puorla ch’ei schai en quei di dapli che mo in remis a Pustget. E veramein, paucas minutas avon la fin il 2:1 per l’equipa da casa! A Daniel Pfister – che fa mintgaton endamen ina lieur da duracell cun sia moda da giugar – gartegia ei da semetter atras encunter la ferma defensiun da Puschlav e da marcar cun in bi siet il secund gol per il CBTR. Naturalmein che la fasa finala ei hectica, denton lai Trun/Rabius barschar nuot pli e tegn aschia ils 3 puncts fadegiadamein ella Cadi. Trun/Rabius ei cheutras gia dapi 7 giugs da campiunadi senza terrada e salida dil 4. rang ella tabella.

 

informaziuns: 3. ligia gruppa 1; Trun/Rabius - Valposchiavo 2:1 (0:1); Pustget, Trun – 170 aspectaturAs

gols: 26. Marcello Raselli 0:1, 56. Patrizio Decurtins 1:1, 87. Daniel Pfister 2:1

Trun/Rabius: Mauricio Cathomas; Mirco Pfister, Damian Schmed, Livio Janka, Sandro Orlik; Beat Cadruvi (46. Silvan Muoth), Salvatore Stagliano (61. Daniel Pfister), Denis Monn (46. Clau Berther), Mathias Flepp; Patrizio Decurtins (91. Ramon Orlik), Gianin Derungs (69. Remo Alig)

Valposchiavo: Omar Viviani; Luca Cristiano, Alessandro Fiorina, Massimiliano Fiorina, Saran Rampa; Mattia Cathieni, Alessandro De Campo, Mattia Merlo, Mauro Crameri; Nicola Pola, Marcello Raselli

remarcas: Trun/Rabius senza Fabio Caduff, Orlando Monn

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch