proxims termins

19-06-2022 Turnier da premis   Plaz da ballapei Trun

fasa finala turbulenta per trun/rabius a cazas

Partidas denter Tusaun-Cazas e Trun/Rabius ein adina in tec pli specialas. Gie, ins astga schizun pretender ch’ei han caracter da derbi. Ils cumbats ein fetg intensivs e savens giogan emoziuns ina rolla. Buc auter eisi era quella ga stau.

Il giug entscheiva denton dètg bufatg. Cunquei ch’ils trenaments da primavera han liug sin plaz artificial vala ei l’entschatta da s'endisar vid in plaz natural. Trun/Rabius anfla suenter in quart’ura meglier ella partida e surpren la bitgetta. Quei denton senza vegnir tier pli grondas schanzas. Cuort suenter pausa vegn Damian Schmed suenter ina corna tier in’emprema gronda schanza, fallescha denton per pauc il gol. 20 secundas pli tard croda igl emprem gol, denton per Tusaun-Cazas. Jairo Mathias Caluori Wachter setta Tusaun en avantatg suenter in schuber conter. Il CBTR lai denton buc irritar e surpren puspei la bitgetta. Ella 57. minuta schula igl arbiter in penalti pils hosps. Patrizio Decurtins surpren la responsabladad ed egualisescha la partida. Las emoziuns entscheivan sil pli tard uss a vegnir el giug ed ils cumbats vegnan pli e pli intensivs. Las davosas 10 minutas ein fetg interessantas ed in gol sa curdar da tut temps. E pilver, ella 91. minuta gartegia a Denis Monn in siet da dumengias ed il secund gol pil CBTR. Ei quei la victoria per l’equipa dalla Cadi? Na, treis minutas pli tard e pia ella 94. minuta vegn Tusaun-Cazas d’egualisar entras Vendim Gashi. Hechje! Mo, igl ei aunc buc finiu! Il giug ei buc daus libers che Patrizio Decurtins vegn tier duas schanzunas ord cuorta distanza, mo il goli parescha x zaco ils dus siets. Quels che han aunc buc tgau blut survegnan sil pli tard uss el. Igl arbiter ha cumpassiun cun la gnarva dils presents e finescha la partida pauc pli tard. Tgei spitachel las davosas sis minutas. Era sch’igl ei alla fin forsa dus puncts spiars ha Trun/Rabius mussau ina buna prestaziun ch’ei empermettenta per la sesiun da primavera.

 

informaziuns: 3. ligia, gruppa 1; Tusaun-Cazas – Trun/Rabius 2:2 (0:0); St. Martin, Cazis – 130 aspectaturAs

gols: 48. Jairo Mathias Caluori Wachter 1:0, 57. Patrizio Decurtins (penalti) 1:1, 91. Denis Monn 1:2, 94. Vendim Gashi 2:2

Trun/Rabius: Mauricio Cathomas; Mirco Pfister, Damian Schmed, Livio Janka, Sandro Orlik; Daniel Pfister (80. Salvatore Stagliano), Beat Cadruvi (74. Silvan Muoth), Mathias Flepp (78. Denis Monn), Remo Alig (70. Clau Berther); Patrizio Decurtins, Gianin Derungs

Tusaun-Cazas: Emre Akca; Christof Spörri, Nico Bundi, Yanik Brot, Dario Rüedi; Diego Raho, Leandro Rüedi, Vendim Gashi, Matti Battaglia; Luca Michael, Jairo Mathias Caluori Wachter

remarcas: Trun/Rabius senza Fabio Caduff, Orlando Monn, Ramon Orlik

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch