proxims termins

19-06-2022 Turnier da premis   Plaz da ballapei Trun

staziun finala per trun/rabius el ¼-final dil cup svizzer

Cun victorias encunter Trübbach, Altstätten e Wängi ei l’equipa da Trun/Rabius sequalificada sco suletta equipa grischuna per il ¼- final dil Cup svizzer. La speronza era gronda da vegnir ina runda vinavon ed aschia pli e pli datier da dumignar inaga ella runda principala dil Cup svizzer nua ch’ils adversaris gronds dalla Challenge ni schizun Super League spetgan. Tgei spitachel fuss quei da veser inaga in’equipa sco Basel, FCZ ni YB sin la plazza da sport a Pustget. Denton resta quei – silmeins per questa sesiun – in siemi.

L’entschatta dil giug encunter Wittenbach el cantun s.Gagl ei uliva, denton eisi veseivel ch’il CBTR ha miserias da vegnir a frida cun il plaz artificial leischen. Cun in conter suenter ina corna da Trun/Rabius (!) vegn Wittenbach tier in penalti ed aschia tier la schanza da sittar igl emprem gol dalla partida. Mauricio Cathomas freda il dretg cantun, denton ei il siet memia ferms e plazzaus aschia che l’equipa da casa va en avantatg. Paucas minutas avon pausa il 2:0 suenter ina corna entras Gianni Colonna. Da pausa fa Trun/Rabius pliras midadas ed emprova aschia da vegnir cun la reacziun. La partida ei denton buc dada libra che Diego Cassani aulza il resultat sin 3:0. Quei gol cuort suenter pausa vegn – perdunei mes plaids – il pli tup mument pusseivel e rumpa era il culiez a l’equipa dalla Cadi. En in giug da cup va ei per tut ni nuot. Perquei emprova Trun/Rabius vinavon d’attaccar, quei ch’arva naturalmein la pusseivladad per Wittenbach da vegnir tier conters. Sbagls individuals dils hosps, denton era ina buna partida dall’equipa da casa meina lu pass per pass tier il resultat da 6:0. Cuort avon la fin vegn Trun/Rabius tier in penalti, denton va era quei bal buc ella reit. In tec simtomatic per l’entira partida.

Senza encurir stgisas ei il plaz artificial cun in material nunusitau staus in motiv per igl ault resultat. Denton ha l’equipa da Trun/Rabius era buc purtau la prestaziun ch’ins savess spitgar en in ¼- final dil Cup svizzer. Quei ch’ei da deplorar, beinsavend che quellas schanzas vegnan buc mintg’onn.

 

informaziuns: Cup svizzer, 1/4-final; Wittenbach - Trun/Rabius 6:0 (2:0); Grüntal, Wittenbach – 70 aspectaturAs

gols: 26. Luca Brülisauer (penalti) 1:0, 39. Gianni Colonna 2:0, 46. Diego Cassani 3:0, 57. Seyfettin Akdeniz 4:0, 73. Luca Brülisauer 5:0, 91. Diego Cassani 6:0

Trun/Rabius: Mauricio Cathomas; Mirco Pfister, Mathias Flepp, Lucas Maissen, Sandro Orlik (68. Denis Monn); Daniel Pfister (46. Robin Monn), Denis Monn (46. Ramon Orlik), Salvatore Stagliano (70. Beat Cadruvi), Remo Alig; Patrizio Decurtins (46. Clau Berther), Gianin Derungs

Wittenbach: Severin Stricker; Diego Cassani, Seyfettin Akdeniz, Luca Brülisauer, Gianni Colonna; Adrian Breitenmoser, Joel Pfister, Dominik Eisenhut, Andrin Niederer; Moritz Angehrn, Lukas Hungerbühler

remarcas: Trun/Rabius senza Fabio Caduff, Livio Janka, Orlando Monn, Silvan Muoth, Damian Schmed

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch