pausa d'unviern

La sesiun da ballapei digl onn 2021 ei terminada. Nus engraziein a tuts pils buns discuors, las bialas emoziuns ed il sustegn – seigi quei als giugs a casa ni era ordeifer! Tals aspectaturs e fans ein semplamein grondius!

Nus selegrein gia ussa da puspei seveser sil plaz da bal la primavera 2022!

trun/rabius cun ferma prestaziun collectiva

Grondiusa entschatta per Trun/Rabius ad Uznach! La lontschetta gronda dall’ura ha buc dumignau d’ir treis ga entuorn che Gianin Derungs sa vegnir frenaus ella da sedisch mo cun in foul. Patrizio Decurtins surpren la responsabladad e sieta il penalti plazzau e ferm e cheutras l’equipa dalla Cadi en avantatg. Suenter che Patrizio haveva aunc falliu la davosa fin d’jamna il penalti encunter Landquart meretta quella decisiun dad el da surprender ulteriuramein la responsabladad ton pli respect. Silsuenter ei la partida fetg ulivada. Il schliet plaz fa buc sempel allas duas squadras da dar in ballapei cultivau. Las meglieras schanzas ellas empremas 45 minutas s’audan a Trun/Rabius, mo Valerio Marsicovetere liberescha duas ga enteifer paucas secundas siets ord cuorta distanza da Gianin Derungs e Silvan Muoth. Senter il te surpren Uznach pli e pli la bitgetta. Ella 64. minuta schula igl arbiter in penalti giustificau per l’equipa da casa, mo Mauricio Cathomas ei en fuorma quei di e tegn il siet. Mo l’equipa dil cantun S. Gagl smacca vinavon ed ella 73. minuta capetta ei; Simon Steiner egalisescha la partida. La risposta dil CBTR ei denton brutala. Gnanc ina minuta pli tard aulza Gianin Derungs il resultat sin 1:2. Quei gol vegn exact el dretg mument e frenescha l’euforia dad Uznach. L’equipa da casa betta uss tut anavon. Mo Trun/Rabius muossa ina ferma partida defensiva e tegn il resultat, anzi; ella 93. minuta metscha Remo Alig e sieta il tierz gol per Trun/Rabius. Quei ei lu era gest il resultat final. Grazia ad ina ferma prestaziun collectiva mantegn Trun/Rabius aschia il contact cugl emprem tierz dalla tabella.

 

informaziuns: 3. ligia – gruppa 1; Uznach - Trun/Rabius 1:3 (0:1); Sportplatz, Uznach – 120 aspectaturAs

gols: 3. Patrizio Decurtins 0:1 (penalti), 73. Simon Steiner 1:1, 74. Gianin Derungs 1:2, 93. Remo Alig 1:3

Trun/Rabius: Mauricio Cathomas; Mirco Pfister, Livio Janka, Ramon Orlik, Sandro Orlik; Daniel Pfister (56. Remo Alig), Mathias Flepp, Silvan Muoth (59. Denis Monn), Clau Berther (64. Salvatore Stagliano); Patrizio Decurtins (85. Clau Berther), Gianin Derungs (75. Fabio Caduff)

Uznach: Valerio Marsicovetere; Simon Steiner, Andrin Widmer, Besar Abdi, Pascal Bochsler; René Mettler, Remzi Januzi, Bajram Elezi, Timo Petrizzo; Philipp Steiner, Jan Kuster

remarcas: Trun/Rabius senza Beat Cadruvi, Orlando Monn, Damian Schmed

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch