proxims giugs digl atun 2021

3. ligia:  24-10-2021, 15:00 a Pustget CB Trun/Rabius 1 Grp. - FC Landquart 1
4. ligia: 20-10-2021, 20:15 a Mutteins US Danis-Tavanasa 2 Grp. - US Schluein Glion 2

festival da gols a pustget

Trun/Rabius Grp. 1 petga Sargans suenter ina ferma prestaziun cun 6:3.

Pil secund davos giug dalla sesiun ha Trun/Rabius beneventau l’equipa da Sargans a Pustget. Suenter duas terradas stretgas en seria ein ils Sursilvans urgentamein stai dependents da puncts el cumbat encunter la relegaziun. 

Il start ella partida gartegia insumma buca sco giavischau al caucasa. Suenter endisch minutas ed in culp liber vegn il defensur central da Sargans nunsurvigilaus vid il bal e plazzescha quel cun ina ferma tgaua ella reit. Ina duscha freida per Trun/Rabius che reagescha denton spert e vehement. Mo quater minutas suenter il 0:1 egualisescha Patrizio Decurtins suenter in bi pass ella gassa da Salvatore Staglianò. Ed ils proxims gols laian buca spitgar ditg: In culp liber da Livio Janka ord rodund 40(!) meters fila sper tut ils giugadurs ella da sedisch vi e setschenta via petga directamein el gol. Ella 30avla minuta san ils aspectaturs da casa gia selegrar la tiarza ga: Suenter ina situaziun nunsurveseivla sill’ala seniastra vegn il bal ella da sedisch nua che Salvatore Staglianò vegn d’alzar il bal cul péz sur il goli ô – 3:1. En quella fasa dil giug cumbinescha l’equipa da casa bein e spert encunter anavon, ha in surpli amiez e vegn tras dus siets da distanza da Daniel Pfister ed Orlando Monn era aunc tier ulteriuras bunas occasiuns da gol.

Schegie ch’ils hosps da Sargans vegnan cun pli bia energia ord la cabina eis ei vinavon Trun/Rabius che dat en il tact. Ella 52avla minuta lantschescha Patrizio Decurtins siu congiugadur Salvatore Staglianò che marchescha suenter in liung sprint il secund gol persunal. Il giug ei denton aunc buc decidius, ils hosps songaglies scursaneschan immediat sin 4:2. Denton era il secund cuntergol vegn quella dumengia buca d’irritar l’equipa sursilvana. Anzi, Trun/Rabius vegn aunc da marcar dus ulteriurs gols: Schebein il tschunavel, sco era il sisavel gol dil caucasa capetan suenter in bal ch’il goli dils hosps ha schau rebatter: Patrizio Decurtins e Remo Alig ein leu nua ch’ils attacaders ston esser ed han mintgamai buca grondas breigias da stuschar il bal ella reit. Il 6:3 da Sargans cuort avon la fin ei lu mo pli cosmetica dil resultat.

L’equipa dalla Cadi ha acceptau il cumbat encunter la relegaziun e propi saviu perschuader, buca mo quei che pertucca igl engaschi mobein era cun bialas cumbinaziuns e dabia gols. Cun quels treis puncts dapli sil conto sesanfla l’equipa da Donat Albin e Philippe Vincenz uss sur il streh ella tabella. Il giug capital stat denton pér avon porta. Proxima sonda serenda il CB Trun/Rabius Grp. 1 a Gams e dat leu per restar en 3. ligia. In punct tonscha als Sursilvans, ferton ch’il direct concurrent da Gams drova exnum la victoria. Sch’ils giugadurs vegnan da purtar la medema prestaziun sil plaz sco la dumengia vargada, duess quei era esser pusseivel.

 

informaziuns: 3. ligia, gruppa 1; CB Trun/Rabius  – FC Sargans 6:3 (3:1); Pustget, Trun – ca. 170 aspectaturs

gols: 11’ 0:1 David Becker, 15’ 1:1 Patrizio Decurtins, 22’ 2:1 Livio Janka, 30’ 3:1 Salvatore Staglianó, 52’ 4:1 Salvatore Staglianó, 55’ 4:2 Valentino Zollino, 63’ 5:2 Patrizio Decurtins, 87’ 6:2 Remo Alig, 88’ Marco Walser 6:3

CB Trun/Rabius 1 Grp. (4-4-2): Mauricio Cathomas, Sandro Orlik, Livio Janka, Gion Andrea Nay (78’ Denis Monn), Fabian Cajacob (C), Orlando Monn (46’ Clau Berther), Beat Cadruvi, Mathias Flepp, Daniel Pfister (60’ Remo Alig), Salvatore Staglianó (60’ Gianin Derungs), Patrizio Decurtins (68’ Fabio Caduff)

FC Sargans 1 (4-3-3): Sandro Walser, Sven Mathis (63’ Nico Wickli), David Becker, Benjamin Weber, Fabian Schai (67’ Marc Bernhardsgrütter), Raphael Kalberer (C), Luis Dos Reis Guerreiro (46’ Ronny Schumacher), Kevin Willi, Marco Giordano (72’ Magnus Hofmann), Marco Walser, Valentino Zollino

remarcas: cartas melnas: 10’ Livio Janka, 49’ Salvatore Staglianó, 66’ Sandro Orlik, 85’ Benjamin Weber (tuttas per foul) – corners: Trun: 3, Sargans: 3. – CB Trun/Rabius 1 Grp. senza Jonas Beer e Damian Schmed

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch