proxims giugs digl atun 2021

3. ligia:  24-10-2021, 15:00 a Pustget CB Trun/Rabius 1 Grp. - FC Landquart 1
4. ligia: 20-10-2021, 20:15 a Mutteins US Danis-Tavanasa 2 Grp. - US Schluein Glion 2

ina situaziun da standard decida

Trun/Rabius cumbatta, lai denton ils puncts a Landquart.

La partida el stadion Ried entscheiva bufatg. Landquart ei ina equipa giuvna cun entgins sperts giugadurs sin l’ala, perquei vala ei l’entschatta per l’equipa dalla Cadi da star cumpacta e d’anflar ella partida. La temperatura aulta procura ch’il tempo dil giug ei plitost mudests. Las defensiuns d’omisduas equipas stattan segiras aschia ch’ei dat buc biaras acziuns avon il golis Mauricio Cathomas e Jonas Mayer. Encunter la fin dall’emprema mesadad vegn Landquart denton in tec meglier el giug e cheutras quater minutas avon pausa era tier igl 1:0. In giugadur da Landquart metscha dalla ala giu e dat in precis e ferm pass atras la da sedisch. Davide Oertle ei postaus el dretg liug ed ha aschia negin problem da stuschar il bal ella reit.

Il CB Trun/Rabius anfla suenter pausa meglier e meglier ella partida e vegn uss da tener dapli il bal en sias retschas. Ella 64. minuta fa Mathias Flepp ina biala midada da vart sin Salvatore. Salvatore Staglianò cuora persuls encunter il goli, metta il bal sper lez ô e setta igl emprem gol per Trun/Rabius. Quei dat aunc inaga dapli curascha als hosps ed uss han ils observaders il sentiment che Trun/Rabius savess ir per quels impurtonts puncts. Mo paucas minutas pli tard rumpa Pascal Martin cun ina biala tgaua suenter ina corna quella euforia. Per Trun/Rabius resta ei denton nuot auter che da puspei star sin peis e cumbattar vinavon per ils puncts. E quei fan ils giugadurs era. Cunzun Clau Berther vegn cun in bellezia siet ord 20 meter tier la megliera acziun. Mo Jonas Mayer fa ina grondiusa parada e stenscha aschia ils gibels gia semtgai tier ils hosps. Sco igl ei tier in tal resultat betta Trun/Rabius encunter la fin tut anavon, quei che dat naturalmein era pusseivladads per conters. Aschia ei la partida fetg animanda ed interessanta – denton adina faira – e cuosta era in pèr unglas als aspectaturs. A Trun/Rabius gartegia ei denton buc d’egualisar, aschia ch’ils 3 puncts restan a Landquart.

Igl ei stau ina partida péz a cup e Trun/Rabius havess suenter quellas 90 minutas era saviu turnar cun puncts a casa. Mo igl ei sco igl ei cu ins ei giudem la tabella. Per Trun/Rabius resta uss nuot auter che d’emblidar quella partida e da sefocusar immediat sin il proxim giug a Pustget encunter Sargans.   

 

informaziuns: 3. ligia, gruppa 1; FC Landquart – CB Trun/Rabius 2:1 (1:0); Stadion Ried, Landquart – 60 aspectaturs

gols: 41. Davide Oertle 1:0, 64. Salvatore Staglianò 1:1, 69. Pascal Martin 2:1

Trun/Rabius: Mauricio Cathomas; Fabian Cajacob (72. Damian Schmed), Gion Andrea Nay, Livio Janka, Sandro Orlik (79. Gianin Derungs); Orlando Monn, Mathias Flepp, Denis Monn (72. Beat Cadruvi), Daniel Pfister (57. Fabio Caduff), Salvatore Staglianò, Gianin Derungs (46. Clau Berther)

Landquart: Jonas Mayer; Ramun Endres, Marco Mittner, Davide Oertle, Andrin Möhr; Pascal Martin, Christoph Maurer, Sandro da Costa Rodrigues, Silvan Roffler; Renato Oswald, Mirco Fausch

remarcas: Trun/Rabius senza: Jonas Beer, Patrizio Decurtins, Remo Alig. Cartas mellnas: Trun/Rabius 0, Landquart 2

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch