pausa d'unviern

Muort il virus da corona ei la sesiun d'atun 2020 vegnida strihada. Nus sevesein speronza puspei la primavera 2021 sil plaz da bal! 

dabia schanzas – negins gols

Pil siatavel giug dalla sesiun ha Trun/Rabius astgau beneventar l’equipa da Buchs a Pustget. Suenter haver giu gudignau il davos giug encunter Tusaun ha l’equipa dalla Cadi saviu ir cun confidonza el giug, savend denton che l’equipa da Buchs gioga davontier en quella tiarza ligia.

L’emprema mes’ura dil giug schabegia pauc commemorabel. Sulet in culp liber da Livio Janka ella 12avla minuta caschuna in tec prighel. Igl adversari da Buchs vegn denton era buca da crear schanzas, en emprema lingia ei quei il meret dil secuntener defensiv solid dil caucasa. Cuort avon pausa vegn Trun/Rabius lu tuttina aunc tier ina excellenta schanza. Gianin Derungs vegn suenter ina malcapientscha ella defensiun da Buchs vid il bal e tila ina lingia persuls viers gol. Il goli Dario Caluori reaghescha denton spert, cuora viadora e parescha il siet digl attaccader. 

Era cuort suenter pausa vegn l’equipa sursilvana tier ina fetg buna occasiun. Gianin Derungs stauscha tier ina cunterattaca il bal avon il gol, nua che Orlando Monn vegn da sittar directamein il bal cul pei seniester. Il siet munchenta denton la finamira. Ella 67avla minuta vegn plinavon il capitani Sandro Orlik tier ina buna schanza, quei suenter in bi pass el dies dalla defensiun. Quei siet ei denton memia pauc plazzaus e vegn paraus dil goli. En quella fasa dil giug vegnan denton era ils attaccaders da Buchs adina puspei prigulus avon il gol. La pli prigulus’acziun ei in siet da distanza plazzau, tier il qual il goli Mauricio Cathomas sto mussar si’entira classa per deviar il bal sur la traversa. Ord vesta da Trun/Rabius vegn Mathias Flepp aunc tier ina buna schanza da gol cul tgau, mo era quell’emprova anfla buc la via ella reit. Las davosas diesch minutas dil giug s’audan lu diltuttafatg als hosps da Buchs che smaccan ti mordio e munchentan ina gronda schanza suenter l’autra. La finfinala resta ei tiel 0:0.

L’equipa dalla Cadi sto bunamein esser cuntenta cun quei punct. Schegie ch’ins ha sez giu enqual buna schanza da gol; ils hosps da Buchs vessen stuiu marcar in gol las davosas minutas. Positiv ei segir il fatg ch’ins ha il secund giug en seria teniu la nulla davostier. Las schanzas da gol val’ei denton da nezegiar meglier ils proxims giugs. Cunquei ch’ils directs concurrents Tusaun e Gams han gudignau lur giugs ei il CB Trun/Rabius uss cun in punct disavantatg sut il streh. Ton pli impurtont fuss ei da recaltgar puncts els dus giugs da quest’jamna, mesjamna sera encunter Landquart e sonda encunter ils davos dalla tabella, Cuera II.

 

informaziuns: 3. ligia, gruppa 1;  CB Trun/Rabius  – FC Buchs 0:0 (0:0); Pustget, Trun – ca. 220 aspectaturs

CB Trun/Rabius 1 Grp. (4-2-3-1): Mauricio Cathomas, Sandro Orlik (C), Livio Janka, Gion Andrea Nay, Damian Schmed, Denis Monn, Mathias Flepp, Orlando Monn (82’ Clau Berther), Fabio Caduff (65’ Salvatore Staglianó), Patrizio Decurtins (86’ Beat Cadruvi), Gianin Derungs (61’ Remo Alig) 

FC Buchs 1 (4-4-2): Dario Caluori, Armando Heeb, Ramon Solinger (46’ Ivan Quintans), Fabio Ventura, Aulon Rexhepi (32’ Mentor Memeti), Cyrill Schlegel, Matheus Ferreira Gastardo (32’ Daniel Varela Pereira), Brian Allen, Han Ünlü Tolga, Adnan Mutapcija, Kevin Rohrer (C) 

remarcas: cartas melnas: 43’ Gianin Derungs (reclamar), 44’ Han Ünlü Tolga (sittar naven il bal), 45’ Gion Andrea Nay (sittar naven il bal), 86’ Clau Berther (reclamar) – corners: Trun: 2, Buchs: 7. – CB Trun/Rabius 1 Grp. senza Jonas Beer, Daniel Monn e Daniel Pfister

 

 

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch