proxims giugs

3. ligia:  24-10-2020, 18:00 a Cuera FC Cuera 97 II CB Trun/Rabius I Grp.
3. ligia: 21-10-2020, 20:15 a Landquart FC Landquart I - CB Trun/Rabius I Grp.
4. ligia:  24-10-2020, 18:00 a Schluein US Schluein Glion II - US Danis-Tavanasa II Grp.
5. ligia:  24-10-2020, 16:00 a Rueun US Rueun I - CB Trun/Rabius IIIa Grp.

l’emprema victoria per trun/rabius

Trun/Rabius gudogna ina partida intensiva e suenter bia cumbat cun 2:0 encunter Tusaun-Cazas.

Il CB Trun/Rabius dat a Mutteins ed ils aspectaturs a Tavanasa sustegnan cun tut engaschi il vegl rival. Quei che havess tunau aunc dacuort sco ina sgnocca e fuss buca stau da s’imaginar ei uss pusseivel entras la gruppaziun denter Trun/Rabius e Danis-Tavanasa. In bi diember d’aspectaturs vesa beinspert ch’ei va en quella partida per dapli che mo pils 3 puncts. Cun Tusaun-Cazas spetga numnadamein in’equipa ch’ei - sco il CB T/R - rangada el davos tierz dalla tabella. Tgunsch ord quei motiv ei il giug gia naven dall’entschatta in pulit cumbat. Avon pausa ei la partida fetg uliva, ad omisduas equipas gartegia ei denton buc da crear claras schanzas ed aschia van las duas squadras cun haver sittau negins gols ella pausa.

A Tusaun-Cazas para il te da pausa dad haver gustau meglier. Ils hosps surprendan numnadamein cun pulita vehemenza la bitgetta dil giug e smaccan anavos ella defensiun l’equipa da casa. En quella fasa dil giug dominescha Tusaun clar la partida ed il CB T/R vegn mo da sedefender. Denton sto ei era vegnir notau che claras schanzas seresultan buc ord quella fasa da squetsch. Ella 73. minuta capeta lu zatgei spectacular. Patrizio Decurtins vegn tier il bal, vesa ch’il goli da Tusaun ei per lunsch ord gol ed aulza ord 40 meters il bal sur tal ora ellas maschas. 1:0 per Trun/Rabiu –, schi da dir ord il nuot. Quei gol dat anavos la curascha all’equipa da casa e vilenta pulit ils hosps. Ils cumbats vegnan menai uss cun aunc dapli intensitad, quei che seresulta alla fin dil giug en dabia cartas melnas. Pli ditg ch’il giug va e pli fetg che Tusaun-Cazas enquera l’offensiva, quei che possibilitescha a Trun/Rabius da vegnir tier conters. Fabio Caduff vegn tier ina tala pusseivladad paucas minutas avon la fin, emprova da cuglienar il goli, vegn denton frenaus da tal cun in foul. Penalti per Trun/Rabius! Tals aspectaturs ch’han aunc si las unglas piardan sil pli tard uss ellas. Capitani Patrizio Decurtins surdat al giubilar Daniel Monn il bal per aschia possibilitar ad el in bi schenghetg da natalezi. E Daniel Monn lai buc supplicar duas ga. A moda suverana aulza el il resultat sin 2:0 e procura aschia per la decisiun.

Trun/Rabius ha gues schon muossau meglieras prestaziuns, denton ein ils treis puncts ed aschia l’emprema victoria il pli impurtont ella fasa actuala.

 

informaziuns: 3. ligia, gruppa 1; CB Trun/Rabius – FC Thusis-Cazis 2:0 (0:0); Mutteins, Tavanasa. – 150 aspectaturs

gols: 73. Patrizio Decurtins 1:0, 90. Daniel Monn (penalti) 2:0

Trun/Rabius: Mauricio Cathomas; Daniel Pfister (41. Denis Monn), Gion Andrea Nay, Damian Schmed, Sandro Orlik; Orlando Monn, Beat Cadruvi, Livio Janka (64. Mathias Flepp), Remo Alig (86. Daniel Monn); Patrizio Decurtins, Gianin Derungs (73. Fabio Caduff)

Thusis-Cazis: Ramon Noll; Dario Rüedi, Thomas Kienast, Aaron Patt, Lucas Riedhauser; Luca Michael, Nico Bundi, Vendim Gashi, Andrin Brenn; Domenik Manka, Robin Tillessen

remarcas: Trun/Rabius senza: Salvatore Stagliano, Clau Berther, Fabian Cajacob, Jonas Beer. cartas melnas: Trun/Rabius 3, Thusis-Cazis 6

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch