proxims giugs

3. ligia:  24-10-2020, 18:00 a Cuera FC Cuera 97 II CB Trun/Rabius I Grp.
3. ligia: 21-10-2020, 20:15 a Landquart FC Landquart I - CB Trun/Rabius I Grp.
4. ligia:  24-10-2020, 18:00 a Schluein US Schluein Glion II - US Danis-Tavanasa II Grp.
5. ligia:  24-10-2020, 16:00 a Rueun US Rueun I - CB Trun/Rabius IIIa Grp.

empau discletg il mument

En ina partida intensiva spiarda Trun/Rabius a Brusio cun 0:1 encunter Puschlav.

Giugs ella Val Puschlav ein adina specials. Varga 5 uras viadi per saver dar 90 minutas ballapei ei en mintga cass unic e tgunsch mo pusseivel el cantun Grischun. Vitier vegn che la Valposchiavo Calcio ei tradiziunalmein fetg ferma a casa, quei che fa adina aunc empau pli grev il viadi tier ils vischins el sid da nies cantun. Da quei fatg era l’equipa da Trun/Rabius pertscharta e tgunsch gest ord quels motivs era dall’entschatta motivada dad ir per puncts.

L’emprema schanza dil giug s’auda lu era all’equipa dalla Cadi. Daniel Pfister vegn suenter 5 minutas lantschaus sill’ala seniastra, mo fallescha il gol ord buna posiziun. Insumma ha Trun/Rabius ella emprema mes’ura dapli dil giug e dat curaschus. Las duas defensiuns dattan denton concentrau e laian strusch tier schanzas, aschia ch’il giug ei tut en tut fetg intensivs ed ulivs. Il davos quart’ura s’auda plitost all’equipa da casa, denton reusesscha ei era buc a Puschlav da vegnir tier claras schanzas.

Suenter il te da pausa sepresenta la partida fetg semeglionta all’emprema mesadad. Ei vegn cumbattiu per mintga bal e las duas equipas neutraliseschan ina l’autra. Beinspert eisi veseivel che quell’equipa che va en avantatg savess era gest gudignar il giug. O dil nuot vegn la Valposchiavo Calcio ella 66. minuta tier in penalti. Igl attaccader da Puschlav enquera il foul ed il defensur dil CB T/R schula en sin quella fenta, aschia ch’igl arbiter sa far nuot auter che da schular penalti. Mauricio Cathomas parescha il penalti, denton vegn Mattia Cathieni sco emprem vid il bal rebattiu e marca il gol per Puschlav.

Trun/Rabius drova buc ditg da serevegnir da quei schoc ed emprova puspei da prender la partida entamaun. Ei gartegia da smaccar anavos l’equipa da casa, mo claras schanzas seresultan buc, tochen – gie tochen – che trenader/giugadur Philippe Vincenz vegn ella davosa minuta tier in bellezia siet ord 18 meters, mo quei siet anfla buc la via el nez mobein va ella petga e procura per empau cavels grischs dapli tier trenaders e giugadurs. Cuort suenter schula igl arbiter giu il giug.

Trun/Rabius ha mussau a Puschlav ina prestaziun engaschada e motivada ed havess en tutta cass meritau da turnar cun puncts. Cun empau dapli cletg fuss il davos siet ius ella reit e buc ella petga, mo actual maunca il cletg empau ed aschia era ils puncts. Denton fa la prestaziun curascha e tschontscha persuenter ch’il CB T/R vegn zacu era ad ir pils puncts necessaris.

 

informaziuns: 3. ligia, gruppa 1; AC Valposchiavo Calcio – CB Trun/Rabius 1:0 (0:0), Casai, Campascio. – 70 aspectaturs

gols: 66. Mattia Cathieni 1:0

Trun/Rabius: Mauricio Cathomas; Fabian Cajacob (85. Philippe Vincenz), Livio Janka, Damian Schmed, Sandro Orlik; Daniel Pfister, Fabio Caduff (79. Daniel Monn), Mathias Flepp, Clau Berther; Salvatore Stagliano (58. Jonas Beer), Gianin Derungs

Valposchiavo: Omar Viviani; Luca Cristiano, Alessandro Fiorina, Massimiliano Fiorina, Saran Rampa (89. Nakarin Phatphuang); Mattia Cathieni (85. Daniele Rossi), Valerio Plozza, Oscar Cortesi (69. Danilo Menghini), Nakarin Phatphuang (80. Paolo Nogheredo); Kamal Siate (60. Gion Cortesi), Nicolo Pola

remarcas: Trun/Rabius senza: Orlando Monn, Denis Monn, Gion Andrea Nay, Patrizio Decurtins, Beat Cadruvi, Remo Alig. Cartas melnas: Trun/Rabius 1, Valposchiavo 2

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch