pausa d'unviern

Muort il virus da corona ei la sesiun d'atun 2020 vegnida strihada. Nus sevesein speronza puspei la primavera 2021 sil plaz da bal! 

negins gols per l'entschatta

L'entschatta dil campiunadi da primavera gartegia buca tenor giavisch all'emprema equipa dil CB. Malgrad ch'ils giugadurs domineschan la plipart dil giug e capeschan da crear bunas schanzas da sittar gols, oravontut duront la secunda mesadad, reussescha ei buc ad els da surmuntar il goli da Domat. Cunquei ch'era igl adversari marchescha negins gols finescha il giug 0:0. 

Suenter ina liunga pausa d'unviern ed ina per gronda part buna preparaziun entscheiva l'equipa da Renzo Albin, Carlo Tuor e Markus Steiner il campiunadi da primavera, quei encunter Domat. Cun sulettamein 14 puncts ord ils 10 giugs dalla sesiun d'atun e rang 8 ella tabella ein ils giugadurs empau sut squetsch da prestaziun. Malgrad ch'ins senta la nervusadad d'enqual giugadur entras sbagls individuals oravontut duront la fasa d'entschatta, vegn l'equipa da sepigliar suenter in mument. 

Duront l'emprema mes'ura ei il giug pulit ulivaus. Omisduas equipas vegnan tscheu e leu tier schanzas, perschuadan denton buca cun lur sistem da giug. Domat emprova savens cun bals liungs, ils quals vegnan per part malsegirs cun agid dil vent. A Trun/Rabius maunca tscheu e leu la forza da rumper atras e las ideas - tuttina reussescha ei denteren ad in giugadur ni l'auter da mitschar. Aschia vegnan Dani Monn e Patrizio Decurtins tier duas situaziuns ch'els stattan persuls avon il goli, vegnan denton buca da marcar il gol. Cun quei resta ei tier il 0:0 da pausa. 

Suenter pausa dat l'equipa dil CB a moda pli perschuadenta. La finamira ei clara - ins vul gudignar il giug! Aschia reussescha ei a Trun/Rabius da tener il bal la plipart dil temps ella mesadad digl adversari. Cun bunas cumbinaziuns e bials pass ellas gassas vegnan ils attaccaders tier fetg bunas schanzas ed ei maunca magari pauc per astgar giubilar. Il goli da Domat muossa en talas situaziuns bialas paradas e procura per desperaziun tier l'equipa da casa. Domat sez vegn mo sporadicamein tier entginas schanzas. La defensiun da Trun/Rabius muossa ina relativamein solida prestaziun e lai tier pauc, malgrad entginas malcapientschas all'entschatta. Schegie ch'il CB dominescha e creescha bia pusseivladads da marcar in gol, damognan els buc il bal ella reit digl adversari. Aschia ston ils giugadurs bandunar il plaz cun in 0:0. 

L'emprema equipa sa segiramein esser cuntenta cul fatg ch'ella ha creau bia schanzas da gol. Da l'auter maun vala ei denton segiramein da migliurar la quota da nezegiar las schanzas e da far quels gols! Aunc uss ei nuot spiars - denton era nuot gudignau. 

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch