proxims giugs

3. ligia:  24-10-2020, 18:00 a Cuera FC Cuera 97 II CB Trun/Rabius I Grp.
3. ligia: 21-10-2020, 20:15 a Landquart FC Landquart I - CB Trun/Rabius I Grp.
4. ligia:  24-10-2020, 18:00 a Schluein US Schluein Glion II - US Danis-Tavanasa II Grp.
5. ligia:  24-10-2020, 16:00 a Rueun US Rueun I - CB Trun/Rabius IIIa Grp.

schluein-glion ina runda vinavon

En in giug ulivau gudogna Schluein Glion a Pustget encunter Trun/Rabius cun 2:0.

Sche las duas meglieras equipas sursilvanas cloman sche serimna la Surselva. In grond pievel dat suatientscha all’invitaziun da persequitar la partida dil cup svizzer denter il CB Trun/Rabius e la US Schluein-Glion. Sin pupi ina interessanta affischa, denton tegn il giug las empremas 45 minutas buc quei ch’el empermetta. Ad omisduas equipas ein ils giugs duront l’jamna veseivels, aschia ch’il tempo dalla partida ei plitost mudests ed ei vala en emprema lingia da buc gia duvrar damemia energia. L’emprema buna schanza s’auda suenter biebein 11 minutas all’equipa da casa. Mo cuort suenter tala va Schluein-Glion en avantatg. Adrian Zimmermann setta igl emprem gol per la USSI. L’equipa dalla Foppa surpren plaunet la bitgetta dil giug e vegn cunzun cun cumbinaziuns sur las alas tier bunas caschuns. Ina da quellas meina ella 36. minuta – danovamein entras Adrian Zimmermann – al 0:2.

Suenter pausa sepresenta in auter giug. Il CB Trun/Rabius para da ver giu in bien te da pausa e vegn pli animaus ord cabina. Gia suenter duas minutas vegn Remo Alig tier ina fetg buna schanza pil CB T/R, David Hornacek liberescha denton cun ina grondiusa reacziun. L’equipa da casa pren uss pli e pli las hottas enta maun ed entscheiva a dominar il giug. Il bal circulescha bein ellas atgnas retschas, aschia ch’ei gartegia all’equipa da casa da controllar la partida. Las schanzas vegnan denton buc nezegiadas quei di a Pustget. E cunquei ch’era Schluein-Glion nezegia buc ina da lur pusseivladads suenter conters va la partida alla fin cun il medem resultat sco da pausa.

Las duas equipas han buc saviu snegar ch’ei mava en quella partida en emprema lingia per buc seblessar e duvrar damemia energia, beinsavend dil program intensiv che spetga las duas equipas dalla Surselva las proximas jamnas. Tuttina han ils aspectaturs astgau guder cunzun ella secunda mesadad ina partida animada ed ulivada e tut en tut eis ei stau ina biala sentupada dils amaturs dil ballapei sursilvans quei di a Trun/Pustget.

 

informaziuns: Cup svizzer; CB Trun/Rabius – US Schluein Glion 0:2 (0:2); Pustget, Trun. – 270 aspectaturs

gols: 14. Adrian Zimmermann 0:1, 36. Adrian Zimmermann 0:2  

Trun/Rabius: Mauro Alig; Daniel Pfister, Livio Janka, Mathias Flepp, Sandro Orlik; Denis Monn (81. Daniel Monn); Beat Cadruvi, Clau Berther (84. Rovin Schmed), Remo Alig; Salvatore Stagliano, Jonas Beer (67. Kevin Albin)

Schluein-Glion: David Hornacek; Luzi Dermont, Matthias Derungs (82. Martin Egger), Gianluca Casutt, Sergio Welter (76. Aron Büchler); Livio Derungs, Serafin Bundi, Nico D Atria; Adrian Zimmermann, Girom Affolter (74. Sven Brasser), Tiziano Vinzens (67. Joel Cabalzar)

remarcas: Trun/Rabius senza: Orlando Monn, Gianin Derungs, Fabio Caduff, Damian Schmed, Gion Andrea Nay, Patrizio Decurtins, Fabian Cajacob; Schluein-Glion senza: Flurin Capaul, Luca Vinzens, Gian Sgier; cartas melnas: Trun/Rabius 2, Schluein Glion 1

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch