proxims giugs

3. ligia:  24-10-2020, 18:00 a Cuera FC Cuera 97 II CB Trun/Rabius I Grp.
3. ligia: 21-10-2020, 20:15 a Landquart FC Landquart I - CB Trun/Rabius I Grp.
4. ligia:  24-10-2020, 18:00 a Schluein US Schluein Glion II - US Danis-Tavanasa II Grp.
5. ligia:  24-10-2020, 16:00 a Rueun US Rueun I - CB Trun/Rabius IIIa Grp.

dau giu dus puncts ella davosa secunda

L’equipa favorisada da Bogn Ragaz emprova gest l’entschatta da metter sut squetsch Trun/Rabius cun attaccar ella incuntin. L’equipa da casa ha denton spitgau quei squetsch e seriscuda dètg bein, aschia ch’ei dat gia dall’entschatta ina partida animada.

Ella 11. minuta vegn scret historia a Pustget. Suenter in bi pass da Daniel Pfister marca Mathias Flepp numnadamein igl 1:0 per il CB T/R. Historic muort che quei ei igl emprem gol da campiunadi d’in giugadur da Tavanasa per la nova gruppaziun dallas duas uniuns. Gie, ins auda schizun in fan a clamond “Hopp Tavanasa” suenter quell’acziun. In clom che havess avon paucs onns aunc caschunau ina ferma cunterpeisa dils fans da Trun/Rabius procura uss per in surrir tier tut ils aspectaturs. Suenter quei gol aulza l’equipa songagliesa aunc inaga il tempo ed il squetsch. Cheutras vegn Bogn Ragaz d’egalisar ella 30. minuta entras ina biala tgaua da Chiavaro el cantun liung. Bogn Ragaz dominescha uss vinavon il giug, entochen pausa semida denton nuot vid il resultat.

Ils trenaders dil CB T/R reageschan sin quei squetsch massiv da Bogn Ragaz e midan sistem per aschia dar dapli cunterpeisa. Quei para buc dad esser stau la fallida decisiun cunquei che l’equipa da casa va beingleiti danovamein en avantatg. Patrizio Decurtins vegn lantschaus da Salvatore Staglianò e setta a moda freida el cantun liung il 2:1 per Trun/Rabius. Il CB T/R vegn uss da sedefender meglier encunter il ferm squetsch da Bogn Ragaz e fa grev agl adversari da vegnir tier schanzas. Gie, ella 77. minuta sedat schizun la schanza d’alzar il resultat sin 3:1. Il giugadur da Trun/Rabius vegn denton ord fetg buna posiziun buc da controllar spert avunda il bal. Paucas minutas pli tard ina buna schanza per Bogn Ragaz. Mauro Alig parescha denton ferm e tegn aschia igl avantatg.

La surpresa vegn pli e pli datier, damogna Trun/Rabius veramein Bogn Ragaz? Igl ei gia dau 93 minutas ch’ei vegn tier la decisiun fatala. Suenter in smugl schula igl arbiter penalti per Bogn Ragaz. Arbiter Kaan taxescha in salvament sco “hände”. Aunc quell’acziun epi ei il giug a fin, segir era in squetsch enorm pil giugadur. Thöny mantegn denton saung freid e metta il bal ella reit. Cun quei gol schula igl arbiter era gest giu la partida.

Ei il glas uss miez pleins ni miez vits? Igl ei in resultat ch’il CB T/R havess gues suttascret sche zatgi havess offeriu el avon la partida. Sch’ins ei denton aschi datier dad ils 3 puncts fa ei mal da survegnir ella davosa secunda quei gol.

Il campiunadi ruaussa uss. Per Trun/Rabius va ei vinavon cun il ¼-final dil cup Grischun mesjamna sera a Tavanasa encunter Tusaun/Cazis e cun il cup svizzer sonda a Pustget encunter Schluein/Glion.

 

informaziuns: 3. ligia, gruppa 1; CB Trun/Rabius 1 Grp. – FC Bad Ragaz 2:2 (1:1); Pustget, Trun. – 210 aspectaturs. – Arbiter: Özgen Kaan

gols: 11. Mathias Flepp 1:0, 30. Giuliano Chiavaro 1:1, 47. Patrizio Decurtins 2:1, 94. Nando Thöny (penalti)

Trun/Rabius I Grp.: Mauro Alig; Fabian Cajacob, Damian Schmed, Gion Andrea Nay, Sandro Orlik (74. Beat Cadruvi); Mathias Flepp, Denis Monn (46. Livio Janka); Clau Berther (82. Denis Monn), Salvatore Stagliano, Daniel Pfister; Patrizio Decurtins (67. Jonas Beer)

Bogn Ragaz I: Cardoso Teixeira Cristiano; Kressig Sandro, Roffler Anlan, In t Zand Nick, Belinger Dario; Näf Samuel, Caluori Orlando, Mühlebacj Marco; Bersorger Nando, Chiavaro Giuliano, Rauti Salvatore

remarcas: cartas melnas: Trun/Rabius 2, Bogn Ragaz 1

Trun/Rabius senza Caduff Fabio, Monn Orlando, Cathomas Mauricio, Derungs Gianin, Alig Remo, Monn Daniel, Nay Andri.

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch