proxims giugs

3. ligia:  26-09-2020, 17:30 a Puschlav Valposchiavo Calcio I - CB Trun/Rabius I Grp.
4. ligia:  26-09-2020, 17:00 a Cuera Cuera 97 III - US Danis-Tavanasa II Grp.
5. ligia:  27-09-2020, 16:00 uras a Rabius CB Union Trin I - CB Trun/Rabius IIIa Grp.

vilentau ils favorits – il cb tuorna cun in punct da domat

Tgi che ha persequitau la(s) davosa(s) sesiun(s) dil ballapei regiunal en Svizra orientala ha saviu ch’ei vegn in fetg grev secund giug dalla sesiun pil CB Trun/Rabius Grp. 1. Cul CB Domat spitgava numnadamein in dils – sche buc il – favorit per la promoziun. Dil davos rencontre direct silla plazza da sport Vial seregorda la squadra dalla Cadi nuota bugen. Gl’atun vargau veva Trun/Rabius numnadamein spiars claramein cun 5:1 e giu neginas schanzas. Per evitar aschia ina speridta han ils trenaders Donat Albin e Philippe Vincenz realisau entginas midadas en cumparegliaziun cugl emprem giug dalla sesiun: puncto sistem in tec pli defensiv da 4-2-3-1 tier 4-4-2 e puncto giugadurs buca meins che tschun novs els emprems endisch.

Strusch ha igl arbiter dau liber la partida ei gia peiver el giug. Suenter treis minutas metscha Clau Berther suenter in bi pass ella gassa da Salvatore Staglianò alla defensiun da Domat, vegn en buna posiziun da sittar, mo stauscha il bal cun siu pei fleivel sper la petga ora. Quasi culla cunterattacca vegn era il caucasa l’emprema ga prigulus avon gol. Il giugadur d’ala Lorenzo Cazzato tucca cun siu ferm siet denton mo la petga. Il CB Domat surpren sinaquei pli e pli fetg il dictat dil giug, controllescha il bal ellas atgnas retschas e stauscha siado pulit la defensiva. Quei pussibilitescha denton era singulas cunterattaccas. Ella 30avla minuta survegn Patrizio Decurtins in bal ella currida e tila cun tempo viaden ella da sedisch. Il defensur da Domat spera cun ina segada da contonscher il bal, tucca denton mo combas – in clar penalti. Tenor ina veglia sabientscha dil ballapei duess quel che ha rabitschau ora il penalti atgnamein buc sittar el. Igl attacader culla numera 11 fa denton buc feda da quei e realisescha il 0:1 pils hosps da Trun cun in siet plazzau el cantun bass. Buca treis turs dall’ura pli tard vegn il caucasa denton gia d’egualisar: Janique Gringer meina il bal sper dus defensurs vi e stauscha il bal ella reit. Domat dictescha vinavon il tempo e vegn avon pausa tier in’ulteriura buna occasiun da gol. Ella 40avla minuta evitescha il goli Flavio Schuoler suenter ina tgaua – che remplazza il goli da tschep blessau Maruricio Cathomas – cun in reflex il secund gol dil caucasa.

Suenter pausa vegn il CB Trun/Rabius beinspert tier duas bunas schanzas da gol. Clau Berther tucca cun in siet ord buna posiziun mo in cuntergiugadur e Mathias Flepp munchenta cuort pli tard mo per pauc la finamira cun sia tgaua. En tut priu eis ei denton vinavon il caucasa che dat en il tun. Domat vegn cunzun entras situaziuns da standard prigulus avon gol e da quellas dat ei ina pluna (buca meins che 12! corners en total). Ils hosps sursilvans paran denton d’haver turschau in bien betun ed il mir defensiv stat pli u meins adina stabils. Ella 86avla minuta sto il goli Flavio Schuoler tonaton in’ulteriura gada mussar sia classa sin lingia e deviescha in culp liber da Samir Limani sur la traversa. Schegie ch’ils giugadurs da Domat ein vegni tier enqual schanza, la megliera schanza da gol ella secunda mesadad s’auda aunc a Trun/Rabius cuort avon la fin. Patrizio Decurtins metscha cun sia spertatadad dall’ala seniastra si e stauscha il bal vi da tschella vart a Jonas Beer che munchenta ella 92avla minuta ord buna posiziun il "lucky punch".

La fin finala resta ei tiel pari; in pari che plai segiramein pli fetg als hosps che alla squadra da casa. Trun/Rabius ha meritau il punct cun ina prestaziun defensiva fetg disciplinada. Ina semeglionta prestaziun vegn ei tonaton era a duvrar il proxim giug da campiunadi. La dumengia vegnenta vegn cull’equipa da Bogn Ragaz numnadamein il leader da quella tiarza ligia sin viseta a Trun, Pustget.

 

informaziuns: 3. ligia, gruppa 1; CB Domat – CB Trun/Rabius 1:1 (1:1); Vial, Domat – ca. 140 aspectaturs 

gols: 30’ 0:1 Patrizio Decurtins, 33’ 1:1 Janique Gringer

CB Domat 1 (4-1-4-1): Nicola Hartmann, Mauro Caluori (C), Andri Hunger, Enes Salihagic, Michael Fabian Gross, Pierin Frizzoni, Hanan Beso (79’ Laruin Zala), Janique Gringer, Samir Limani, Lorenzo Cazzato, Davide Rosafio (60’ Mitko Gjorgjevski) 

CB Trun/Rabius 1 Grp. (4-4-2): Flavio Schuoler, Sandro Orlik, Damian Schmed, Gion Andrea Nay, Fabian Cajacob (C), Clau Berther (71’ Jonas Beer), Denis Monn (85’ Livio Janka), Salvatore Staglianó (79’ Patrizio Decurtins), Orlando Monn, Daniel Pfister, Patrizio Decurtins (45’ Mathias Flepp)

remarcas: cartas melnas: 53’ Samir Limani (reclamar), 61’ Hanan Beso (foul), 92’ Janique Gringer (reclamar) – corners: Domat: 12, Trun: 2. – CB Trun/Rabius 1 Grp. senza Remo Alig, Beat Cadruvi (catscha); Daniel Monn (reconvalescent); Fabio Caduff, Mauricio Cathomas, Gianin Derungs (blessai)

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch