proxims giugs

3. ligia:  26-09-2020, 17:30 a Puschlav Valposchiavo Calcio I - CB Trun/Rabius I Grp.
4. ligia:  26-09-2020, 17:00 a Cuera Cuera 97 III - US Danis-Tavanasa II Grp.
5. ligia:  27-09-2020, 16:00 uras a Rabius CB Union Trin I - CB Trun/Rabius IIIa Grp.

ina duscha freida egl emprem giug

Suenter varga in miez onn pausa ha l’emprema equipa dil CB Trun/Rabius puspei astgau beneventar ses fans ad in giug da campiunadi da tiarza ligia – ed ina roscha aspectaturs ha anflau la via a Pustget. Grazia alla nova collaboraziun cull’US Danis/Tavanasa ei l’equipa dils trenaders Donat Albin e Philippe Vincenz, che haveva gl’onn vargau mussau dabia bunas prestaziuns, bein aunc inaga vegnida rinforzada. Aschi’astgavan ins esser spanegiai dalla fuorma da quella «nov’equipa» avon gl’emprem giug encunter Triesenberg, in adversari che ha bein ambiziuns da giugar davontier en tiarza ligia.

Cun ina formaziun da 4-2-3-1 e treis novs giugadurs «dall’USDT» naven dall’entschatta entscheiva il CB Trun/Rabius la sesiun da bal 2020/21. Gl’emprem quart d’ura dalla nova sesiun ei in tipic sondar in l’auter dallas duas equipas. Negin’equipa vul ughegiar zatgei pli extraordinari ed aschia vegn ei ni dad ina, ni da tschella vart tier in’acziun prigulusa. L’emprema agitaziun capeta lu ella 18avla minuta. Il giugadur d’ala Clau Berther cuora cul bal vid il pei cun tempo ella da sedisch e croda suenter in duel cul defensur. In’acziun dispiteivla, denton era buc in clar penalti. Quasi culla cunteracziun vegn Triesenberg tier lur emprem’acziun prigulusa e vegn da marcar il 0:1. Suenter in corner che la defensiun dil caucasa vegn buca da spedir naven endretg vegn il capitani dall’equipa dil Principadi vid il bal e plazzescha quel cun in ferm siet a bass el cantun liung. Trun/Rabius reagescha denton bein e vegn ella 25avla minuta tras in bi culp liber da Livio Janka tier ina buna schanza da gol. Mo schibein quei culp liber, sco era dus ulteriurs siets da distanza cuort pli tard da Daniel Pfister e Remo Alig, vegn il goli da Triesenberg da tener. Aschia va il caucasa cun in retard ella pausa.

Era suenter il te va ei in mument tochen ch’ei capeta enzatgei remarcabel. Ella 62avla minuta schula gl’arbiter lu denton in penalti per Triesenberg. Il spert attacader da Triesenberg era survargaus la defensiun ed il capitani dil caucasa, Fabian Cajacob, ha mo pli saviu segidar cun in foul. Ord endisch meters marcheschan ils hosps aschia il 0:2. Quei ei tgunsch stau il gol decisiv da quei giug. L’equipa da Triesenberg ha silsuenter zuar schau dabia posess dil bal alla squadra da casa, mo igl ei mai propi vegniu tier ina fasa da squetsch dil CB Trun/Rabius. Anzi, ils attacaders dils hosps han aunc treis gadas pudiu mitschar alla defensiun ed aschia alzau ellas davosas vegn minutas dil giug il resultat sin 0:5.

Aschia ha l’equipa dalla Cadi nuota s’imaginau il start. Igl ei ina duscha freida all’entschatta dalla nova sesiun en tiarza ligia, quei denton encunter in’adversari pulit ferm che ha defensiv buca schau tier las massas ed ell’offensiva nezegiau quasi mintg’occasiun da gol. La schanza pils emprems puncts suonda denton beingleiti: Proxima sonda sera retscheiva il CB Trun/Rabius 1 Grp. el secund giug dil campiunadi l’equipa da Tusaun/Cazas a Mutteins (Tavanasa). 

 

informaziuns: 3. ligia, gruppa 1; CB Trun/Rabius  – FC Triesenberg  0:5 (0:1); Pustget, Trun – ca. 220 aspectaturs.

gols: 20’ Rony Hanselmann 0:1, 62’ Julian Beck 0:2, 71’ Fabian Hilbe 0:3, 81’ Julian Beck 0:4, 83’ Cédric Chevalley 0:5

CB Trun/Rabius 1 Grp. (4-2-3-1): Mauricio Cathomas, Sandro Orlik (77’ Damian Schmed), Livio Janka, Gion Andrea Nay (80’ Denis Monn), Fabian Cajacob (C), Beat Cadruvi (46’ Salvatore Staglianó), Mathias Flepp, Clau Berther (74’ Jonas Beer), Daniel Pfister, Remo Alig, Patrizio Decurtins

FC Triesenberg 1 (3-4-3): Raffael Loosli, Sebastian Beck, Jonas Beck (58’ Julian Beck), Zivan Mitrovic (84’ Aladin Redzepi), Cédric Chevalley, Ricardo Maia de Sousa (86’ Pascal Foser), Nils Sprenger, Diego Mazzini (86’ Marco Neumann), Joel Scherrer, Fabian Hilbe (80’ Jonas Sprenger), Rony Hanselmann (C)

remarcas: Cartas melnas: 16’ Remo Alig (reclamar), 58’ Fabian Cajacob (foul), 69’ Julian Beck (sittar naven il bal) – Corners: Trun: 2, Triesenberg: 5. – CB Trun/Rabius 1 Grp. senza Fabio Caduff, Andri Nay, Orlando Monn (reconvalescents); Gianin Derungs, Daniel Monn (blessai)

 

 

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch