proxims giugs

3. ligia:  26-09-2020, 17:30 a Puschlav Valposchiavo Calcio I - CB Trun/Rabius I Grp.
4. ligia:  26-09-2020, 17:00 a Cuera Cuera 97 III - US Danis-Tavanasa II Grp.
5. ligia:  27-09-2020, 16:00 uras a Rabius CB Union Trin I - CB Trun/Rabius IIIa Grp.

sperdita buca necessaria ella capitala

Cun ina buna basa da treis giugs senza terrada serenda la squadra dil CB Trun/Rabius cun dabia confidonza viers la capitala dil cantun Grischun. Per Cuera 97 va ei per restar davon ella tabella, aschia ch’ils aspectaturs savevan esser spanegiai sin in’interessanta partida.

Da bellezi’aura d’atun ed avon in ton dapli aspectaturs dalla Cadi che dalla capitala dat igl arbiter liber il giug. La partida entscheiva ulivada; il respect dallas duas equipas ina da l’autra ei veseivels. Suenter 10 minutas denton la schanza per Trun/Rabius dad ir en avantatg: Clau Berther vegn lantschaus dall’ala dretga. Cun tempo va il giugadur ella da sedisch, enquera il pass traviers sin Patrizio Decurtins; deplorablamein vegn il bal lev memia anavos e Patrizio tucca buc endretg il bal, aschia ch’in giugadur da Cuera vegn aunc da liberar sin la lingia. Quella schanza para dad haver destadau l’equipa da casa. Paucas minutas pli tard vegn Cuera numnadamein tier in penalti. Il siet vegn ferm e plazzaus a bass, Mauro Alig ha denton ferdau la puorla e parescha il penalti, aschia ch’ei resta 0:0. Silsuenter ei la partida vinavon ulivada e cunquei ch’omisduas squadras stattan cumpact e defensiv segir seresultan buc pli grondas schanzas.

Suenter il te da pausa vegn l’equipa dalla capitala zuar pli ferm el giug, denton anfla ella vinavon buc in recept co crear schanzas encunter in'equipa dalla Cadi bein formada. Gest en quei mument ch’il CB T/R emprova cun in conter da vegnir tiel success – ed arva cheutras las retschas – vegn Cuera da pigliar giu il bal e da lantschar la cunterattacca. Il bal vegn liungs sur la defensiun da Trun/Rabius e Mario Mathis setta ella 64avla minuta igl 1:0 per Cuera 97. Deplorablamein ei il giugadur en ina clara posiziun d’offside. Ella 3. ligia dat ei denton naturalmein negin Video assistant referee (VAR), aschia che la decisiun digl arbiter ei definitiva. Ils hosps laian buc irritar memia ditg da quella decisiun e vegnan tschun minutas pli tard tier ina fetg buna schanza. Remo Alig vegn lantschaus ella gassa, cun in ferm siet ad ault emprova el siu cletg. Ils numerus fans dil CB T/R ein gia pinai da giubilar, il goli da Cuera vegn denton aunc da menar il bal ella latta. Mo duas minutas pli tard vegn danovamein Alig tier ina buna schanza, il bal va denton ord cuorta distanza per pauc sur il gol. Trun/Rabius emprova vinavon da metter sut squetsch l’equipa da casa, mo lezza resta era adina puspei malsegira cun conters. Il giug sa uss better sin ina ni l’autra vart e stat aviarts e spanegionts entochen la fin. Ei gartegia denton buc pli al CB T/R da vegnir tier il gol. Cunquei va la partida a fin cun 1:0 per Cuera 97.

Trun/Rabius ha era en quei giug mussau ina prestaziun fetg concentrada encunter in’equipa posiziunada davon ella tabella. Cun in tec dapli cletg havess l’equipa dalla Cadi saviu turnar a casa cun puncts. Uss vala ei da metter il focus sin il davos giug d’atun sonda a Sargans.

 

informaziuns: 3. ligia, gruppa 1, FC Cuera 97 - CB Trun/Rabius 1:0 (0:0); Ringstrasse, Chur. – 100 aspectaturs. – Arbiter: Qendrim; Gols: 64. Mario Mathis 1:0

Trun/Rabius: Mauro Alig; Fabian Cajacob, Ramon Orlik, Gion Andrea Nay, Sandro Orlik; Beat Cadruvi, Denis Monn; Clau Berther, Kevin Albin (65. Remo Alig), Ivo Albin (76. Salvatore Stagliano); Patrizio Decurtins

Cuera 97: Nicola Hartmann; Victor Americo Pinheiro Rodrigues, Andri Hunger, Edin Durmisi, Girom Affolter; Janique Gringer, Alessio Sewer; Resandan Yogarajah, Adrian Zimmermann (33. Ricard Micevsky), Mario Mathis; Luca Tino

remarcas: cartas melnas: 25. Affolter (foul), 29. Denis Monn (foul), 37. Rodrigues (foul), 87. Hartmann (retardar il giug), 89. Gringer (reclamar), 94. Durmisi (foul) - 70. siet ella latta da Trun/Rabius – corners: Cuera 4, Trun/Rabius 2 – Trun/Rabius senza Daniel Monn, Orlando Monn, Livio Janka, Joris Tomaschett (tuts blessai) e Damian Schmed (vacanzas)

 

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch