proxims giugs

3. ligia:  26-09-2020, 17:30 a Puschlav Valposchiavo Calcio I - CB Trun/Rabius I Grp.
4. ligia:  26-09-2020, 17:00 a Cuera Cuera 97 III - US Danis-Tavanasa II Grp.
5. ligia:  27-09-2020, 16:00 uras a Rabius CB Union Trin I - CB Trun/Rabius IIIa Grp.

egalisau in 0:2 ellas davosas minutas

La dumengia ha il CB Trun/Rabius retschiert a casa il club da ballapei da Buchs. L'equipa da Buchs ei primavera vargada vegnida relegada dalla 2. ligia regiunala. Sil pupi pia in fetg ferm adversari. Vitier vegn che Trun/Rabius ha da remplazzar gest tschun giugadurs blessai. Las perspectivas per il giug eran pia buc idealas, mo tuttina vegn l'equipa da casa da mussar in bien spért cumbattiv ed ina grondiusa morala.

Il giug entscheiva buc ideal per il caucasa. Gia suenter duas minutas dat in defensur in pass malsegir anavos al goli Mauro Alig che munchenta per pauc il gol. Buchs surpren silsuenter il dictat dil giug e lai circular bein il bal. Suenter otg minutas seresulta il 0:1 ord in'acziun dalla vart seniastra. In pass ella zona da puniziun, in attaccader schurmegia il bal, dat in pass anavos ad Allen e lez plazzescha in bi siet ord 18 meters el cantun a bass. Ei cuoza in mument entochen ch'il CB T/R vegn da serevegnir da quella frida. Buchs dat vinavon in ballapei exact e ruasseivel e dominescha il giug, denton reussescha ei buc all’equipa da S. Gagl da vegnir tier claras schanzas. L'equipa sursilvana emprova da star cumpacta e lantschar cunterattaccas suenter sbagls dils hosps. Las diesch minutas avon pausa s'audan lu era a Trun/Rabius. Duas da quellas cunterattaccas meinan a pusseivladads d'egalisar la partida. Ils attaccaders Remo Alig e Patrizio Decurtins vegnan enteifer cuort temps persuls avon il goli da Buchs, mo omisdus munchentan las schanzas.

La pausa para buca d'haver fatg bein a Trun/Rabius. Suenter gia ina minuta vegn Buchs numnadamein d'alzar il resultat sin 0:2. Suenter ina sestellegiada collectiva da defensiun e goli dil CB T/R sto alla fin igl attaccader Rohrer da Buchs mo stuschar il bal da gol en. Sil pli tard ussa era ei clar per tut ils presents: vegnir anavos en quei giug vegn ina dira nusch. Igl FC Buchs dominescha l'emprema mes'ura dalla secunda mesadad tenor giavisch, lai circular bein il bal e vegn adina puspei entras bialas cumbinaziuns sur las varts tier schanzas. Ina da quellas schanzas setschenta ella latta suenter in bi e ferm siet ord biebein 20 meters. Il caucasa ei cunzun fatschentaus cun defender ed ha paucas pusseivladads da vegnir ell'offensiva. En quella situaziun muossa l’equipa da S. Gagl sias qualitads.

Ella 73. minuta vegn l’equipa dalla Cadi tier in culp liber ord 40 meters. Il bal vegn sittaus ella zona malsegira, ins auda ina grida da Beat Cadruvi ed igl arbiter schula penalti! Ina decisiun dispiteivla, denton pren l’equipa da casa bugen encunter quella caschun. Patrizio Decurtins setta a moda suverana igl 1:2! Quei ei ussa gia siu 6avel gol da quella sesiun. La tensiun ei anavos e la speronza crescha tier giugadurs, trenaders ed era tier ils numerus aspectaturs. Pauc pli tard piarda in giugadur da Buchs il bal el rudi d'amiez, Patrizio Decurtins vegn lantschaus dall'ala dretga giu, lez survescha il bal directamein enamiez a bass nua che Ivo Albin setta il bal ella reit tier il 2:2. Giugadurs ed aspectaturs giubileschan, aschi spert sa ei ir el ballapei. Alla fin emprova Buchs aunc inaga tut per tuttina gudignar il giug, mo in'ulteriura schanza ed in culp liber ord buna posiziun anflan buca la via el gol ed ei resta tier il pari.

Trun/Rabius ha muossa ina grondiusa morala ella davosa fasa dil giug e vegn aschia da recaltgar in ulteriur impurtont punct en 3. ligia.

 

informaziuns: 3. ligia, gruppa 1, CB Trun/Rabius – FC Buchs 2:2 (0:1); Pustget, Trun. – 210 aspectaturs; Arbiter: Vrsajkovic;

gols: 8. Brian Allen 0:1, 46. Kevin Rohrer 0:2, 74. Patrizio Decurtins (penalti) 1:2, 85. Ivo Albin 2:2

Trun/Rabius: Mauro Alig; Sandro Orlik, Gion Andrea Nay, Damian Schmed, Fabian Cajacob; Ramon Orlik (65. Beat Cadruvi), Denis Monn; Patrizio Decurtins, Ivo Albin (65. Mirco Pfister), Clau Berther; Remo Alig (80. Ivo Albin) 

Buchs: Manuel Zangger; Luka Sabljo, Pascal Schlegel, Ramon Solinger; Brian Allen, Mika Lippuner, Mattia La Regina, Mentor Memeti, Aulon Rexhepi; Valdet Istrefi, Kevin Rohrer

remarcas: cartas melnas: neginas - 54. siet ella latta da Buchs – corners: Trun/Rabius 0, Buchs 3 – Trun/Rabius senza Daniel Monn, Orlando Monn, Salvatore Stagliano, Livio Janka e Joris Tomaschett (tuts blessai)

 

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch