proxims giugs

3. ligia:  26-09-2020, 17:30 a Puschlav Valposchiavo Calcio I - CB Trun/Rabius I Grp.
4. ligia:  26-09-2020, 17:00 a Cuera Cuera 97 III - US Danis-Tavanasa II Grp.
5. ligia:  27-09-2020, 16:00 uras a Rabius CB Union Trin I - CB Trun/Rabius IIIa Grp.

in gol suenter l'auter encunter landquart

Pigl otgavel giug dalla sesiun da bal en tiarza ligia ei il CB Trun/Rabius serendius a Landquart. Schegie ch’ils hosps dalla Cadi han gudignau il davos giug da campiunadi, valeva l’equipa da casa sco favorit avon il giug.

L’emprema schanza da gol ha lu era s’udiu all’equipa da Landquart: Ella 17avla minuta setschenta ina flanchetta sil pei dil giugadur d’ala seniastra. Lez spetga denton in tec ditg cun sittar ed aschia vegn in defensur da Trun aunc da deviar il siet vid la latta. Quell’acziun para dad haver destadau ils giugadurs da Trun/Rabius. Mo duas minutas pli tard vegn Livio Janka suenter ina biala cumbinaziun sur pliras staziuns tier ina fetg buna schanza. Siu siet cul pei seniester munchenta denton la finamira. Aunc inagada duas minutas pli tard eis ei lu denton gia aschi lunsch: Remo Alig survegn in pass ella currida, survarga cun sia spertadad ils defensurs centrals e marchescha cun saung freid il 0:1. Strusch ha gl’arbiter dau liber il giug, schai il bal puspei ella reit da Landquart. Il secund gol marchescha Patrizio Decurtins cun in siet plazzau ord 16 meters. Il trenader da Landquart ei insumma buca cuntents culla prestaziun e mida aschia suenter ina mes’ura gest 4! giugadurs. Quei fatg commentescha il speaker dil plaz sur autplidader culs plaids «das han i jetz also au no nia erlebt». Mo era quella gronda roschada porta buca fretg. Anzi, avon pausa aulza Clau Berther cun in siet el cantun liung schizun aunc sin 0:3 pils Sursilvans. 

Era suenter il te ei il CB Trun/Rabius la meglier’equipa. La defensiun da Landquart ha immens grondas breigias cun ils sperts attacaders dils hosps. Lezs paran d’haver tuccau in special bien di: Ella 61avla metscha Remo Alig puspei alla defensiun e nezegia il pass ella gassa da Denis Monn per il quart gol. Mo tschun minutas pli tard il medem maletg: Quella gada lantschescha Clau Berther igl attacader da Trun/Rabius e Remo Alig marchescha cun in siet bass el cantun cuort il tschunavel gol – il «hattrick» persunal ei aschia era perfetgs. Tochen la fin dil giug capeta buca pli enorm bia. L’equipa da Landquart muossa insumma negina reacziun ed era il CB Trun/Rabius para dad esser cuntents. Ella 91avla minuta croda lu tuttina aunc in gol: Kevin Albin vegn ora silla vart tiel bal e survescha cun in pass precis il bal central avon il gol, nua che Patrizio Decurtins sto mo pli stuschar el ella reit. 

Aschia gudogna il CB Trun/Rabius il second giug en seria gest cun 0:6 e survarga ella tabella duas equipas (ussa sin plaz sis). L’aulta victoria ei segiramein meritada, ha il CB Trun/Rabius bein mussau ell’offensiva, sco era ella defensiva in fetg bien giug. La fleivla prestaziun da Landquart ha denton era contribuiu il siu.

  

informaziuns: 3. ligia, gruppa 1; FC Landquart-Herrschaft – CB Trun/Rabius 0:6 (0:3); Stadion Ried, Landquart – 80 aspectaturs.

gols: 21’ Remo Alig 0:1, 24’ Patrizio Decurtins 0:2, 38’ Clau Berther 0:3, 61’ Remo Alig 0:4, 66’ Remo Alig 0:5, 91’ Patrizio Decurtins 0:6 

FC Landquart-Herrschaft 1: Ruben Miranda, Endres, Bongulielmi, Oswald, Mähr, Fanio Andre da Costa (31’ Rosafio), Maurer (53’ Diogo Miranda), Pirovino (53’ Hashani), Pinto (31’ Schumacher), Diogo Miranda (31’ Fausch), Sandro da Costa (31’ Roffler) 

CB Trun/Rabius: Mauro Alig, Sandro Orlik, Gion Andrea Nay, Damian Schmed, Fabian Cajacob, Denis Monn, Ivo Albin (72’ Ramon Orlik), Patrizio Decurtins, Livio Janka (34’ Clau Berther, 76’ Kevin Albin), Clau Berther (26’ Mirco Pfister), Remo Alig (90’ Clau Berther)

remarcas: cartas melnas: 26’ Pinto (foul), 77’ Fausch (reclamar) – corners: Landquart: 3, Trun: 1. – Trun/Rabius senza Daniel Monn, Orlando Monn, Salvatore Staglianó e Joris Tomaschett (tuts blessai)

 

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch