proxims giugs

3. ligia:  26-09-2020, 17:30 a Puschlav Valposchiavo Calcio I - CB Trun/Rabius I Grp.
4. ligia:  26-09-2020, 17:00 a Cuera Cuera 97 III - US Danis-Tavanasa II Grp.
5. ligia:  27-09-2020, 16:00 uras a Rabius CB Union Trin I - CB Trun/Rabius IIIa Grp.

impurtonta victoria encunter concurrent direct

Il CB Trun/Rabius ha battiu Triesen cun 3:2 – era grazia a dus autogols. Suenter duas terradas en suite valev'ei per Trun/Rabius da metter in signal, puspei recaltgar puncts ed aschia evitar da ruschnar en ina spirala negativa. La finamira avon il giug era clara: a casa a Pustget drova ei treis puncts encunter il vischin dalla tabella.

Schegie che Trun/Rabius va ella 7avla minuta tras in autogol en avantatg - in culp liber da Denis Monn era vegnius sviaus dil defensur central da Triesen – eis ei la squadra ord il Principadi da Liechtenstein che dat en il tact l’entschatta dil giug. Els laian circular bein il bal tras las atgnas retschas e cunzun suenter standards vegn Triesen adina puspei prigulus. Il goli Mauro Alig sto bein ina ni l’autra gada mussar sias qualitads sin lingia per evitar in cuntergol. Trun/Rabius vegn perencunter buca propi da vegnir ella zona prigulusa digl adversari. Pér ella 38avla minuta vegn il caucasa puspei tier ina buna schanza: Clau Berther cuora ord il miez cul bal vid il pei, dat in pass dubel cun Ivo Albin e setta il bal ord buna posiziun sin gol. Il siet ei denton memia fleivels ed il goli da Triesen vegn da tener il bal senza problems. En tut priu va il CB Trun/Rabius in tec fortunau cugl avantatg ella pausa.

Suenter il te vegn l’equipa da casa tier l’emprema buna occasiun: Ella 50avla minuta stat gl’attacader Remo Alig suenter in bi pass ord il miez persuls avon il gol. Si’emprova da «far in tunnel» reussescha denton buc ed il goli deviescha il siet ad in corner. Trun/Rabius ei uss denton meglier el giug e mo sis minutas pli tard ei il bal puspei ella zona da puniziun da Triesen: Suenter in culp liber vegnan dus giugadurs da Trun bunamein da marcar in gol, mo la fin finala ha il goli il bal. En quei mument – la situaziun pareva sclarida e quasi tut ils giugadurs eran gia semenai per cuorer anavos – ruschna il bal al goli da Triesen anavos egl agen gol - ina scena scurrila che munta medemamein il 2:0 per il caucasa. Ils hosps mettan denton nuot’aunc il tgau el sablun e vegnan ella 69avla minuta lu era da scursanir. In ferm siet ord 20 meters munta il 2:1. Mo Trun/Rabius resta l’equipa prigulusa suenter pausa: Ella 72avla minuta vegn il goli da Triesen zuar aunc da tener in culp liber plazzau da Livio Janka. Diesch minutas pli tard ei il tierz gol dil caucasa (medemamein igl emprem gol d’in agen giugadur) lu denton realitad: In’oreifer biala cumbinaziun sur Denis Monn e Clau Berther terminescha Patrizio Decurtins cun siu tierz gol da quella sesiun. Schegie che Triesen vegn cuort suenter aunc da marcar in secund gol resta ei tier la victoria pil caucasa. 

Quella victoria da 3:2 ei pil CB Trun/Rabius en vesta alla tabella immens impurtonta. Seruassar sin quels treis puncts san ils Sursilvans denton buc; las equipas en quella tiarza ligia paran dad esser fetg ulivas ed aschia quenta vinavon mintga punct.

 

informaziuns: 3. ligia, gruppa 1; CB Trun/Rabius – FC Triesen 3:2 (1:0); Pustget, Trun. – 150 aspectaturs

gols: 7’ autogol 1:0, 56’ autogol 2:0, 69’ Triesen 2:1, 81’ Patrizio Decurtins 3:1, 82’ Triesen 3:2

CB Trun Rabius: Mauro Alig, Sandro Orlik (84’ Ramon Orlik), Gion Andrea Nay, Damian Schmed, Fabian Cajacob, Denis Monn, Salvatore Staglianó (51’ Livio Janka), Ivo Albin (72’ Mirco Pfister), Livio Janka (46’ Remo Alig), Clau Berther (85’ Kevin Albin), Patrizio Decurtins

FC Triesen: Afonso, Wolf, Bargetze, Tschütscher, Heeb, Arpagaus, Kind, Salzgeber, Gomes, Hasler, Tahiri

remarcas: cartas melnas: 36’ Kind (foul), 40’ Patrizio Decurtins (sittar naven il bal), 55’ Arpagaus (foul) – corners: Trun: 2, Triesen: 7. – Trun/Rabius senza Beat Cadruvi, Orlando Monn, Daniel Monn e Joris Tomaschett (tuts blessai).

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch