proxims giugs

3. ligia:  26-09-2020, 17:30 a Puschlav Valposchiavo Calcio I - CB Trun/Rabius I Grp.
4. ligia:  26-09-2020, 17:00 a Cuera Cuera 97 III - US Danis-Tavanasa II Grp.
5. ligia:  27-09-2020, 16:00 uras a Rabius CB Union Trin I - CB Trun/Rabius IIIa Grp.

clara terrada pil cb trun/rabius

Il tschunavel giug da campiunadi per Trun/Rabius ha liug a Pustget. Igl adversari da Bogn Ragaz ei cun dus puncts ord quater giugs davos il CBTR ella tabella. La squadra da S. Gagl ha la sesiun vargada mo per pauc munchentau la promoziun en secunda ligia, aschia ch’els ein gia sut pressiun da recalatgar puncts. Trun/Rabius da sia vart ha suenter la victoria encunter Gams gia tschun puncts sin il conto e savess cun in'ulteriura victoria gia sedistaccar empau dallas equipas alla cua dalla tabella.

Avon ina roscha aspectaturs e dad ideala aura da bal dat igl arbiter liber il giug. Il giuven Mirco Pfister remplazza Clau Berther che stat per dus giugs buc a disposiziun muort ina carta cotschna el giug da cup. Schiglioc dat ei buca grondas surpresas ella formaziun. Il giug ei las empremas 20 minutas tempraus dil cumbat el center senza bia scenas malsegiras. Sulettamein in siet da Bogn Ragaz anfla suenter la parada dil goli da Trun/Rabius la petga. Gest ella fasa ch’il caucasa anfla meglier el giug vegn Bogn Ragaz ella 26avla minuta denton tier igl emprem gol. Suenter in sbagl ella defensiun aulza Mühlebach il bal cun ina bial'acziun sur il goli Andri Nay e marca aschia il 0:1. Ed ussa paran il hosps dad haver ferdau la puorla. Gia la proxima attacca sur l’ala meina tier il 0:2 entras Bersorger. Igl attaccader marca cun in ferm e plazzau siet il bal el cantun liung. E sco quei fuss aunc buc avunda per l’equipa da casa schula igl arbiter cuort avon pausa in penalti. Igl arbiter interpretescha in’acziun da salvament dil goli da Trun/Rabius sco foul. Igl ei ina decisiun fetg dispiteivla, quei ch’interessescha denton buc il giugadur da Bad Ragaz che marca suveran il penalti ed aulza aschia il resultat sin 0:3.

Trun/Rabius reagescha da pausa e mida sin in 4-4-2. Salvatore Staglianó e Damian Schmed duessen ussa dar dapli stabilitad alla squadra da casa. Quei para da purtar fretg. Il CBTR vegn meglier el giug ed ei gartegia da vegnir pli malsegirs avon il gol da Bogn Ragaz. Vitier stat l’equipa da casa pli stabil e cumpact e lai sezza buc tier bia ella defensiun. Denton vegn negin giugadur da smaccar il bal sur la lingia. Era culps libers ord bunas posiziuns vegnan buca da passar il goli Cristiano Cardoso che gioga ina buna partida. E sco igl ei il bia: tgi che fa buc ils gols lez survegn vonzeivi els. Ed aschia vegnan ils hosps dil cantun S. Gagl otg minutas avon la fin danovamein cun in’attacca sur l’ala da marcar il 0:4. Cun quei clar resultat va il giug a fin.

L’emprema mesadad ha il CB Trun/Rabius segir mussau la mendra prestaziun dad uonn. Tgunsch ha la victoria encunter Gams effectuau tiels giugadurs ina certa tenuta dad "ei va schon en 3. ligia". Ch’ins vegn strufegiaus a moda brutala per quella tenuta da nonchalant ha l’equipa da Bogn Ragaz demonstrau. La secunda mesadad ha Trun/Rabius mussau ch’els san era da bal. Denton sto ei gartegiar da giugar sur 90 minutas concentrau e da nezegiar las pusseivladads avon gol. Il proxim giug a Puschlav vegn a mussar sche la squadra sa reagir sin quella terrada.

 

informaziuns: 3. ligia, gruppa 1; CB Trun/Rabius – FC Bad Ragaz 0:4 (0:3), Pustget, Trun. – 200 aspectaturs

gols: 26. Mühlebach 0:1, 34. Bersorger 0:2, 39. Thöny 0:3, 82. Rauti 0:4 

Trun/Rabius: Andri Nay; Fabian Cajacob (79. Ramon Orlik); Livio Janka, Gion Andrea Nay (46. Damian Schmed); Sandro Orlik (89. Fabian Cajacob); Ivo Albin (63. Beat Cadruvi); Denis Monn; Daniel Monn (35. Salvatore Stagliano); Mirco Pfister (66. Daniel Monn); Orlando Monn; Patrizio Decurtins (76. Kevin Albin)

Bogn Ragaz: Cardoso; Mühlebach; Schneider; Kressig; Belinger (52. Kühne); Näf; Horni (74. Caluori); Mühlebach (64. Antunovic); Bersorger; Rauti; Thöny (64. Bigger)

remarcas: cartas melnas: 77. Patrizio Decurtins (reclamar), cornas 5:7

 

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch