proxims giugs

3. ligia:  26-09-2020, 17:30 a Puschlav Valposchiavo Calcio I - CB Trun/Rabius I Grp.
4. ligia:  26-09-2020, 17:00 a Cuera Cuera 97 III - US Danis-Tavanasa II Grp.
5. ligia:  27-09-2020, 16:00 uras a Rabius CB Union Trin I - CB Trun/Rabius IIIa Grp.

out ella prerunda dil cup svizzer

El 16avel final dalla prerunda dil cup ha il CB Trun/Rabius beneventau il FC Appenzell a Pustget. Muort in viadi dalla giuventetgna da Trun han ils trenaders Donat Albin e Philippe Vincenz stuiu desister da gest otg giugadurs. Per quei motiv ein sis giugadurs dalla secund’equipa dil CB Trun/Rabius vegni tier la caschun da giugar encunter in’equipa da tiarza liga. Aschia valevan tonaton ils Appenzelles sco favortis avon il giug.

Ella 7avla minuta vegnan ils hosps lu era gia da marcar igl emprem gol. In pass liung ord il miez vegn il capitani e defensur central Ramon Orlik buca da sviar, aschia ch’igl attacader Appenzell ha via libra: El cuora persuls viers gol e marchescha cun in siet a bass el cantun il 0:1 - ina duscha freida per l’equipa da casa. Il CB Trun/Rabius quietescha denton il giug e vegn cuort suenter tier in’emprema schanza da gol: Davide Beer survegn in bal ord la defensiun en sia currida dall’ala siado. El porta il bal el dies dalla defensiun ella zona prigulusa, nua che Orlando Monn munchenta mo per pauc il gol. En quella fasa ei il giug ulivs. Era ils hosps digl Appenzell vegnan suenter biebein 20 minutas puspei tier ina bun’occasiun: Mauro Alig tegn denton il siet ord cuorta distanza en ses mauns. La proxima acziun da gol s’auda lu puspei alla squadra da casa: Gl’attacader Remo Alig aulza cun ina fenta il bal sper siu cuntergiugadur vi e plazzescha il bal cun in bellezia siet ord l’aria gest sut la latta – il goli ha neginas schanzas ed ei stat 1:1. Tochen pausa schabegia plinavon nuot spectacular.

L’entschatta dalla secunda mesadad ei quasi ina copia dall’emprema: Suenter mo paucas minutas anfla in bal liung dil FC Appenzell la via sper la defensiun dil CB Trun/Rabius vi ed in attacader stat persuls avon il gol. Ed era quella ga munta in siet a bass el cantun liung il gol – 1:2. Puspei sto il caucasa cuorer suenter ad in gol. Enqual ga vegn il bal silsuenter datier dil gol dils Appenzelles, tier ina schanza prigulusa vegn ei denton pér puspei ella 71avla minuta: Cun ina alzada maligna ord 20 meters emprova Remo Alig da cuglienar il goli. Quell’emprova munchtena la finamira mo pil ner dall’ungla. Il caucasa sestenta dad egualisar, il giug vegn denton pli e pli hectics. Cuort avon la fin muossa igl arbiter schizun aunc ina carta cotschna: Fabian Koller tegn cun omisdus mauns anavos Clau Berther, lez reagescha memia impulsiv e dat anavos. Igl arbiter interpretescha quei sco “act da violenza” e castigescha il giugadur da Trun leuseunter. Quei ei medemamein la davos’acziun commemorabla ed aschia spiarda il CB Trun/Rabius gl’emprem giug da casa da quella sesiun.

Cunquei che l’equipa sursilvana era in bienton mischedada san ins denton tschintschar d’ina prestaziun cuntenteivla. Ils giugadurs dalla secund’equipa han fatg bein lur pensum e mussau ch’els san era sin quei nivel tener petg. Tuttina ei l’aventura Cup Svizzer pil CB Trun/Rabius vargada, aschia che l’equipa sa uss seconcentrar cumpleinamein sil campiunadi da tiarza liga.

 

informaziuns: 16avel final dalla prerunda dil Cup svizzer; CB Trun/Rabius – FC Appenzell 1:2 (1:1); Pustget, Trun. – 130 aspectaturs; gols: 7’ FC Appenzell 0:1, 26’ Remo Alig 1:1, 49’ FC Appenzell 1:2 

CB Trun/Rabius: Mauro Alig, Sandro Orlik (46’ Curdin Deplazes), Ramon Orlik, Damian Schmed, Fabian Cajacob, Davide Beer (69’ Fabian Collenberg), Denis Monn, Clau Berther, Orlando Monn, Kevin Albin (80’ Dario Schuoler), Remo Alig 

FC Appenzell: D’Olif, Inauen, Fässler, Hörler, Breu, Sabani (86’ King), Dörig (75’ Koller), Manser (82’ Breitenmoser), Signer (61’ Köppel), Baumann, Neuländner

remarcas: cartas melnas: 33’ Manser (foul), 42’ Schmed (foul tactic), 58’ Dörig (sittar naven il bal) 73’ Denis Monn (foul), 84’ Koller (foul tactic) – carta cotschna: 84’ Berther (suenter sedada). – corners: Trun: 1, Appenzell: 3

 

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch