pausa d'unviern

Muort il virus da corona ei la sesiun d'atun 2020 vegnida strihada. Nus sevesein speronza puspei la primavera 2021 sil plaz da bal! 

trun/rabius cun l'emprema victoria

El secund giug d’ordeifer dalla sesiun ei l’equipa da Trun/Rabius stada sin viseta el cantun S. Gagl tier l’equipa da Gams. Igl ei il duel dallas duas equipas promovidas en 3. ligia. Gams haveva recaltgau entochen uss in punct e Trun/Rabius dus. Omisduas equipas savevan che quei giug sappi gia esser in signal per la cuntinuaziun ella sesiun dallas duas equipas, aschia ch’ils aspectaturs savevan esser spanegiai sin ina interessanta partida.

Sin in veramein schliet plaz entscheivan omisduas equipas cun curascha. Beinspert semuossa denton che l’equipa da casa ei pli endisada cun quellas relaziuns e ch’ella pren plaunet enta maun il giug. Gams emprova cunzun atras bals liungs sin ils  attaccaders robusts da vegnir tier success. Trun/Rabius emprova l’entschatta cun cumbinaziuns da vegnir tier schanzas, denton sefan ei relativ spert en ch’il plaz lai buc tier oz in ballapei cultivau. Aschia vegn Gams da smaccar l’equipa dalla Cadi ella defensiva, denton senza vegnir tier pli grondas schanzas. Trun/Rabius perencunter speculescha sin sbagls dils da Gams ed aschia da vegnir cun sperts conters tier lur pusseivladad da sittar igl emprem gol. Denton vargan las empremas 45 minutas senza schanzas da 100% – mo mument: cuort avon pausa vegn Patrizio Decurtins lantschaus cun in bi pass da Clau Berther. Patrizio meina rao a moda freida il goli da Gams e setta igl 0:1 per Trun/Rabius.

Suenter il te da pausa mida Trun/Rabius dad in 4-2-3-1 sin in 4-4-2 ed emprova aschia cun dus attaccaders da metter pli fetg sut squetsch la defensiun da Gams che fa buc adina la pli segira pareta. Quei gartegia l’entschatta era dètg bein, aschia che Trun/Rabius vegn uss entras Daniel Monn e cunzun suenter ina fetg buna schanza da Patrizio Decurtins bunamein tier il 0:2. Gams denton emprova vinavon cun bals liungs da vegnir tiel success ed aschia in meina ella 58avla minuta agl 1:1. Cun ina bial'acziun sur l’ala dretga gartegia ei a Hardegger da vegnir ella da sedisch; suenter in disuorden avon il goli Andri Nay vegn Beti da sittar il bal ella reit ed aschia dad egalisar.

Sil pli tard uss ei il cumbat denter las duas equipas promovidas lantschaus. Omisduas equipas vulan gudignar quei giug, aschia ch’ei dat in cumbat per mintga bal. Denton resta il giug da tut temps fairs, quei ch’ei segir era d’attribuir agl arbiter Mehmeti. La partida ei vinavon fetg uliva, zaco sentan ils aspectaturs denton che quei giug va buc a fin cun in remis. Ed aschia eisi era. Ella 84avla minuta vegn Trun/Rabius tier in culp liber 30 meters avon il gol da Gams. Gion Andrea Nay aulza il bal sur la defensiun ora tier Orlando Monn; lez setta a bass sper il goli ora e marca igl 1:2 pil CB. In schoc per l’equipa da casa che betta uss naturalmein tut anavon. Las davosas minutas dil giug cuostan entginas unglas als fans e trenaders da Trun/Rabius, denton vegn Gams – priu ora senter ina corna – buc pli tier schanzas, aschia che Trun/Rabius tuorna – alla fin era meritadamein – a casa cun l’emprema victoria da questa sesiun.

 

informaziuns: 3. ligia, gruppa 1; FC Gams - CB Trun/Rabius 1:2 (0:1); Madrusen, Gams. – 80 aspectaturs. – Arbiter: Mehmeti

gols: 45. Patrizio Decurtins 0:1, 58. Michele Beti 1:1, 84. Orlando Monn 1:2  

Trun/Rabius: Andri Nay; Fabian Cajacob, Damian Schmed (69. Livio Janka), Gion Andrea Nay, Sandro Orlik; Salvatore Stagliano, Denis Monn (46. Daniel Monn); Clau Berther (69. Mirco Pfister), Ivo Albin (60. Beat Cadruvi), Orlando Monn; Patrizio Decurtins (85. Damian Schmed)

Gams: Thomann; Suhner, Lenherr (33. Kersting), Wyss, Steinhauser; Giger (55. Marinello), Fäh, Hoppeler (85. Zwahlen); Manojlovic, Beti, Hardegger (67. Näf)

remarcas: cartas melnas: 67. Manojlovic (foul), 86. Cadruvi (foul) – corners: 12:6

 

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch