pausa d'unviern

Muort il virus da corona ei la sesiun d'atun 2020 vegnida strihada. Nus sevesein speronza puspei la primavera 2021 sil plaz da bal! 

emprem giug – emprem punct

La dumengia ha il CB Trun/Rabius lantschau la sesiun en 3. ligia cul giug encunter igl FC Triesenberg. Cunquei che l'equipa ha gia la dumengia vargada duront la victoria encunter Fortuna S. Gagl el Cup svizzer saviu perschuader, han ils numerus aspectaturs a Pustget era questa dumengia astgau esser spanegiai silla prestaziun dil cau-casa, il qual ei puspei sepresentaus ella formaziun da 4-2-3-1. Per quei giug ha pia valiu: nova sesiun, nova ligia, novs trenaders, niev sistem – niev cletg! 

La fasa d'entschatta ei oravontut la buna disciplina e cumpactadad da Trun/Rabius curdada en egl positivamein. Ferton che Triesenberg ha giu dapli il bal l'emprema mes'ura, ha l'equipa da casa defendiu pulitamein solid – tenor il motto "in per tuts – tuts per in". Aschia eis ei reussiu da tener pétg agl adversari dil Principadi dil Liechtenstein – era sch'els ein tscheu e leu vegni malsegirs cun lur spertezia giugadurs dall'ala. Denter auter ha il goli Mauro Alig parau duas ga in siet ord cuorta distanza d'in attaccader tut persul avon gol; l'emprema ga in siet cul pei e pauc pli tard ina tgaua bein plazzada el cantun a bass. Sin fundament dallas blessuras dad omisdus golis da tschep (Andri Nay e Joris Tomaschett) eifer il giug da Cup svizzer ha il giuven da 20 onns oz saviu mussar ch'el ei in bien remplazzament e sustegn per l'equipa. 

Las minutas avon la pausa han allura purschiu pliras occasiuns da marcar igl avantatg; schibein igl adversari sco il cau-casa havessen en quella fasa da giug saviu marcar igl emprem gol dalla sesiun. La 38avla minuta ha Triesenberg retschiert in culp liber cuort avon la da sedisch, il qual Trun/Rabius ha saviu defender communablamein. Entginas minutas pli tard vegn il Clau Berther lantschaus sill'ala dretga cun in bellezia pass da Salvatore Staglianó. Entras in bien emprem contact reussescha ei al giugadur culla nr. 15 da trer viers il gol; il goli parescha perencunter il siet. La corna suandonta tucca bein il tgau dil defensur Damian Schmed, deplorablamein fallescha ella denton il gol. Avon pausa lantschescha Trun/Rabius in ulteriur conter; denton era quel porta negin fretg, aschia che las equipas van cun in pari da 0:0 en cabina. 

Il giug viva suenter pausa vinavon dalla tensiun. Las secundas 45 minutas ha il CB Trun/Rabius denton empau dapli dil giug e vegn pli savens tier occasiuns da gol; suenter biebein in'ura han buca meins che treis giugadurs igl 1:0 sil pei. L'emprema caschun sepresenta suenter in culp liber cuort avon la zona da puniziun, eifer duas ulteriuras situaziuns san dus giugadurs cuorer resch persuls encunter gol. Donn ch'il renomau "saung freid" maunca en quellas secundas, cunquei ch'il CB havess sin fundament dalla prestaziun mussada senz'auter meritau in gol. 

Cuntrari fatschenta era igl FC Triesenberg la defensiun dil cau-casa, aschia ch'ei vala da buca patertgar vid las occasiuns munchentadas, mobein da vinavon crear schanzas. Quei reussescha era il davos quart d'ura dil giug dètg bein. Aschia vegn il CB la 76avla minuta tier in ulteriur culp liber, il qual Denis Monn sieta ord ver 19m mo cnap sper il gol ora. Duas minutas pli tard vegn in'ulteriura ga in attaccader da mitschar dalla defensiun. Entras la controlla dil bal munglusa po il goli deplorablamein tier il bal avon ch'ei vegni malsegir. Era la davosa attacca dil CB la 89avla minuta da giug gartegia buca tenor giavisch, aschia che las equipas bandunan il plaz cun in pari da 0:0.

Il facit dil giug ei ord vesta dils trenaders oreifer positivs. Malgrad che Triesenberg ha segiramein giu dapli dil giug, ha Trun/Rabius astgau schar nudar dapli e pli malsegiras occasiuns da gol. Plinavon ha l'equipa defendiu a moda fetg cumpacta en in giug che ha purschiu sur 90 minutas bia tensiun. Il punct dat segiramein curascha ed anim per las proximas lutgas che spetgan. 

 

formaziun: Mauro Alig – Sandro Orlik, Damian Schmed, Gion Andrea Nay (66' Ramon Orlik), Fabian Cajacob (C) – Salvatore Staglianó (69' Beat Cadruvi), Denis Monn – Patrizio Decurtins, Daniel Monn (54' Remo Alig), Clau Berther (69' Mirco Pfister) – Orlando Monn

reservas: Remo Alig, Beat Cadruvi, Livio Janka, Ramon Orlik, Mirco Pfister

 

 

       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch