proxims giugs

25-08-2019, 15:00 CB Trun/Rabius I - FC Triesenberg I
31-08-2019, 16:30 CB Trun/Rabius II - FC Bogn Ragaz IIa
  • funcziunaris

    president Otto Beer +41 79 610 54 21 This email address is being protected from spambots. You need JavaScript enabled to view it. cassier
    Read More
  • 1. equipa

    giugadurs #1 Andri Nay #12 Mauro Alig #2 Orlando Monn
    Read More
  • 2. equipa

    giugadurs #1 Flavio Schuoler #15 Silvan Cajacob #2 Christof Derungs
    Read More
  • trenaders

    1. equipa Donat Albin (C) +41 78 602 57 77
    Read More
  • juniors

    juniors A - IG Surselva a Grp. (Coca-Cola-League) juniors B2 - IG
    Read More
  • seniors

    Bei den Senioren ist jeder willkommen der das fussballerische Seniorenalter
    Read More

3 puncts meritai che portan igl emprem plaz!

 

Suenter la terrada da Celerina ordeifer encunter il CB Surses muntava quei la caschun pil CB Trun/Rabius da vargar l'equipa engiadinesa e da conquistar igl emprem plaz en 4. ligia - quei in giug avon la runda finala. Ina victoria encunter Panaduz che sesanflava avon il giug ellas regiuns bassas dalla tabella era aschidadir quasi in stuer. 

Avon ch'il giug entscheivi han ils giugadurs giu preparau entgins regals e drizzau in pèr bials plaids als trenaders partents Mario Solèr e Carlo Tuor, als quals igl ei vegniu engraziau per lur engaschi nunstunclenteivel e gratulau per lur success. Era da quella vart seigi aunc inaga engraziau ad els grondamein per lur temps e gnarva unfri per nies CB. Plinavon ei era vegniu priu cumia dil goli Sandro Tomaschett che terminescha sia carriera da ballapei activa. 

Suenter las undraziuns numnadas ha il giug allura saviu vegnir lantschaus. Sco la plipart dils ulteriurs rapports ei era quella ga s. Pieder in tema - quella ga denton pils biars plitost a moda positiva. Enstagl da neiv lai il schef dall'aura quella ga splendurar ils radis dil sulegl e procura aschia per temperaturas denter 25 e 30°C - e beinenqual tiasta cotschna ;-) Oz ch'ei fuss finalmein inaga stau giustificau da purtar caultscha e mongia cuorta sesanfla nies aspectatur il pli famus en in aviun anavos da Londra. Tgisà sch'el havess quei giug purtau aunc pli pauc teila vid el. Quei vegnin nus mai a vegnir sissu... Lein denton sededicar als schabetgs sil plaz da ballapei enstagl a tals spel plaz. Per quei giug han ils trenaders eligiu ina formaziun empau pli giuvna e surdau la responsabladad da far il giug amiez a Denis Monn. Il capitani duei inaga far ina pausa...

Trun/Rabius fa gia baul pressiun sil gol viers Rabius e vegn gia suenter siat minutas da sittar igl 1:0. La tgaua dalla corna vegn il goli en blau aunc da parar, denton igl "Abstauber" ord biebein 4m sfundra il Livio ellas maschas. Il squetsch cuntinuescha ed aschia vegn ei la 14avla minuta tier ina scena dispiteivla ella da sedisch digl adversari. In defensur en blau-tgietschen duei haver tuc il bal cul maun ed igl arbiter hesitescha buca secunda e muossa sil punct. Ina clara caussa pil Livio e cun quei il 2:0. Sco il final dalla Champions League para il giug era cheu gia baul dad esser decidius... 

En cumparegliaziun cun gliez giug schabegia aunc pulittamein bia a Pustget. Il CB vegn numnadamein adina puspei da lantschar ses dus cametgs sillas alas, ils quals portan ils bals malsegir amiez avon gol. Donn che negin spetga mintgamai leu ni ch'ils defensurs vegnan da liberar en extremis. Igl adversari da Panaduz vegn sporadicamein era tier occasiuns da gol - quei pil pli entras situaziuns da standard. Lur culps libers falleschan denton il gol e setschentan il pli savens ella vischinonza dalla tabla da 118. Pil Dani en gol dat ei denton nuot malsegir da tener, excepiu dus siets pulit centrals che caschunan neginas miserias. Remarcabel ei ch'ins haveva tertgau che nies Ivo hagi finalmein inaga il nuv che seigi sesligiaus il venderdis da trenament; mo oz eis el puspei sepresentaus da camifò en sia rolla sco "Chancentod". Igl Ivo e sittar gols ei propi buc aunc ina historia cun happy-end... (Remarca digl autur: Jeu sperel fermamein ch'igl Ivo prendi quella remarca cun humor.) ;-) 

La 39avla minuta semeglia la scena ella da sedisch plitost ad in automat da flipper ch'in giug da ballapei. Ord quella scena sieta il Fabian Buzzi la finala il 3:0 pil caucasa. Avon il schul da pausa eisi il Remo che vegn aunc d'alzar il resultat sin 4:0. Quella ga brillescha il Buzzi lantschaus ord il miez cun ina ferma attacca da vart dretga viaden ella da sedisch ed in pass ualti "scharf" viaden amiez sil Remo; lez plitost "scarpetscha" il bal sper la petga seniastra en. Gol ei denton gol e quenta tuttina sco tut tschels treis avon era. Silsuenter astgan las equipas serender en cabina per sesferdentar empau dallas cauldas temperaturas. 

Avon pausa eisi reussiu per part fetg sempel a Trun/Rabius da vegnir atras; quei savens entras far spert. Ils giugadurs ein stai fetg presents da davon tochen davos ed ein aschia vegni da prender schuber ord il giug Panaduz, il qual ha giu da sbatter cun munconza da giugadurs da reserva ed in giugadur che haveva gia in "zééérig" (citat Carlo Tuor) dapi la 20avla minuta. Suenter pausa sentan ins tscheu e leu l'influenza dallas temperaturas pulit aultas e forsa contribuescha il grond avantatg era buca dispet ad in giug tensiv; Trun/Rabius pren en scadin cass ora empau il tempo. 

Nuotatonmeins vulan ils giugadurs en ner-alv magari tuttina mirar sch'ins vegness buca sittar aunc in 5:0. Vinavon suondan bialas attaccas e per part era bialas midadas da vart che portan il CB spert avon gol. Ina da quellas acziuns spertas lantschada dil Livio finescha il Carlo Gautschi per pauc sur il gol. Tut en tut controllescha il caucasa il giug e lai da principi cursar bein il bal ellas atgnas retschas. Ina proxima scena malsegira suonda la 74avla minuta ord in pass a bass dil Clau che traversa la da sedisch per anflar il pei dil Salvatore rodund 3m avon il gol. Cuort avon seglia il bal perencunter levamein, aschia ch'il Salva tucca il bal plitost culla stgeina che cul pei e spedescha quel sur il gol ora. Tgei pusseivladad ch'ins ha munchentau cheu. 

La 85avla minuta vegn allura aunc inaga per midar giu l'equipa da Panaduz tier in'occasiun da gol. In culp liber dalla vart seniastra vegn sittaus viaden ella da sedisch nua che negin dalla defensiun po tier il bal. Ei para sco sch'ils dus attaccaders savessen aunc ditg stuschar vi e neu il bal - e la finfinala stauschan els quel en gol e lain al Dani negina schanza. Pauc pli tard terminescha il bien arbiter il giug cul resultat final da 4:1 pil CB Trun/Rabius. Questa victoria munta medemamein igl emprem plaz en 4. ligia, sinaquei che Celerina ha spiars il di avon. Il davos giug dalla runda da primavera encunter Schluein-Glion empermetta pia ina massa tensiun. Lein mirar tgi che stat la Gliendisdis Tschuncheismas sera alla testa dalla tabella...

Essend stau il davos giug da casa dalla sesiun 2018/19 lein nus sin questa via engraziar grondamein a nos aspectaturs pil sustegn a Pustget - sco era als giugs ordeifer. Aschia fa ei daver plascher da dar ballapei! ENGRAZIEL FETG!!!

 

Informaziuns: 7' 1:0 Livio Janka, 14' 2:0 Livio Janka (P), 39' 3:0 Fabian Cajacob, 46' 4:0 Remo Alig, 85' 4:1 Panaduz

Formaziun: Daniel Monn - Sandro Orlik (80' Christof Derungs), Gion-Andrea Nay, Livio Janka, Fabian Cajacob - Orlando Monn (86' Remo Alig), Beat Cadruvi (68' Ramon Orlik), Denis Monn, Clau Berther (C) (77' Mattias Candinas) - Ivo Albin (74' Salvatore Staglianó), Remo Alig (46' Carlo Gautschi)

Reservas: Christof Derungs, Mattias Candinas, Salvatore Staglianó, Ramon Orlik, Carlo Gautschi

  • bènaltè!

    bènaltè! 2018 - 3. ediziun Miez uost ei la tiarza ediziun dil bènaltè! cumparida. Ils habitonts dallas vischnauncas Sumvitg e Trun
    Read More
       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch