proxims giugs

25-08-2019, 15:00 CB Trun/Rabius I - FC Triesenberg I
31-08-2019, 16:30 CB Trun/Rabius II - FC Bogn Ragaz IIa
  • funcziunaris

    president Otto Beer +41 79 610 54 21 This email address is being protected from spambots. You need JavaScript enabled to view it. cassier
    Read More
  • 1. equipa

    giugadurs #1 Andri Nay #12 Mauro Alig #2 Orlando Monn
    Read More
  • 2. equipa

    giugadurs #1 Flavio Schuoler #15 Silvan Cajacob #2 Christof Derungs
    Read More
  • trenaders

    1. equipa Donat Albin (C) +41 78 602 57 77
    Read More
  • juniors

    juniors A - IG Surselva a Grp. (Coca-Cola-League) juniors B2 - IG
    Read More
  • seniors

    Bei den Senioren ist jeder willkommen der das fussballerische Seniorenalter
    Read More

sittau ils gols il dretg mument!

Suenter la victoria dalla davosa dumengia encunter il capogruppa Celerina serenda l'emprema equipa dil CB giu Domat. Domat ei momentan sigl 8avel plaz dalla tabella. Sin pupi stuess quei daventar ina clara caussa, mo tgi che seregorda aunc dil giug digl atun vargau sa che Trun/Rabius haveva gudignau il giug pér el temps supplementar, pia "last-minute". Da menziunar ei aunc ch'il club da ballapei da Domat festivescha uonn siu giubileum da 100 onns – cordiala gratulaziun!

Igl arbiter dat liber il giug avon ina culissa da biebein 80 aspectaturs. Ils biars da quels ein fans da Trun. Suenter paucas secundas vegn Domat gia tier l'emprema schanza – suenter ina flanca da dretg ei in attaccader persuls avon gol, po denton per pauc buca tier il bal. Puh! Las empremas diesch minutas schabegia lu buc aschi bia. Omisduas equipas emprovan da schar circular il bal, mo ils pass anflan savens la via tier igl adversari. Lu ha nies Orlando ina bun'idea ed aulza il bal sur la defensiun digl adversari, nua che Salvatore spetga, tegn il bal e vul sittar... mo in defensur vegn il davos mument aunc denteren. La corna che suonda po il Gion Andrea tier cul tgau, mo era quei bal sgola sper il gol ora. Il giug resta hectics ed ils giugadurs en ner-alv piardan memia spert il bal cu els van ell'offensiva. Suenter in quart d'ura setta in attaccader da Domat in bi siet ord 25 meters, il goli Dani Monn parescha denton e muossa ch'el ei neunavon.

Suenter biebein mes'ura lu l'emprema gronda schanza da marcar per il CB: igl Oli fa ina biala midada en direcziun Clau, lez vegn cul bal enamiez nua che Salva pren en il bal paucs meters avon gol e setta speraso. Quei havess stuiu esser igl 1-0! Mo il CB para da vegnir meglier el giug. Era ils da Domat vegnan tscheu e leu suenter cumbinaziuns avon gol, mo pil pli ein ils siets buca malsegirs.

Aschia tuts che tratgan ch'ei mondi cun in 0-0 ella pausa. Denton na, Salva dat in bi pass ella gassa en direcziun Oli, lez metta anavos il bal sin Remo – lez studegia buca ditg e setta il bal sper il goli vi ella reit. 1-0! Ussa sto ei esser pausa! NA – Domat vegn aunc inaga giu ella da 16 dil CB, nua che tut ils giugadurs en ner-alv miran co in attaccader vul ir enviers gol – sulettamein nossa numera 6, Beat, vul buca schar far quel in gol, metta denton el per tiara – penalti! Aspectaturs, trenaders e giugadurs da reserva capeschan buc il mund. Il giugadur da Domat ha pia la schanza da far igl 1-1, mo nies bien goli Dani tegn il penalti cun ina super parada! Grazia ad el stat ei aunc adina 1-0 – pausa! Quell'emprema mesadad ei buca stada tenor il gust da nos trenaders Mario e Carlo. La critica ei denton era giustificada – ils 11 giugadurs san segiramein dar meglier ballapei.

Cuort suenter pausa vegn igl Oli tarmess cun in bal liung e puspei vegn el da metter anavos il bal al Remo – lez vegn denton buca da marcar il secund gol. Ei fuss stau ina copia digl emprem gol. Uss entscheiva Domat puspei a far dapli squetsch. Entras quei seresultan plirs pass els peis agl adversari. Inaga vegn in attaccader schizun lantschaus cun in bi pass, mo per cletg ei il Buzzi attents e sclarescha il davos mument. Ina minuta suenter setta il CB lu nunspitgadamein il 2-0! Ina flanca ella da sedisch vegn tier Oli, lez lai ora dus adversaris, tuorna il bal anavos a Remo che marchescha siu secund gol en quei giug! Il giug ei uss aviarts ed ei suonda ina fasa cun schanzas per omisduas equipas. Ella 63avla minuta vegn Domat entras ina fetg biala cumbinaziun atras il miez tier ina bun'occasiun da curreger il resultat – il bal sgola denton per pauc sur la latta ora. Puspei giu cletg! L'acziun che suonda ei lu la decisiva per in giug uliv. Sandro anfla cun in pass atras il miez nies capitani Salvatore, lez lantschescha cun in bi pass Clau che setta il bal naven dalla da sedisch. Il siet vegn menaus giu d'in defensur da Domat e lai aschia negina schanza al goli. 3-0 per il CB! Il resultat corrispunda denton buca diltut alla prestaziun, damai che Domat lai per part circular bein il bal ellas atgnas retschas, ils gols setta denton Trun/Rabius.

Diesch minutas avon la fin vegn nossa racheta Oli puspei lantschada cun in bi bal liung ell'ala seniastra. El fa in solo atras la da sedisch, lai ora ils defensurs sco petgas, mo metta il bal in tec memia anavon, aschia ch'il goli sa parar il siet. Donn, suenter zacontas bialas acziuns vess igl Oli meritau oz in gol! Las davosas minutas ein lu buca pli aschi interessantas, il giug ei decidius. Tut las reservas vegnan aunc tier lur minutas da giug. Certs giugadurs che vegnan midai ora ein cuntents, auters han neginas gnarvas pli e sevilan sco rustgs pervia digl adversari ... :D

Ella 85avla minuta stuess Domat lu marcar igl 1-3, mo puspei puspei fallescha igl attaccader ord posiziun optimala! Ed aschia resta ei tier il 0-3 en favur da Trun/Rabius. Ina victoria meritada, mo forsa in tec memia clara.

Cun quels 3 puncts resta il CB sil secund plaz, aunc adina mo dus puncts davos Celerina che ha medemamein gudignau siu giug da casa encunter Laax. La cuorsa pigl emprem plaz ei pia aunc adina aviarta!

L'autra dumengia dat il CB siu davos giug da casa encunter Bonaduz.

 

Formaziun: Daniel Monn - Sandro Orlik, Damian Schmed, Gion-Andrea Nay, Fabian Cajacob - Orlando Monn, Ivo Albin, Beat Cadruvi, Clau Berther - Salvatore Staglianó (C), Remo Alig

Reservas: Ramon Orlik, Christof Derungs, Denis Monn, Mattias Candinas

 

 

  • bènaltè!

    bènaltè! 2018 - 3. ediziun Miez uost ei la tiarza ediziun dil bènaltè! cumparida. Ils habitonts dallas vischnauncas Sumvitg e Trun
    Read More
       

CB Trun/Rabius  |  Caum postal 153  |  CH-7166 Trun  |  +41 78 789 74 36  |  secretari@cb-trun-rabius.ch