contact

CB Trun/Rabius

Caum postal 153

7166 Trun

+41 78 789 74 36

secretari@cb-trun-rabius.ch 

 

© 2018 by cb-trun-rabius.ch

cun bia gnarva ed empau cletg alla victoria

Da temperaturas pulit emperneivlas - quella pretensiun pertucca mo all'entschatta dil giug - retscheiva il CB Trun/Rabius a Pustget igl FC Celerina. Igl adversari secatta momentan alla testa dalla tabella da 4. ligia cun in avantatg da tschun puncts. Cun ina victoria vegness il CB da reducir il disavantatg sin sulettamein dus puncts e fagess aschia puspei empau pli tensivs il campiunadi. Cass cuntrari muntass igl avantatg dils Engiadines otg puncts; quei che muntass pli probabel la decisiun dil campiunadi gia treis rundas avon la fin... 

Ils aspectaturs ch'ein serimnai questa dumengia a Pustget vesan ina fasa d'entschatta marcada da dirs cumbats sin omisduas varts. Omisduas equipas ein decididas e schenghegian nuot ina a l'autra. Aschia seporscha pauc plaz als giugadurs da cumbinar; schizun ils defensurs vegnan attaccai gia baul e per consequenza suondan entgins bals liungs da davos ora. Malsegir vegn ei l'emprema ga la tschunavla minuta entras in culp liber cuort avon la da sedisch. Il Livio sieta il bal cun ina buna fermezia sin gol, denton parescha il goli il siet buca memia plazzau. Las minutas suandontas vegn allura Celerina tier beinenqualina schanza da marcar il 0:1, denton per cletg pil caucasa munchentan ils siets per part ord bunas posiziuns la finamira. 

La 26avla minuta vegn il capitani Salvatore lantschaus cun empau cletg sill'ala dretg. Vesend el il goli en mellen a vegnend pli datier, sedecida el d'alzar il bal sur quel ora. Il "schlenzer" anfla deplorablamein buca la via en gol, aschia ch'ei resta al pari senza gols. Duas minutas pli tard sto nies goli da reserva nr. 73 Dani Monn parar in culp liber. Il siet central peglia il Dani denton senza miserias. Era il culp liber quater minutas pli tard meina il Dani ad ina corna, la quala porta la finfinala era neginas midadas da resultat. 

Pli malsegir vegn Celerina entras ina corna la 39avla minuta. Suenter in viriveri setschenta il bal avon ils peis ad in attaccader en mondura cotschna; siu "schlenzer" sgola mo per pauc sper la petga seniastra dil gol da Trun/Rabius ora. Aschia va in'emprema mesadad marcada da biars cumbats e paucas occasiuns da gol a fin ed ils giugadurs astgan serender en cabina per in sitg.

Sco usitau ils davos giugs da casa sestrida l'aura era oz el decuors dil giug, aschia che beinenqualin che ha emblidau il parisol pren la via sutapeis e va a casa gia da pausa. Sulettamein in aspectatur - oz aunc ella funcziun da grilleur - tegn petg allas temperaturas ed al vent scardaliu e porta vinavon mo caultscha e mongia cuorta. Ina nundetga perseveronza dalla quala nus astgein esser perdetga ...

Igl emprem quart d'ura dalla secunda mesadad resumescha nies ex-coach "Dün-Dün" suandontamein: "Las equipas neutraliseschan sesezzas." Ei schabegia buca bia sil plaz - tochen ch'il Gion-Andrea lantschescha la 59avla minuta cun in bellezia pass el "lauf" in attaccader, tup mo che quel porta la fallida mondura ord vesta dil CB! Igl attaccader da Celerina po tier il bal avon nies goli, meina ora quel e porta il bal viers gol; mo leu spendra nies retg dallas "grätschas" Damian Schmed avon lingia. Quella ga ha il CB aunc giu cletg ... - ed il Mario in puschel cavels grischs dapli!!

La 65avla minuta vegn ei allura tensiv avon il gol dil hosp; plitost casualmein secatta nies defensur dretg Sandro persuls avon il goli. Cunquei ch'el metta a sesez il bal empau memia anavon vegn il goli da liberar il davos mument. Treis minutas pli tard vegn il goli denton memia tard sin in bal liung e tucca sinaquei mo pli la comba da nies capitani e quei cuort avon la da sedisch. Ina fetg bun'occasiun per nies giuven Denis Monn, cunquei ch'il Livio ha muort ina blessura stuiu vegnir remplazzaus gia la 19avla minuta. Cun ina ruasseivladad admirabla e plein perschuasiun plazzescha il Denis il culp liber central ord 16.72m el cantun dretg a bass e lai al goli da Celerina negina schanza. 1:0 pil CB suenter 68 minutas!!! In giugadur pretenda suenter il giug dad haver predetg ch'il CB mondi en avantatg quella minuta. Donn ch'el ha buca mess pag tier "bwin" ni "interwetten" ...

Las minutas suandontas sesprova Celerina puspei da surprender il dictat dil giug, quei che dat plaz al CB. Il caucasa vegn aschia adina puspei tier conters malsegirs, ei per part denton memia pauc clevers da nezegiar las schanzas. U ch'ils giugadurs piardan il bal sin via, ch'els dattan pass memia liungs ni ch'els secattan en posiziun d'offside. Panzar sto il CB perencunter aunc inaga la 83avla minuta cura ch'ina pass dall'ala dretga viaden contonscha tuppamein in attaccader digl adversari. Il siet rebatta dalla petga sin in ulteriur giugadur en tgietschen, mo lez para dad haver priu en mira plitost la tabla dils "3 Picturs" ch'il gol dil CB - per cletg! 

Cunquei ch'il CB Trun/Rabius munchenta mo cnap d'alzar il resultat entras ina corna la 87avla minuta, resta ei vinavon tensiv ed in cumbat ella defensiun per vinavon tener la nulla. La 93avla minuta batta il cor da trenaders, giugadurs ed aspectaturs allura aunc inaga empau pli spert. In siet da vart dretga en direcziun cantun liung va mo per pauc sur il gol ora. Cheu havess era il Dani malgrad sia grondezia buca pudiu tier il bal. Cuort suenter schula igl arbiter giu il giug, quei suenter ch'igl ei vegniu clamau giu dil plaz da glatsch beinenqual ga "Schiri! Schiri!" Suenter il giug ha tal schizun remarcau siper igl arbiter ch'el drovi forsa ina nov'ura... 

In grond cumpliment all'equipa per quella victoria che sminuescha igl avantatg da Celerina sin sulettamein dus puncts. Duront igl entir giug ei vegniu cumbattiu dad A tochen Z - ni silmeins tochen Y. Plinavon ei il cletg segiramein era staus silla vart dil CB oz, denton senza cletg funcziuna ei gnanc tiels profis ;-) In grond engraziament era als aspectaturs che han teniu la dira malgrad l'aura e susteniu nus! 

 

Informaziuns: 68' 1:0 Denis Monn

Formaziun: Daniel Monn - Sandro Orlik, Livio Janka (19' Beat Cadruvi), Damian Schmed, Ramon Orlik (71' Carlo Gautschi) - Orlando Monn (87' Christof Derungs), Ivo Albin (57' Denis Monn), Gion-Andrea Nay, Clau Berther - Salvatore Staglianó (C), Remo Alig

Reservas: Christof Derungs, Beat Cadruvi, Carlo Gautschi, Denis Monn, Mattias Candinas

 

bènaltè! - il magazin dil cb

   
1. ediziun - 2016   2. ediziun - 2017   3. ediziun - 2018