contact

CB Trun/Rabius

Caum postal 153

7166 Trun

+41 78 789 74 36

secretari@cb-trun-rabius.ch 

 

© 2018 by cb-trun-rabius.ch

recaltgau perschuadidamein treis puncts

Las lunas da s. Pieder ein questa sesiun deplorablamein adina tema en connex culs giugs da ballapei dil CB, aschia era puspei questa fin d'jamna. Da  temperaturas relativamein freidas per da quei temps ed in vent pulittamein scardaliu, denton senza la neiv temida e da certins forsa schizun desiderada, ha Trun/Rabius retschiert a Pustget igl adversari da Cuera 97. Suenter la sperdita el derbi encunter Tavanasa la dumengia vargada levan ils giugadurs mussar ina reacziun positiva e salvar tut ils treis puncts en vischnaunca. 

L'equipa da casa entscheiva il giug cun beinenqual surpresa sch'ins mira silla formaziun eligida dils trenaders; bein restan ins fideivels al 4-4-2 usitau, perencunter ruchegia il Ramon ina posiziun anavon ed il Salvatore per consequenza era - aschia ch'el sesanfla davontier ensemen cul Carlo. La defensiun e la schinumnada "zaunga dall'ala" ("Flügelzange" per adherents dil tudestg) consistent dil Clau ed igl Orlando resta.

L'entschatta dil giug marscha aunc buca bia, cun excepziun d'entgins corners ed ina ni l'autra flanca. Quellas vegnan pil pli pigliadas giu dils defensurs en tgietschen. Ei para ch'omisduas equipas drovien aunc empau temps da sesanflar. Suenter biebein 20 minutas entscheiva allura il CB a smaccar empau pli savens ch'ils da Cuera. Malsegir vegn la 24avla minuta in culp liber da biebein 25m da vart miez-dretga avon la da sedisch; il siet dil Ramon el cantun liung vegn il goli da parar ad ina corna. La flanca da lezza meina il Schmed cul tgau empau sper la finamira ora. La 29avla minuta metscha igl Orlando suenter in bi pass liung ord il miez dil defensur. Sin fundament d'in sbagl dil goli sesanfla igl Oli persuls avon gol, vegn entras il moviment deplorablamein buca da controllar il bal sco giavischau e sieta quel eifer semenar ella petga. Treis minutas pli munchentan ina tgaua dil Salvatore e dil Damian mo per pauc il gol da Cuera. En quellas minutas para il gol mo dad esser ina damonda dil temps, pertgei il giug sespleiga ussa plitost ella mesadad encunter Rabius. 

La 37avla minuta eis ei allura schilunsch. Entras in bal liung ord il center vegn il Salvatore lantschaus silla vart dretga; cun in pass ponderau sil Clau ed in ulteriur sil Beat semova tal en ina situaziun adattada per sittar e segirescha cun in ferm siet igl 1:0 pil CB. Duas minutas pli tard sepresenta al capitani schizun la caschun d'alzar il resultat sin 2:0 - quei suenter ina malprecauziun da vart dil hosp. En quella situaziun fuss ei stau la megliera decisiun da sittar directamein sin gol enstagl da vuler metter "quer" il bal pil collega. Tochen da pausa resta Trun/Rabius dapli en possess dil bal e sesprova vinavon da far squetsch sil gol da Cuera. Tut en tut ei il CB vegnius nuota mal a frida cullas relaziuns da vent l'emprema mesadad. La secunda vala ei allura da dar encunter il vent. 

Strusch sil plaz entscheiva il caucasa immediatamein puspei a far squetsch en direcziun gol silla vart dil kiosc. Gia la 46avla minuta vegn igl Oli ad ina buna caschun; siu siet vegn denton deflectaus d'in defensur. Il siet suandont dil Salvatore munchenta mo per pauc il rectanghel d'alumini. Il cumbat constat legreivlamein era suenter pausa gia naven dall'entschatta. Aschia vegnan ins per gronda part d'evitar che Cuera vegni da baghegiar si siu agen giug e vegn sez tier bunas occasiuns. Aschia vegn la 57avla minuta il Livio tier sia schanza d'alzar il resultat. Il culp liber ord posiziun centrala biebein 20m avon gol petga il defensur central culla nr. 7 allura a moda perschuadenta sper il mir, il goli e la petga ellas maschas - 2:0! Sin fundament dalla prestaziun mussada ed igl engaschi da tut ils giugadurs en ner-alv ei quei resultat pli che meritaus. 

Deplorablamein sto Trun/Rabius la 64avla minuta veser co il bal rolla sur l'atgna lingia da gol - quei suenter ina malcapientscha ella defensiun. Sco sch'il cuntergol havess fatg vegnir malsegirs ils giugadurs dil CB, reussescha ei las minutas suandontas da vegnir meglier el giug. La 73avla minuta sto nies goli Andri menar in culp liber sur la latta. Legreivlamein ord nossa vesta vegn Cuera denton buca da finalisar las attaccas tenor lur giavisch. Silla vart cuntraria sedattan sporadicamein schanzas da gol pil caucasa, las qualas paran pulit empermettentas - oravontut sch'ellas vegnan giugadas sur l'ala seniastra; aschia succediu la 79avla minuta. In bal liung ord il center pren igl Oli giu, metta quel directamein sper il defensur ora e cun in siet beinmesirau spedescha el il bal dil cantun dalla da sedisch anora viaden egl anghel dretg dil gol. Gnanc tgisà in bellezia gol che sutlingescha sia prestaziun duront il giug dad oz - insumma quel dall'equipa da casa. Il 3:1 ei in meret da tuts endisch giugadurs sil plaz. 

Tschun minutas suenter aulza il Remo sin 4:1 per Trun/Rabius. Avon la da sedisch emprova il Denis endinadamein da puder tier il bal dil defensur en tgietschen, damogna quei e lantschescha allura cun in pass exact il dretg mument il Remo, il qual ha "mo" pli da stuschar il bal el cantun liung ellas maschas. Ina veramein bial'acziun havess pauc pli tard schizun saviu muntar il 5:1. Il siet dil Daniel passa denton la petga silla fallida vart... Aschia terminescha igl arbiter il giug suenter 90 minutas cul resultat da 4:1 pil CB Trun/Rabius. 

Tut en tut ha l'emprema equipa mussau ina prestaziun perschuadenta, plein cor, cun bien engaschi e bialas cumbinaziuns - tut quei malgrad il vent pulit ferm e tut auter che semplas relaziuns per dar ballapei. Tier beinenqualin para il nuv dad esser sesligiaus - per tgei motivs era adina ;-) 

Da menziunar specialmein ei ch'in aspectatur stinau insista naven dalla midada dall'ura sin sia caultscha cuorta, sco era in T-shirt - in ver exot denter ils ulteriurs aspectaturs pachetai en sco per in'expediziun al Pol dil nord ... Tuttina da smarvegliar ch'el ha tratg en in pullover la secunda mesadad; matei ch'el ha buca vuliu curdar si memia fetg viers ils ulteriurs ...

En scadin cass admettein a tut ils aspectaturs che han malgrad las temperaturas scardalidas anflau la via a Pustget in grond engraziament pil sustegn. Proxima fin d'jamna stat il giug a Razén sil program. Cun ina tala prestaziun eis ei en tutta cass pusseivel da segirar silmeins in punct. 

 

Informaziuns: 37' 1:0 Beat Cadruvi, 57' 2:0 Livio Janka, 64' 2:1 Cuera 97, 79' 3:1 Orlando Monn, 84' 4:1 Remo Alig

Formaziun: Andri Nay - Sandro Orlik, Damian Schmed, Livio Janka, Fabian Cajacob (34' Beat Cadruvi) - Orlando Monn (88' Mattias Candinas), Ivo Albin (55' Denis Monn), Ramon Orlik, Clau Berther (75' Daniel Monn) - Carlo Gautschi (81' Remo Alig), Salvatore Staglianó

Reservas: Beat Cadruvi, Daniel Monn, Denis Monn, Mattias Candinas, Remo Alig

bènaltè! - il magazin dil cb

   
1. ediziun - 2016   2. ediziun - 2017   3. ediziun - 2018