contact

CB Trun/Rabius

Caum postal 153

7166 Trun

+41 78 789 74 36

secretari@cb-trun-rabius.ch 

 

© 2018 by cb-trun-rabius.ch

meritadamein negins puncts el derbi ...

Suenter in'entschatta dalla runda da primavera dalla marca plitost mediocra ed ina preda da quater puncts ord ils emprems dus giugs ei il derbi tradiziunal encunter l'US Danis-Tavanasa staus sil program. Cunquei ch'il CB sesanflava avon il giug al tgamun dalla tabella da 4. ligia levan ins secapescha mantener quella posiziun. En quei senn fussen treis puncts vegni pli che d'engrau en quella fasa dalla sesiun. Ina victoria encunter il rival havess en sesez denton era gia d'esser motivaziun avunda ...

L'emprema mes'ura dil derbi ei per gronda part empau distracta e negin'equipa vegn propi da mussar il ballapei desiderau - oravontut da vart dils trenaders. Pil pli vegn operau cun bals liungs - empau in "Gekicke" sch'ins astga dir quei aschia. Las acziuns anavon vegnan buca propi giugadas culla perschuasiun necessaria e savens maunca il davos tierz la precisiun, aschia che biars bals van tgunschamein a piarder. Tscheu e leu maunca plinavon la communicaziun ed igl uorden eifer las differentas lingias sil plaz. Igl ei veramein buc in deletg pils numerus aspectaturs - ni pils egls ni pil rest dil tgierp; quei era muort las temperaturas ed il vent relativamein freid. 

Sporadicamein vegnan ils giugadurs d'ina u l'autra equipa tuttina avon gol. Aschia sepresenta la 13avla minuta in'occasiun da gol al CB, quei entras in culp liber ord biebein 20m pulit central. Il goli lai rebatter il siet da nies capitani, denton ei negin semtgaus pil secund bal. Silsuenter suondan divers siets ord la secunda retscha, denton era cheu puspei nuot che stuess vegnir menziunau specialmein. Sulettamein la 30avla minuta sto nies goli Andri menar in siet d'in giugadur en blau sur la latta. Diesch minutas pli tard zunghegia il Dani cun in schinumnau "Schlenzer" il goli dall'USDT ad ina parada. 

Cun excepziun dallas scenas menziunadas va denton pauc ni nuot ensemen tier Trun/Rabius. Ei maunca aunc adina la precisiun, oravontut suenter ch'ins gudogna il bal ell'atgna defensiun e savess lantschar in conter. Tals "bals da deliberaziun" anflan savens puspei la via els peis al caucasa, aschia ch'ei reussescha buca propi al CB da sedeliberar; per cletg vegn era Tavanasa buca da nezegiar quellas caschuns. Aschia va ei cun in pari senza gols en cabina. 

Suenter pausa para il CB cuortamein da mussar dapli veglia da far il gol. La 49avla minuta havess quei gia saviu esser realitad: Ina malcapientscha ella defensiun dils giugadurs en blau havess bunamein muntau il 0:1. Il siet digl Ivo ei denton memia fleivels e vegn la finfinala sclarius cuort avon la lingia da gol. Il conter suandont lantschaus dil goli sez havess allura schizun saviu menar agl 1:0 pils da Tavanasa. Il siet munchenta numnadamein mo per pauc la finamira desiderada. Il derbi ei vinavon disputaus ed ils cumbats vegnan per part menai pulit dir - pitgadas, combas stendidas e solas aviartas vegnan tscheu e leu repartidas sco las hostias en baselgia ... 

La 55avla minuta vegn allura puspei in attaccader dall'equipa da casa lantschaus cun in liung kick dil goli. Malgrad sia rutina sutschazegia il defensur central Gion il bal, aschia ch'igl attaccader sa cuorer quasi tut persuls sin gol. Ni l'acziun da deliberaziun dil Ramon ni il reflex digl Andri tonschan denton per evitar il gol. 1:0 per Tavanasa. Sin fundament dalla prestaziun gnanc aschi nunfadegiau ...

Il CB ha perencunter buca l'intenziun da spiarder il giug. Aschia aulza el empau la cadenza e vegn tscheu e leu vinavon tier siets ord la secunda retscha; quels munchentan sco las emprovas precedentas denton in suenter l'auter la finamira. Malsegirs vegn il hosp allura suenter cornas. Buca meins che treis cornas anflan mintgamai ina testa d'in giugadur en ner-alv - denton maunca la precisiun e la forza, sco forsa era la perschuasiun da vuler spedir il bal ellas maschas. Ils bals crodan quasi tuts els mauns al goli dall'USDT; igl ei da scarpar ora cavels per beinenqualin sper lingia. 

Sco quei ch'igl ei allura savens el ballapei, secumprova la "regla nunscretta" da "Tgi che fa buc els - survegn els" la 70avla minuta. Il bal vegn bess en dall'ala dretga sin in giugadur central dil caucasa; lez fa buca liungas e metta il bal amiez nua ch'in attaccader petga il bal cun tutta forza el cantun liung pil 2:0. Cheu ha il CB durmiu cumpleinamein. 

La 84avla minuta stat allura vonzeivi il Clau suenter ina flanca dall'ala seniastra tut persuls avon il gol; lez parescha igl emprem siet, il bal rebatta anavos tiel Clau ed in defensur resgia allura el sc'in bostger ina plonta. Il penalti al 2:1 sieta il Livio - inaga dapli a moda pulit suverana. Las minutas suandontas munchenta il CB dad egalisar al 2:2, aschia ch'il schul final digl arbiter munta medemamein ina sperdita dil derbi.

Suenter bunas prestaziuns a caschun dils derbis dils davos onns eis ei questa dumengia stau nuot auter che meritau ch'ins ha stuiu bandunar Mutteins senza puncts. Tut en tut ha la precisiun muncau oravontut il davos tierz dil plaz, sco era la communicaziun ed in ni l'auter che havess tratg l'equipa cun perschuasiun. Quei ei deplorablamein reussiu darar duront quei giug, aschia ch'ins sto prender sesez pil nas e sespruar da migliurar entgins puncts sils giugs che spetgan. 

 

Informaziuns: 55' 1:0 US Danis-Tavanasa, 70' 2:0 US Danis-Tavanasa, 84' 2:1 Livio Janka (P)

Formaziun: Andri Nay - Sandro Orlik, Ramon Orlik, Gion Andrea Nay (80' Livio Janka), Fabian Cajacob - Daniel Monn (65' Orlando Monn), Beat Cadruvi, Salvatore Staglianó, Clau Berther - Ivo Albin, Remo Alig (45' Denis Monn)

Reservas: Orlando Monn, Livio Janka, Christof Derungs, Denis Monn, Carlo Gautschi

bènaltè! - il magazin dil cb

   
1. ediziun - 2016   2. ediziun - 2017   3. ediziun - 2018