contact

CB Trun/Rabius

Caum postal 153

7166 Trun

+41 78 789 74 36

secretari@cb-trun-rabius.ch 

 

© 2018 by cb-trun-rabius.ch

negins gols a tinizong

Pil secund giug da primavera ei l’emprema dil CB Trun/Rabius serendida Gliendisdis Pastgas a Tinizong. Lur adversari, il CB Surses sesanfla cun 10 puncts plitost alla cua dalla tabella. Ei sto denton era vegnir menziunau ch’els han giugau l’entira runda d’atun ordeifer muort la renovaziun dil plaz da ballapei a Tinizong. Pils hosps deva ei tuttina mo ina finamira: recaltgar treis puncts e vargar il capogruppa da Celerina.

L’emprema emprova naven dall’entschatta da surprender il commando dil giug e vegn gia suenter 5 minutas tier las empremas bunas occasiuns da gol. Suenter in culp liber dalla vart vegn nies defensur Livio tut libers tier in siet ch’il goli da Surses sa denton aunc menar entuorn la petga. La suandonta corna porta quasi ina copia dalla situaziun precedenta: siet Livio ed ina parada miraculusa dil goli. Suenter quellas acziuns capeta in dètg mument nuot che vala la peina da vegnir menziunau el rapport. Ils giugadurs en ner ed alv emprovan da vegnir cun cumbinaziuns ella zona malsegira da Surses, denton gartegia quei fetg darar. Sbagls tecnics, il plaz ch’ei relativ dirs, fetg sperts e per part malulivs, sco era igl adversari che marca nos giugadurs fetg stretg fan buc sempel da mussar in ballapei cultivau. Aschia vegn sin omisduas varts giugau cun biars bals liungs che vegnan pil pli pigliai giu dils defensurs.

Claras schanzas da gol dat ei en quella fasa sin negina vart. Ils siets en direcziun dil gol da Surses vegnan bloccai ni ch’els munchentan claramein la finamira. Il caucasa vegn sporadicamein suenter sbagls ella defensiun tier mesas schanzas da gol. Cuort avon pausa vegn in giugadur da Surses da mitschar sur l’ala seniastra ed entra ella da sedisch. Buzzi cuora sper il giugadur ed ei dat in pign contact vid il pei. Igl arbiter che ha atgnamein ina ideala vesida sin quella scena mussa per surpresa da giugadurs e fans da Trun/Rabius immediat sil punct. In Engles vess mo ris sur da quella decisiun. Basta, seigi sco ei vegli; igl Andri vegn pia confruntaus cun il secund „bènaltè“ en il secund giug da primavera. Il giugadur en clar-verd pren catsch e setta il bal cun tutta forza sur il gol ora – pli datier dil lidimer che dil gol. Puuh, tgei cletg! Aschia va ei cun il resultat da 0:0 ella pausa.

Da pausa dat ei neginas midadas e Trun/Rabius dat vinavon mo cun in attaccader. Tuttina han ins il sentiment ch’il te da pausa hagi fatg bein als hosps. Els dattan ussa cun dapli perschuasiun encunter anavon ed era l’agressivadad ei anavos. Gia suenter duas minutas vegn Clau tier in siet ord 16 meters suenter in bi pass dubel cun Salva. Quei siet ei denton memia centrals e buc in grond problem pil goli. Cuort suenter setschenta ina flanca digl Oli sil Beat che stat persuls ella da sedisch. El pren en il bal e tucca era buc la noda. Il siet direct ni in „péz controllau“ fuss forsa stau la megliera sligiaziun. Uss para  il CB da ver enta pugn il giug ed ei vesa ora sco sch‘il gol seigi mo pli ina damonda dil temps. La 60avla minuta vegn aunc inaga Beat tier ina buna occasiun. Suenter ina midada da vart (Seitenwechsel) dad Oli vi sin Clau dat lez in bellezia pass sil Beat ch'ei currius davos dies vi ad el. Beat pren quella ga il bal direct, denton vegn il goli da parar il ferm siet a bass cul pei.

Suenter quell’acziun dat ei denton ina bloccada el giug dall’emprema. Tuttenina gartegia nuot pli ed ei dat pli e pli biars sbagls individuals. Ils da Surses han ferdau la puorla ed emprovan ussa sez da far squetsch sin la defensiun da Trun/Rabius e da marcar in gol. In siet da distanza sa igl Andri aunc pescar ord il winkel cun ina biala parada. La corna che suonda vegn buc defendida consequentamein ed il secund bal setschenta sil pei dad in giugadur da Surses che spetga sin la da sedisch. Siu siet va atras tuts e setschenta ella petga – aunc inaga cletg. Surses ha silsuenter enqual schanza entras standards, vegn denton era buc da marcar in gol. Las davosas minutas dil giug emprovan omisduas equipas aunc da sfurzar in „Lucky Punch“. Las acziuns ein denton fetg hecticas e bia fouls pigns (ed in pèr pli grops) prendan il slontsch dil giug. Tut las breigias ein per nuot ed aschia terminescha igl arbiter il giug suenter 94 minutas.

In 0:0 encunter il tierz-davos dalla tabella: Sin l’emprema egliada vesa ei ora da dus puncts spiars en il cumbat pigl emprem plaz. Ins sa denton esser cuntents ch’ei ha silmeins dau quei punct enstagl dad insumma negins. Suenter pausa ha Surses numnadamein giu dapli dil giug e las pli malsegiras occasiuns. Forsa fuss ei stau meglier da dar cun dus attaccaders ni da far pli bia pressing sils defensurs. Sur da quei san ins discussiunar ditg. Ina caussa ei deton segira: Sche l’equipa vul batter ils vischins da Danis/Tavanasa la dumengia proxima (Mutteins, 14:00 uras), drova ei ina megliera prestaziun da mintgin e dapli efficienza avon gol.

Zatgei positiv ei tuttina aunc da menziunar. Era mo cun in remis e muort pli paucs puncts da puniziun surpren Trun/Rabius igl emprem plaz da Celerina. E per la secunda ga en seria stat la nulla davostier. Engraziel fetg ad ils aspectaturs che han priu la via sut ils peis e sin seveser dumengia o Mutteins.

 

Formaziun: 4-2-3-1

Andri Nay – Fabian Cajacob, Damian Schmed, Livio Janka, Sandro Orlik – Beat Cadruvi (79‘ Gion Andrea Nay), Ivo Albin – Clau Berther (75‘ Denis Monn), Salvatore Staglianó (88‘ Ramon Orlik), Orlando Monn – Remo Alig (65‘ Dani Monn)

Reservas: Dani Monn, Denis Monn, Gion Andrea Nay, Ramon Orlik

 

Damai ch'il Remo ei duront l’emprema mesadad staus ualti isolaus leu davon tut persuls havessen ins forsa saviu midar il sistem e giugar in tec pli offensiv. 

bènaltè! - il magazin dil cb

   
1. ediziun - 2016   2. ediziun - 2017   3. ediziun - 2018