contact

CB Trun/Rabius

Caum postal 153

7166 Trun

+41 78 789 74 36

secretari@cb-trun-rabius.ch 

 

© 2018 by cb-trun-rabius.ch

victoria sco finiziun dil campiunadi 2018

La fin dil campiunadi d'atun 2018 ei il cumbat pil secund plaz en tabella da 4. ligia staus sil program - quei encunter in tierz-rangau Schluein-Glion. Suenter plitost magras prestaziuns ils giugs precedents han ils giugadurs stuiu semussar dad in'autra vart oz per recaltgar treis puncts.

Punct las treis ed avon ina biala culissa dat igl arbiter pulit giuven liber il giug a Pustget. Gia naven dall'entschatta vulan omisduas equipas semussar da lur megliera vart. Il giug ei marcaus da beinenqual cumbat - certs cumbats vegnan era menai cun empau dapli engaschi da tgierp che lubiu. Tonaton vegn ei era dau ballapei e cun far spert reussescha ei a Trun/Rabius da sittar igl emprem gol gia suenter 10 minutas da giug. Igl arbiter annullescha denton il gol muort ina posiziun dad offside - en ses egls... Dall'ala dretga haveva il Clau purtau il bal viers il gol, dau in pass davon quel en, nua che Livio haveva stuschau il bal ellas maschas. Aschia resta ei denton tier il 0:0. Il CB lai denton buc irritar e sesprova vinavon da dar sin gol; ei maunca perencunter empau la precisiun il davos tierz ed aschia resta ei ditg tier in giug senza gols - denton cun schanzas da gol. La 26avla minuta vegn ei tier in culp liber malsegir avon la da sedisch dil caucasa. Il siet parescha nies goli Sandro e meina il bal sur la latta ora per ina corna, la quala porta era negin avantatg a Schluein-Glion. 

La fasa suandonta surpren Trun/Rabius allura per part il commando dil giug e dat per part buca mal. Cun far spert reussescha ei tscheu e leu da vegnir silmeins ella da sedisch - denton tonscha ei pér la 41avla minuta per far il gol. Cun in pass per la letga empau memia liungs vegn igl Orlando lantschaus sill'ala seniastra; il goli dil hosp vegn ora pil bal, lai denton dar quel ord maun. Aschia pren igl Oli l'iniziativa, dat il bal beinponderau anavos, nua che quel vegn immediat spedius ella da sedisch. Leu spetga nies attaccader Patrizio e marchescha cun in siet empau acrobatic igl 1:0! Cun quei resultat va ei la finala ella cabina. 

Suenter pausa seconcentrescha l'equipa da casa allura la plipart dil giug plitost sil defender e sin conters; il cumbat constat dad A tochen Z ed aschia vegn Schluein-Glion era la secunda mesadad buca tier schanzas marcantas. Il siets cul tgau sin gol suenter situaziuns da standard vegnan goli e defensiun da sclarir ed era schiglioc dat ei pauc da nudar pil hosp, malgrad che quels ein la plipart dalla secunda mesadad en pussonza dil bal. Era sche Schluein posseda dapli il bal, vegn il CB tier beinenqual occasiun da gol - e quei gia baul suenter pausa. In penalti pli che clar schula igl arbiter denton buca giu - exact tuttina entginas minutas pli tard in tuc dil bal cul maun d'in defensur en mellen-alv ella da sedisch. Cheu havess il CB duas ga stuiu retscheiver in penalti - ni "bènaltè" sco nus schein! 

La secunda mesadad ei en quei senn marcada dad empau hectica e scenas dispiteivlas sco quellas ch'ein gest vegnidas numnadas. Da l'auter maun havess nies defensur culla numera quater era buca astgau tugnar sch'el havess stuiu bandunar il plaz empau pli baul entras in foul tactic e cun ina carta melna gia sil conto... Aschia cuntinuescha il giug cun endisch encunter endisch ed il culp liber porta era negina midada dil resultat. Quei succeda pér la 86avla minuta entras il secund gol dil caucasa. In conter sur l'ala dretga entras nies cametg Clau siara igl Orlando giu cul gol al 2:0. Cun quei ei il resultat final clars ed al CB reussescha ei suenter ditg puspei da tener la nulla davostier. 

Malgrad ch'igl ei buca stau ina oreifra prestaziun arisguard il dar ballapei, ha il cumbat constau dad A tochen Z tier ils endisch giugadurs en ner-alv. Cun dar clever e nezegiar silmeins duas dallas schanzas da gol eis ei reussiu dad ir en avantatg e davostier han ins communablamein teniu la vesta alva. La finala quentan sulettamein ils treis puncts che stattan la fin dil giug sil conto e che segireschan al CB il secund plaz ella tabella da 4. ligia. 

En quei connex vala ei d'engraziar a nos numerus aspectaturs che han susteniu nus duront quei giug ed insumma duront questa entira sesiun puspei - ENGRAZIEL FETG! Aschia fa ei semplamein plascher da dar ballapei! 

 

Informaziuns: 41’ 1:0 Patrizio Decurtins, 86’ 2:0 Orlando Monn

Formaziun: Sandro Tomaschett – Fabian Cajacob, Damian Schmed, Livio Janka, Sandro Orlik – Clau Berther (88' Dario Schuoler), Beat Cadruvi, Salvatore Staglianó (C), Orlando Monn – Patrizio Decurtins, Remo Alig (72' Daniel Monn)

Reservas: Flavio Schuoler, Carlo Gautschi, Ramon Orlik, Denis Monn, Daniel Monn, Dario Schuoler

 

bènaltè! - il magazin dil cb

   
1. ediziun - 2016   2. ediziun - 2017   3. ediziun - 2018