contact

CB Trun/Rabius

Caum postal 153

7166 Trun

+41 78 789 74 36

secretari@cb-trun-rabius.ch 

 

© 2018 by cb-trun-rabius.ch

treis puncts sco suletta conscolaziun per ina plitost magra prestaziun

Questa fin d'jamna ei il tenor dils trenaders dall'emprema equipa staus clars: treis puncts ei il sulet resultat ch'ins astga spitgar en in tal giug. Suenter la terrada dalla dumengia vargada encunter Celerina leva l'emprema equipa per tut prezi puspei turnar sill'endretga via.  

Il CB Trun/Rabius surpren allura era gest naven dall'entschatta il dictat dil giug e muossa tgi ch'ei il schef sil plaz. Sulettamein la precisiun maunca il davos tierz per saver giubilar l'emprema ga. Quei mument lai denton buca spitgar ditg sin el: L'otgavla minuta eis ei numnadamein il Patrizio che marchescha suenter in bi pass liung dil Salvatore sur la defensiun igl 1:0 pil caucasa - quei suenter haver menau ora il goli ed ord in anghel fetg git. Pauc pli tard havess il Denis saviu alzar il resultat sin 2:0 sch'el havess purtau ina numera da calzers pli aulta. Il davos cletg maunca pia en quella scena. 

Las minutas suandontas piarda il giug allura sco ord il nuot cumpleinamein la tensiun. "Das Spiel plätschert so vor sich hin", schess il tudestg... Sulettamein in culp liber dil Livio la 30avla minuta ed in siet sur il gol ora suenter in sbagl ella defensiun meretan da vegnir menziunai sco scenas impurtontas avon pausa. 

Suenter pausa semuossa per gronda part il medem maletg als aspectaturs: Ils giugadurs dad omisduas equipas ein plitost letargics, bia sbagls e sperditas da bals semplas impedeschan ina buna circulaziun dil bal e consequentamein sedattan era neginas schanzas da gol. Per dir sincer eis ei denteren propi da star mal pils aspectaturs ch'ein serimnai oz a Pustget per mirar ballapei. In pign radi da sulegl porta la finala in siet ord biebein 30m dil Sandro - quei la 64avla minuta. Il goli parescha denton quel. Diesch minutas pli tard liberescha in defensur en blau sin lingia il siet dil Remo. Cun quei gol havess il CB saviu serrar il sac e purtar a casa ils treis puncts. Ei suonda denton beinenqual scena che fa scurlar trenaders ed aspectaturs il tgau.

La 78avla minuta vegn Domat envidaus dad egalisar il giug; malgrad ch'igl Andri parescha igl emprem siet, surlain ils giugadurs da Trun/Rabius il bal vinavon agl attaccader da Domat che sa far sia tura ella da sedisch e sittar ord ver 10m - senza vegnir attaccaus. Igl 1:1 ei in ver schenghetg! Sco per dir che quei seigi stau mo in sbagl da cosmetica aulza il CBTR allura la cadenza e lantschescha immediat suenter sill'ala dretga il Clau. Lez porta il bal encunter miez, dat ina flanca pulit "scharfa" sil Tiz e lez marchescha mo ina minuta pli tard a moda acrobatica il 2:1.

Quei duess atgnamein esser stau il mument che tuts endisch giugadurs en ner-alv havessen giu da vegnir neunavon e segirar ils treis puncts. Cuort suenter san quels entuorn il plaz denton puspei mo scurlar il tgau. Il secund schenghetg a Domat porta il 2:2. In pass dil goli anfla la via directa els peis ad in attaccader da Domat, il qual ha bunamein treis uras peda da tschentar il bal sin siu pei ferm e da sittar quel ella reit. 

La fin dil giug ei marcada da hectica; naturalmein vul Trun/Rabius gudignar quei giug. Ils siets da Salvatore (88') e Livio (92') falleschan denton per pauc la finamira. La 94avla minuta retscheiva il caucasa allura in culp liber cuort avon la da sedisch, il qual vegn deviaus ad ina corna. Sco els megliers crimis e films da sport eis ei clar tgei che schabegia uss: Il bal vegn sittaus amiez avon gol nua ch'il Remo spetga. Lez pren en il bal e setta quel viaden ellas maschas pil 3:2 che segirescha ils treis puncts a Trun/Rabius e che munta la suletta consolaziun per tuts pertuccai. 

Suenter la prestaziun dalla gronda part dil giug ha il CB atgnamein buca meritau ils treis puncts. Il positiv ei ch'ins ei malgrad la moda e maniera pil pli letargica vegnius da sittar in gol dapli ch'igl adversari; la finfinala ei quei il sulet che quenta cura ch'igl arbiter schula giu il giug. Ils davos dus giugs dalla sesiun d'atun vala ei denton da prender il det ord il tg... e da mussar ina megliera prestaziun sch'ins vul bandunar il plaz sco victurs. 

 

Informaziuns: 8’ 1:0 Patrizio Decurtins, 78’ 1:1 FC Domat/Ems, 79' 2:1 Patrizio Decurtins, 81' 2:2 FC Domat/Ems, 94' 3:2 Remo Alig

Formaziun: Andri Nay – Ramon Orlik (46' Christof Derungs), Damian Schmed, Livio Janka, Sandro Orlik – Denis Monn (46’ Remo Alig), Beat Cadruvi, (73' Carlo Gautschi), Salvatore Staglianó (C), Orlando Monn – Patrizio Decurtins, Daniel Monn (61' Clau Berther)

Reservas: Christof Derungs, Carlo Gautschi, Clau Berther, Remo Alig

 

bènaltè! - il magazin dil cb

   
1. ediziun - 2016   2. ediziun - 2017   3. ediziun - 2018