contact

CB Trun/Rabius

Caum postal 153

7166 Trun

+41 78 789 74 36

secretari@cb-trun-rabius.ch 

 

© 2018 by cb-trun-rabius.ch

recaltgau in punct la davosa minuta

Suenter quater victorias consecutivas ils emprems quater giugs da sesiun han ils trenaders spitgau nuot auter che treis puncts dall'emprema equipa - beinsavend ch'ei spitgava buc in sempel giug ed oravontut buc ina fleivla equipa cun Razén. 

Punct las 15:00 uras dat igl arbiter liber il giug a Pustget; quei da bialaura e pulit cauldas temperaturas per quei temps. Il CB entscheiva buca mal, denton era Razén vegn spert el giug. Ins senta gia baul ch'igl adversari sa dar ballapei e vul bandunar il plaz cun puncts - e da vart da Trun/Rabius vul ei buca propi gartegiar cun acziuns sin gol. Memia savens fans ins grev a sesez la veta entras pass malexacts ni malcapientschas oravontut culs giugadurs dallas alas. Las midadas da vart ed ils pass che duessen lantschar nossas duas alas Olli e Denis setschentan pil pli tier il goli da Razén. Plinavon ein ils giugadurs en ner-alv savens era in pass memia tard las empremas minutas. Las flancas ella da sedisch vegn la defensiun perencunter pil pli da sclarir senza miserias - silmeins tochen las 19avla minuta. Dalla vart dretga vegn ina flanca ella da sedisch dil caucasa, la quala il goli Sandro vul pitgar naven culs pugns. Enaquella seglia denton era igl auter Sandro siadora ed il bal setschenta dad in Sandro en tschei Sandro e la finfinala en gol - tgei tup gol puspei inaga da vart dil CB...! Il smiley tgietschen (grittentau) dil Mario fuss cheu segiramein adattaus per descriver quella scena... 

Suenter quei cuntergol ha il CB vinavon miserias da vegnir el giug. Per cletg vegn denton era il hosp buca da purtar il bal malsegir avon gol ni da sittar in siet che procurass per empau tensiun. Da l'autra vart reussescha ei per casualitad al Patrizio da vegnir tiel bal. Il siet ord biebein 32m munchentqa denton per pauc la finamira. Ina buna caschun sedat allura la 35avla minuta entras in culp liber dil Livio - quei suenter haver stuschau il bal sper il mir ora. Il siet dil Livio vegn menaus giu d'in defensur en ner e sgola cnap sper il gol vi. Cul resultat da 0:1 va ei pia ella pausa. 

Il te da pausa para dad haver procurau per novas forzas tier il caucasa. Il CB vegn numnadamein pli perschuadius ord cabina e vul per tut prezi salvar silmeins in punct a casa. Aschia domineschan els suenter pausa quasi cumpleinamein il giug e vegnan tier beinenqual buna caschun. Tscheu e leu maunca denton la davosa precisiun ni ch'igl arbiter schula anavos giugadurs che partan da posiziuns correctas... Razén operescha pil pli cun bals liungs; cun quels ha la defensiun dil CB Trun/Rabius denton era vinavon negina miseria. Aschia resta il giug tensivs tochen la davosa minuta. "Il giug ei finius pér cura ch'igl arbiter ha schulau giu", ha ei enconuschentamein num. Quella construcziun descriva il meglier la situaziun dallas davosas minutas a Pustget; ferton che Razén ha gia duront l'emprema mesadad entschiet a dar sin temps, ha il CB vinavon dau bal ed empruau da far tut il pusseivel per silmeins egalisar il resultat. Quei reussescha allura era la 94avla minuta: In bal che para piars ora sill'ala seniastra damogna nies capitani Salvatore aunc ella da sedisch nua ch'il Patrizio Tiz caposettagols spetga. Il giugadur numnau metta il bal beinponderau cul tgau ellas maschas pigl 1:1! Tgei drama la fin dil giug!! 

Las minutas restontas schabegia ni sin ina ni sin l'autra vart enzatgei che fuss da menziunar. Aschia salva in gol fetg tard in punct al caucasa, il qual ha mussau bien caracter oravontut la secunda mesadad dil giug. Entras igl engaschi da mintga singul sil plaz e la veglia da vuler far il gol eis ei reussiu communablamein dad egalisar. Il punct ei segiramein meritaus. Proxima dumengia spetga medemamein in grev giug a Celerina; lein sperar che la buna fuorma dil CB Trun/Rabius tegni era vinavon e ch'ins tuorni puspei cun silmeins in punct ord l'Engiadina. In cordial engraziament aunc als numerus aspectaturs per lur sustegn! - HOPP TRUN/RABIUS! 

 

Informaziuns: 19’ 1:0 SC Razén, 94’ 1:1 Patrizio Decurtins

Formaziun: Sandro Tomaschett – Fabian Cajacob, Damian Schmed, Livio Janka, Sandro Orlik – Denis Monn (44’ Beat Cadruvi), Pietro Jacomet (45' Dario Schuoler), Salvatore Staglianó (C), Orlando Monn – Patrizio Decurtins, Daniel Monn

Reservas: Beat Cadruvi, Ramon Orlik, Dario Schuoler, Christof Derungs

 

bènaltè! - il magazin dil cb

   
1. ediziun - 2016   2. ediziun - 2017   3. ediziun - 2018