contact

CB Trun/Rabius

Caum postal 153

7166 Trun

+41 78 789 74 36

secretari@cb-trun-rabius.ch 

 

© 2018 by cb-trun-rabius.ch

quarta victoria en suite

Suenter la victoria el derbi encunter Tavanasa ha ei giu num per l’emprema da serender giu Cuera per il quart giug dalla sesiun. Avon il giug eran las rollas claramein repartidas: Sco capogruppa e cun tut ils puncts pusseivels sil conto quintava per l’equipa sursilvana encunter la tiarz’equipa da Cuera 97 sulettamein ina victoria.

Cunquei ch'ils dus golis usitai dall’emprema Flavio e Sandro eran omisdus buc a disposiziun per quei giug (Flavio blessaus e Sandro serraus), han ils trenaders bugen ni nuidis stuiu ir alla tscherca da goli. Aschia ei il goli dalla secunda, Andri Nay, vegnius tier sia premiera denter las petgas en quarta ligia. Medemamein muncava il motor da miez Beat. Aschia ha il Damian suenter liung temps puspei astgau dar inaga zanuas auter che davos a miez.

Quellas midadas paran buca da ver fatg bein al CB. L’equipa dalla Cadi dorma numnadamein cumpleinamein giu igl emprem quart d’ura dil giug: Suenter treis minutas sto il Sandro gia sclarir il davos mument e mo duas minutas pli tard ha Cuera puspei ina bun’acziun. La dieschavla minuta vegnan ils giugadurs en mondura cotschna puspei ella da sedisch, nua che Salva fa in foul ed il penalti ei la logica consequenza. Schegie ch’igl attacader sto sittar duas ga il penalti (el veva l’entschatta buc spitgau sin il schul), marchescha el igl 1:0 per la squadra da casa. Cuera perschuada vinavon cun bunas acziuns anavon: La 26avla minuta survegn il Buzzi ina tescha d’in bal el venter. Tgei cletg ston ins dir, pertgei schiglioc fuss quei siet tgunsch ius en gol ed il Buzzi sa cuort suenter dar vinavon. Finalmein vegn lu era il CB tier las empremas schanzas da gol. Mo ni il Tiz cul tgau, ni il Salva cun in siet ord 25 meters vegnan da crear grond malruaus. Igl ei lu puspei Cuera che vegn tier ina schanza… e quella ga sa igl Andri engraziar alla petga ch’el sto buc ina secunda gada prender il bal ord la reit. Quella petga para denton finalmein da ver fatg vegnir neunavon ils davos giugadurs dil CB. Suenter ina biala flanca da Denis marchescha il Salva lu era il gol d’egualisaziun. El pren en la flanca cul seniester e marchescha cul dretg volley igl 1:1 - propi in bi gol. Cun in pari van las duas equipas lu era en la pausa.

Suenter pausa semuossa il CB lu puspei naven dall’entschatta da sia buna vart. Ei drova tuttina bunamein in quart d’ura tochen che l’equipa sursilvana sa ir l’emprema ga en avantatg. Igl Olli aka Speedy Gonzales survarga tut ils giugadurs da Cuera sill’ala seniastra ed era il goli da Cuera vegn o memia tard - penalti! Sco usitau (auter che inaga d’ina nera dumengia a Bogn Ragaz) marchescha nies settapenaltis Livio igl 1:2. E lu ei era nies caposettagols puspei inaga vid la roda: Suenter haver gudignau in cumbat cul tgau fa il Tiz in tipic assist a sesez e marchescha il tierz gol. Buc tschun minutas suenter ei il giug lu era decidius: In bi pass ault dil Tiz ella gassa aulza igl Olli schuber sul goli o e viers la petga setschenta il bal ella reit - era in fetg bi gol. Suenter vegn il giug in tec hectics, quei che ha da far fetg cul secuntener da Cuera. Sil e sper il plaz vegn ei griu ti mordio ed era ils giugadurs van en pli e pli grop els cumbats. Aschia survegn in giugadur da Cuera schizun aunc mussau direct tgietschen suenter in grop foul cul Pietro. La 90avla minuta marchescha l’equipa da casa lu aunc il 2:4. In siet ord cuorta distanza e pil goli Andri buc da tener - quei ei denton mo pli maculatura.

Suenter quater giugs salida il CB dalla testa dalla tabella; e quei cun dudisch puncts. Il start el campiunadi ei veramein gartegiaus ed ils giugadurs han mussau bunas tochen fetg bunas prestaziuns. Proxim’jamna, da rogaziun federala, eis ei negin giug en quarta ligia. En duas jamnas retscheiva il CB lu l’equipa da Razén. Quei vegn segir a dar ina dira lutga, cunquei che Razen ei silmeins sil pupi ina dallas bunas equipas da quella quarta ligia.

 

Informaziuns: 10’ 1:0 Cuera 97 III, 35’ 1:1 Salvatore Staglianó, 57’ 1:2 Livio Janka, 61’ 1:3 Patrizio Decurtins, 64' 1:4 Orlando Monn, 90’ 2:4 Cuera 97 III

Formaziun: Andri Nay – Fabian Cajacob,  Ramon Orlik, Livio Janka, Sandro Orlik – Denis Monn (66’ Kevin Albin), Damian Schmed, Salvatore Staglianó (C) (73’ Pietro Jacomet), Orlando Monn – Patrizio Decurtins (80’ Christof Derungs), Daniel Monn (82’ Dario Schuoler)

Reservas: Kevin Albin, Pietro Jacomet, Dario Schuoler, Christoph Derungs, Carlo Gautschi

Absents: Ivo Albin, Remo Alig, Beat Cadruvi, Mattias Candinas, Pierin Monn

 

bènaltè! - il magazin dil cb

   
1. ediziun - 2016   2. ediziun - 2017   3. ediziun - 2018