contact

CB Trun/Rabius

Caum postal 153

7166 Trun

+41 78 789 74 36

secretari@cb-trun-rabius.ch 

 

© 2018 by cb-trun-rabius.ch

finalmein puspei in derbi plein emoziuns!

Il tierz di da giug dil campiunadi ei il derbi tradiziunal encunter Tavanasa staus sil program pil CB. Suenter duas victorias consecutivas e per part pulit bunas prestaziuns ils davos giugs astgavan ins spitgar in bien giug da Trun/Rabius. Vid la motivaziun duei ei la finfinala buca muncar encunter ils rivals dall'USDT. 

La motivaziun menziunada vesan ins gia naven da bial'entschatta silla vart dil CB; aschia vegn immediat lantschau ils attaccaders suenter ch'igl arbiter ha dau liber il giug. Consequentamein reussescha ei allura era gia baul da sittar igl 1:0. Quel croda gia la 5avla minuta da giug entras igl Orlando. Il giugadur numnau vegn lantschaus ord il miez da nies capitani Salvatore e tila sc'in cametg encunter il gol - e stauscha il bal spert la petga cuort viaden ellas maschas! Tgei entschatta furiusa. Las minutas che suondan reussescha ei aunc tscheu e leu da vegnir malsegirs avon gol, quei adina puspei sur l'ala seniastra digl Orlando ora.  

Suenter quella fasa da pressiun vegn denton era l'USDT meglier el giug. Era igl adversari vegn suandontamein tier occasiuns da gol, quei magari empau memia sempel ed entras tups fouls da vart da Trun/Rabius. In culp liber cuort avon la da sedisch meina la finfinala era agl 1:1 - quei cun in tec cletg... Las minutas suandontas vegn Tavanasa aunc tier ulteriurs siets sin gol, vegn denton buca d'alzar il resultat. Il medem vala pil CB; enzaco maunca la perschuasiun e la levezia dall'entschatta. Malsegir vegn ei denton tuttina tscheu e leu. Bein havess il Beat saviu marcar il gol al 2:1 suenter ch'el ei vegnius da semetter atras encunter treis defensurs en blau e sta tut persuls avon gol - denton il goli parescha a moda suverana. Plinavon vegn era igl Orlando tscheu e leu sc'in TGV dall'ala seniastra giuadora; ils bals ch'el survescha als congiugadurs postai ella da sedisch portan perencunter negin fretg. Cuort avon pausa procura allura in culp liber per battacor sin baun dil CB: La flanca da seniester sutschazegia il Flavio, aschia ch'in attaccader da Tavanasa vegn cul bal sin gol. Leu spetga per cletg il Beat e sclarescha sin lingia! Cun quell'acziun salva il Beat al CB igl 1:1, cun il qual ei va ella cabina.

Cuort suenter pausa vesa igl arbiter vonzeivi "fatamorganas"; il Fabian duessi haver dau suenter al giugadur da Tavanasa che schischeva giun plaun suenter in cumbat, quei ferton ch'il bal era bunamein gia si Rabius e tenor sentiment dils pertuccai suenter quasi 79 secundas pli tard che la scena sezza. Giugadurs ed aspectaturs ston furschar duas ga ils egls per mirar sch'ei seigi buc in siemi; denton igl arbiter muossa perschuadius da sia decisiun sil punct da penalti. Quella caschun nezegia l'USDT per ir en avantatg - 1:2. 

Capeivlamein ein ils giugadurs dil CB agitai - denton era plein decisiun da volver il giug! La 53avla minuta po il Patrizio mitschar da siu adversari; il siet sin gol parescha il goli denton. Quei che vala da menziunar en quei connex ei ch'igl arbiter entras sia decisiun purtau emoziuns el giug; il giug daventa numnadamein pli e pli hectics e secapescha era pli tensivs. Ina minuta pli tard schabegia denton in malfatg; in giugadur da Tavanasa che sesanfla silmeins 3m egl offside va el cumbat cun nies goli Flavio e gartegia quel aschi mal che tal sto vegnir transportaus giu dil plaz. En quei senn giavischel el num dall'entira equipa bien migliurament a Ti Flavio!! 

Aschia ha ei num pil Sandro da siglir en per siu collega - quei denton mo per cuort temps... Suenter ch'el sclarescha cul tgau in bal liung directamein els peis ad in adversari setta quel e sco la casualitad vul (puspei encunter Tavanasa) tucca il goli il bal cul maun ordeifer la da sedisch. Malgrad ch'il Livio sesanfla aunc davos il goli retscheiva il davosnumnau la carta cotschna. Cun in tec dapli sentiment dils pézs dalla detta ("Fingerspitzengefühl" per quels che prefereschan la noziun tudestga) e risguardond il fatg ch'il CB ha gia stuiu midar in goli entras in accident sil plaz havess igl arbiter saviu trer cheu ina carta ord il sac dil pèz enstagl da quella ord il sac dil tappun... Aschia ei in dils giugadurs sfurzaus da midar mondura e surprender l'incumbensa dil davos um sil plaz. Per cletg sedeclara il Beat promts da far quei survetsch - e tgei survetsch ch'el vegn a far la davosa mes'ura dil giug!

Suenter ina fasa ruasseivla ord sia vesta ed ina schanza da gol entras il Dario vegn il Beat denton tier si'emprema parada, quei la 70avla minuta e suenter in conter dall'USDT. La scena dallas scenas suonda denton ina minuta pli tard: In attaccader en mondura blaua aulza il bal sur il goli che sesanfla lunsch ordeifer il gol; lez cuora perencunter plein perschuasiun anavos e spedescha il bal aunc avon la lingia sur il gol ora! Tgei scenas ch'ils aspectaturs a Pustget survegnan da veser oz; scenas ed emoziuns che giustificheschan la cumpra dalla carta da sesiun ni ils 5 fr. ch'ein da pagar sco aspectatur. Il giug ei denton aunc ditg buca finius! 

La 78avla minuta vegn Trun/Rabius tier in culp liber da vart seniastra, il qual igl Orlando metta cun in bi siet direcziun cantun liung vid la latta. Il bal che rebatta da leu puspei el giug (in schinumnau "rebound" - sch'ei dat insumma quei el ballapei) surpren il Clau, fa ina-duas fentas ella da sedisch e setta il bal ellas maschas pil 2:2! Sil pli tard uss explodeschan las emoziuns e tut ils giugadurs ein perschuadi ch'els vegnan aunc a volver il giug avon ch'igl arbiter po schular giu. Consequentamein dat il CB vinavon sil gol da Tavanasa e vegn cuort suenter tier in penalti. Il Tiz vegn lantschaus ord il miez e pauc pli tard resgiaus ella da sedisch dil defensur rutinau Ivo. Quella schanza lai il Livio buca prender e marchescha a moda ruasseivla e suverana il 3:2 pil CB! Suenter quei gol enconuschan las emoziuns negin cunfin; tuts ein perschuadi ch'ils treis puncts restan era oz a Pustget! La posa da giubilar dil Livio sto il trenader Mario denton aunc exercitar empau - priu il cass ch'el quenta inaga giubilar aschia en futur. Il giugadur da Tottenham Dele Alli ei segiramein promts da dar cheu in cuors en caussa... ;-P

Per salvar ils treis puncts drova ei las davosas minutas denton aunc in bien engaschi dall'entira equipa ed ina paraduna da nies oreifer goli Beat aunc la 92avla minuta! Silsuenter schula igl arbiter giu il giug ed il CB gudogna meritadamein il derbi encunter Tavanasa. Da menziunar ei ultra dils treis puncts aunc il comeback da nies attaccader Pietro Jacomet - ina novitad zun plascheivla! 

Priu sur igl entir giug ora ha il CB meritau la victoria encunter l'USDT, quei entras in surpli da schanzas creadas oravontut sur l'ala seniastra ora. Cheu ha igl Orlando mussau ina fetg buna prestaziun oz; denton era il capitani Salvatore ha dirigiu pulit il giug amiez il plaz e lantschau beinenqual bien pass sin nos attaccaders. Il giugadur dil giug ei denton senza dubi il Beat staus, il qual ha salvau ils treis puncts al CB entras sias paradas - "outstanding" schess igl Engles... Tgisà sch'el seglia era suenter las tscharvas en tala maniera sco quei ch'el ei siglius pils bals oz ni sch'el preferescha tuttina da prender la buis per sittar?! Tut en tut ha l'entira equipa denton mussau ina buna prestaziun (era quels ch'ein stai mo cuort sil plaz... ;-) ) e dumignau da volver il giug entras in oreifer engaschi ed in bien cumbat. Bien engraziament en quei connex era a nos aspectaturs pil sustegn e las emoziuns duront il giug - quei ei ballapei! 

La victoria lein nus dedicar a nies congiugadur Flavio, al qual nus giavischein cordialmein bien migliurament e ch'el tuorni beinspert puspei sil plaz da ballapei! HOPP FLAVIO & TRUN/RABIUS!! 

 

Informaziuns: 5’ 1:0 Orlando Monn, 14’ 1:1 US Danis-Tavanasa, 48’ 1:2 US Danis-Tavanasa (P), 78’ 2:2 Clau Berther, 83' 3:2 Livio Janka (P)

Formaziun: Flavio Schuoler (54’ Sandro Tomaschett) – Fabian Cajacob, Damian Schmed, Livio Janka, Ramon Orlik – Denis Monn (46’ Dario Schuoler, 88' Christof Derungs), Beat Cadruvi, Salvatore Staglianó (C) (90’ Denis Monn), Orlando Monn – Patrizio Decurtins (91’ Pietro Jacomet), Daniel Monn (61’ Clau Berther)

Reservas: Sandro Tomaschett, Mattias Candinas, Dario Schuoler, Christof Derungs, Pierin Monn, Pietro Jacomet, Clau Berther

Absents: Ivo Albin, Remo Alig, Sandro Orlik, Carlo Gautschi

 

bènaltè! - il magazin dil cb

   
1. ediziun - 2016   2. ediziun - 2017   3. ediziun - 2018