contact

CB Trun/Rabius

Caum postal 153

7166 Trun

+41 78 789 74 36

secretari@cb-trun-rabius.ch 

 

© 2018 by cb-trun-rabius.ch

la direcziun constat – dus giugs, sis puncts

Pigl emprem giug da casa dalla nova sesiun ha l’emprema equipa dil CB retschiert l’equipa surmirana CB Surses. Suenter l’aulta victoria encunter Laax han ils fans spitgau la confirmaziun a Pustget. 18 (!!) giugadurs ein per quei giug stai a disposiziun ed il trenader Mario Solèr ha procurau per ina pintga surpresa ella formaziun d’entschatta.

Aschia ha ei giu num pil Clau, l’emprema ga suenter fetg liung temps, d’entscheiver il giug ensemen cun il Tiz davontier. Sia posiziun usitada ei vegnida surprida dil Denis ed aschia han ils dus frars Monn figurau sco “Flügelzange”. Il giug ei igl emprem quart d’ura fetg ulivs e negina equipa vegn da crear in’acziun propi prigulusa. Ei croda denton en egl che treis giugadurs dil CB Surses survegnan in bal ord cuorta distanza el venter ni en fatscha e paucas gadas han ins a Pustget viu tontas gadas in «Schiriball». Seigi sco ei vegli; la 23avla minuta han ils giugadurs dil caucasa l’emprema prima acziun ed il topscorer Tiz marchescha ord quella gest igl 1:0 – quei suenter in bellezia pass da Clau. Uss ha l’equipa dalla Cadi ferdau la lunta. Enteifer las proximas treis minutas ha il Tiz duas schanzas da marcar siu secund gol - ed era igl Olli vegni aunc tier ina bun'acziun da gol. Ei stat denton tier in gol. La 34avla minuta vegn lu era Surses tier l’emprema schanza da gol. Il bal sgola denton sper la crusch sperasvi ed aschia sto il goli Flavio buc intervegnir. Il CB dominescha denton vinavon ed igl ei il niev attacader Clau che vegn suenter in pass dad Olli da alzar il bal sur in defensur da Surses ora e marcar cun in volley il 2:0. Cun quei resultat va ei ella pausa.

Cunquei che l’emprema ha momentan dus golis en buna cundiziun astga il Flavio gia far serasontga suenter 45 minutas ed il Sandro surpren per la secunda mesadad. Suenter pausa vegn Surses meglier el giug, quei che ha era da far cun il caucasa. Il CB vegn buc propi da cuntinuar cun las super cumbinaziuns dall’emprema mesadad e suenter 50 minutas ha l’emprema cletg che l’equipa surmirana marchescha buc in gol. In siet ord 25 meters gartegia numnadamein la latta. Mo diesch minutas pli tard croda il gol per Surses lu denton tuttina. Ils hosps han en quella fasa dil giug dapli acziuns ed aschia ein ils fans da Trun/Rabius bi leds ch'il 3:1 croda la 69avla minuta. Suenter in culp liber da Dani Monn deviescha in defensur dil CB Surses il bal egl agen gol. Quei gol pren naven il slontsch all’equipa surmirana. Cunquei ch'il trenader Mario fa suenter enqual ga diever dils biars giugadurs sil baun vegn Surses era buc pli en in endretg “flow”. Aschia vegnan era il Christof ed il Dario tier lur debuts per l’emprema equipa. Da menziunar vala ei aunc ina biala parada da Sandro la 89avla minuta, schiglioc ei denton pauc capitau il davos quart d’ura dil giug.

Suenter dus giugs salida il CB pia digl emprem plaz dalla tabella cun sis puncts, diesch gols e mo dus cuntergols. Perschuadiu han ils giugadurs da Trun/Rabius cunzun ell’emprema mesadad la dumengia vargada encunter Surses. Bialas cumbinaziuns cun tempo anavon, segirtad vid il bal ed in bien secuntener defensiv ei stau da remarcar tier l’entira equipa. Denton las empremas minutas suenter pausa ein ni a Laax egl emprem giug, ni encunter Surses stadas da ludar. Per gudignar il proxim giug, il derbi a casa encunter Tavanasa vala ei aunc da migliurar quei – lu san ins denton cun plascher mirar anavon sin dumengia proxima.

 

Informaziuns: 23’ 1:0 Patrizio Decurtins, 35’ 2:0 Clau Berther, 61’ 2:1 CB Surses, 69’ 3:1 autogol CB Surses

Cartas melnas: 23’ Denis Monn, 51’ Damian Schmed

Formaziun: Flavio Schuoler (46’ Sandro Tomaschett) – Fabian Cajacob (70’ Ramon Orlik), Damian Schmed, Livio Janka, Sandro Orlik (85’ Christoph Derungs) – Denis Monn (70’ Mattias Candinas), Beat Cadruvi (90’ Pierin Monn), Salvatore Staglianó (C) (81’ Denis Monn), Orlando Monn (85’ Carlo Gautschi) – Patrizio Decurtins (85’ Dario Schuoler), Clau Berther (61’ Daniel Monn)

Reservas: Sandro Tomaschett, Daniel Monn, Ramon Orlik, Mattias Candinas, Carlo Gautschi, Dario Schuoler, Christoph Derungs, Pierin Monn

Absents: Ivo Albin, Remo Alig, Pietro Jacomet

 

 

bènaltè! - il magazin dil cb

   
1. ediziun - 2016   2. ediziun - 2017   3. ediziun - 2018