contact

CB Trun/Rabius

Caum postal 153

7166 Trun

+41 78 789 74 36

secretari@cb-trun-rabius.ch 

 

© 2018 by cb-trun-rabius.ch

avon pausa dau – suenter runcau

Finalmein eis ei puspei stau schi lunsch: Punct las sis dat igl arbiter liber il niev campiunadi. L’emprema ei serendida a Laax per dar encunter la squadra promovida dalla tschunavla ligia. Las rollas eran avon il giug pia claras: Sco secund dil campiunadi passau fuss buca meins che treis puncts stau ina gronda trumpada pil CB Trun/Rabius.

Ils trenaders Mario e Carlo han per igl emprem giug dalla sesiun buca midau bia vid ils emprems endischs en cumparegliaziun cun l’equipa da tschep dil campiunadi vargau. Sulettamein il Clau ei muort motivs da scolaziun vegnius remplazzaus da Denis. Tuttina drovan ils giugadurs biebein in quart d’ura per vegnir endretg el giug. La 16avla minuta ein ils giugadurs da Laax lu tuts curri si sur la lingia da miez ed aschia ei il Tiz buca egl offside, schegie ch'el ei il giugadur il pli datier dil goli da Laax. Il Livio ha sut squetsch cheu in’idea fenomenala: Aschia lantschescha el nies caposettagols cun in bal liung e cun sia fuorma momentana ei quei per Patrizio ina pintga sfida da marcar igl 1:0 per ils hosps. Il CB dominescha uss il giug. Il bal circulescha per part bein en las retschas e suenter ina bial’acziun dil Salva o sill’ala vegn il Dani tier in siet. Il goli da Laax vegn mo da schar rebatter e leu spetga naturalmein il Tiz. Duront che il scrivarapports ei vid notar il 2:0 stat ei gia 3:0. Suenter in sbagliun ella defensiun da Laax marchescha il Tiz gia siu tierz gol persunal. E la 43avla vegn il giugadur cun la numera 11 schizun da marcar il 4:0, quei suenter ina corna da Orlando ch'il Sandro ha menau vi sil Patrizio. La buna prestaziun avon pausa vegn rundada giu da Dani cun il 5:0 suenter in bi pass ella gassa ord il miez.

Ils aspectaturs da Trun/Rabius ein cuntents culla prestaziun da lur equipa las empremas 45 minutas. Ei para era ch'ils giugadurs sez ein cuntents cun quei resultat – forsa memia cuntents. Suenter pausa fan ils hosps perquei mo pli il necessari. Bialas cumbinaziuns ed acziuns sil gol da Laax ein scartas e la gronda schanza digl emprem quart d’ura suenter pausa ha il caucasa. Aschia ei il gol tier il 5:1 la 63avla da Laax buc engulaus, quei suenter ina durmida collectiva dall’emprema. Pér la 82avla minuta vegn il CB puspei tier ina acziun remarcabla: Suenter in bellezia pass dil Dani Monn ei il Denis persuls avon il goli da Laax e marchescha cun in siet el cantun liung il 6:1. E cuort avon la finiziun dil giug vegn era aunc il Beat da stuschar il bal ella reit suenter ina flanchetta da Damian.

Il resultat 7:1 implichescha atgnamein in giug sensaziunal dil CB – quei fuss denton brav surfatg. Ell’emprema mesadad han ins segiramein viu bialas acziuns ed in engaschi plascheivel. Suenter pausa ha denton buca pli bia funcziunau. Per ch'igl ei era pusseivel da far 3 puncts ils proxims giugs drova ei segiramein ina megliera prestaziun, cunquei che ils adversaris vegnan segiramein buca pli fleivels. L’autra jamna retscheiva il CB numnadamein l’equipa surmirana da Surses.

 

Informaziuns: 16’ 0:1 Patrizio Decurtins, 28’ 0:2Patrizio Decurtins, 30’ 0:3Patrizio Decurtins, 43’0:4Patrizio Decurtins, 45’ 0:5Daniel Monn, 63’ 1:5CB Laax, 82’ 1:6Denis Monn, 90’ 1:7Beat Cadruvi

Formaziun:Flavio Schuoler (52’ Sandro Tomaschett) – Fabian Cajacob, Damian Schmed, Livio Janka (75’ Beat Cadruvi), Sandro Orlik – Denis Monn (60’ Pierin Monn) Beat Cadruvi (46’ Carlo Gautschi), Salvatore Staglianó (C), Orlando Monn – Patrizio Decurtins, Daniel Monn

Reservas: Carlo Gautschi, Sandro Tomaschett, Pierin Monn

 

bènaltè! - il magazin dil cb

   
1. ediziun - 2016   2. ediziun - 2017   3. ediziun - 2018