contact

CB Trun/Rabius

Caum postal 153

7166 Trun

+41 78 789 74 36

secretari@cb-trun-rabius.ch 

 

© 2018 by cb-trun-rabius.ch

gols, comeback, emoziuns - ballapei!

Il venderdis sera ei il giug da Cup svizzer staus sil program pil CB Trun/Rabius. A Tavanasa (Mutteins) ha l'equipa da Mario Solèr e Carlo Tuor retschiert igl adversari da Gams per ina lutga, ord la quala il CB leva extrar sco victur. 

L'entschatta dil giug ei fetg intensiva e vegn menada a moda e maniera pulit "agressiva" dad omisduas equipas. Ils giugadurs cumbattan per mintga centimeter e fan pressiun silla defensiun. Oravontut Gams ei fetg decidiu e fa in "pressing" sco ord il cudisch: Sin camond d'in dils attaccaders attacheschan ses collegas sco murdi dil giavel ils defensurs da Trun/Rabius e lain negin plaz per cumbinar. Aschia vegn ei tscheu e leu malsegir avon gol; quei plinavon era tras pass pulit sperts e clevers sur e denter la defensiun dil CB ora. Sin quella moda e maniera croda suenter rodund 20 min consequentamein il 0:1. Cheu seigi denton era menziunau ch'igl attaccader da Gams steva cun silmeins in pei el schinumnau "fuorigioco" - era enconuschent als biars (excepiu agl arbiter) sut ils sinonims "optsits", "offside" ni era "Abseits". 

Pauc impressiunaus da quei gol dat il CB denton vinavon siu giug. Suenter ina situaziun da standard ell'atgna da sedisch vegn il Patrizio lantschaus cun in bal liung sur la defensiun ora. Cun in siet plein sentiment sieta il Patrizio il bal ord biebein 30m sur il goli ora e directamein viaden ellas maschas - 1:1! Tier tut las qualitads offensivas da Gams semuossan en quella situaziun, sco era pli tard aunc beinenqual ga, entginas miserias ella defensiun. Pauc pli tard reussescha igl 1:2 a Gams; era cheu para igl arbiter dad haver dapli simpatia cugl adversari ni dad ir tenor il principi "in dubio pro res" ("Im Zweifel für den Angeklagten"), cunquei ch'igl attaccader pren cun il bal cul maun avon che da sittar quel en gol. Il 3:1 suonda allura la 32avla minuta; suenter in bal liung regia empau confusiun ella defensiun dil CB ed aschia vegn Gams dad alzar il resultat sin dus gols differenza. 

Ils giugadurs en ner-alv muossan denton era suenter quei cuntergol puspei caracter e prendan ussa tec a tec enta maun il giug. Cun bialas cumbinaziuns vegnan ils giugadurs dallas alas lantschai in pèr ga in suenter l'auter, quei che procura per empau tensiun e malsegirtad ella defensiun dil hosp. Deplorablamein munchentan ils attaccaders ed ulteriurs giugadurs da nezegiar las bunas caschuns; aschia va la tgaua dil Tiz cnap sper il gol ora, il siet dil Clau cnap sur il gol ora ed in ulteriur siet munchenta era mo per pauc la finamira. Aschia resta ei tier il resultat dad 1:3 da pausa. 

Da pausa regordan ils trenaders vid il giug da Cup grischun dalla dumengia vargada; era leu eis ei reussiu cun ina fetg buna prestaziun suenter pausa da menar il giug pigl agen avantatg. Tenor il motto "Impossible is nothing" - dil reminent era il motto da nies sponsur da monduras ;-) - van ils giugadurs pia ella secunda mesadad. Gams fa denton vinavon il pressing usitau dall'emprema mesadad e vegn cuort suenter pausa allura dad alzar il resultat sin 1:4; il gol vegn sittaus cul tgau suenter in culp liber dalla vart dretga. La maioritad para suenter quei gol buca pli da crer el CB - aschia era Gams. 

Cun in bien spért d'equipa, concentraziun ed in cumbat da tuts giugadurs da davostier tochen davontier reussescha ei perencunter al CB da metter il hosp avon plirs "problems". La 72avla minuta croda la finfinala il 2:4 suenter ina corna; cheu decida igl arbiter per midar giu inaga "per" Trun/Rabius. Il bal haveva surpassau per pauc la lingia - denton "per pauc" tonscha gie per esser gol! Las minutas suandontas fan ils caus-casa vinavon pressiun, ston denton il medem mument dar quitau da buca survegnir in ulteriur cuntergol. Entras ina acziun sperta ed in bi pass ella gassa vegn il Patrizio allura lantschaus - ed el marchescha il 3:4. Va tuttina aunc dapli en quei giug? Enconuschentamein miera la speronza gie pér sco davosa ... E pilver: La 89avla minuta suonda in'explosiun dallas emoziuns sil plaz! Il CB dat vinavon plein entusiassem e perschuasiun e vegn puspei da lantschar cun in bi pass nies attaccader il Tiz; lez lai puspei negina schanza al goli e metta il bal cun in siet sc'in streh ella reit - 4:4! Avon ina mes'ura havess pli probabel negin ughegiau da patertgar vid in tal spitachel - denton quel ei daventaus realitad! La fasa finala dil giug regular havess il Salvatore schizun aunc saviu marcar il 5:4. Denton resta ei tier il 4:4, il qual munta en giugs da cup prolungaziun. 

Plein motivaziun e perschuasiun da gudignar quei giug entscheivan ils giugadurs dil CB quella prolungaziun. Igl ei puspei in schinumnau "offener Schlagabtausch" denter las duas equipas; sco quei ch'igl ei gia stau il cass sur grondas parts dil giug ora. Suenter entginas minutas vegn il CB denton disavantagiaus entras in'ulteriura decisiun fallida digl arbiter: Igl attaccader da Gams che parta ord il "fuorigioco" (ils sinonims pon aunc esser enconuschents a vus) stat la finfinala persuls avon il goli e marca il 4:5. Decidi da tuttina aunc volver quei giug dat Trun/Rabius vinavon, denton vegnan els buca pli dad egalisar. Cuntrari reussescha a Gams aunc il 4:6 cuort avon la fin dalla prolungaziun. 

Suenter il giug tilan ils trenaders in facit positiv ord il giug - silmeins quei che pertucca la prestaziun da quels ch'ein stai sil plaz. Pilver; ins astga menziunar che l'equipa ha mussau ina oreifra prestaziun e fetg bia caracter dad egalisar il resultat suenter treis gols disavantatg. Cun in tec dapli cletg ed ina ni l'autra decisiun en favur dil CB fuss ei segiramein stau pusseivel da bandunar il plaz sco victurs. Ton per l'equipa, sco era pils trenaders ei il giug da Cup svizzer perencunter staus in fetg bien trenament che ha mussau tgei che l'equipa ei el stan da prestar. En quei senn vala ei da vinavon star vidlunder e da mantener la mentalitad da buca dar si, mobein da cumbatter tochen la fin dil giug. Aschia fa ei plascher da dar ballapei ed aschia vegn era il success baul ni tard.

In cordial engraziament admettel el num dall'equipa a tut ils aspectaturs che han susteniu nus en quei giug "da casa" a Mutteins. Liunguriala han els segiramein buca giu quella sera ;-)

 

Informaziuns: 17’ 0:1 Gams, 19' 1:1 Patrizio Decurtins, 20’ 1:2 Gams, 32’ 1:3 Gams, 65’ 1:4 Gams, 72' 2:4 Patrizio Decurtins, 75' 3:4 Patrizio Decurtins, 89' 4:4 Patrizio Decurtins, 101' 4:5 Gams, 117' 4:6 Gams

Formaziun: Sandro Tomaschett – Fabian Cajacob, Damian Schmed, Livio Janka, Sandro Orlik (84' Pierin Monn) – Daniel Monn, Beat Cadruvi, Denis Monn (70' Carlo Gautschi), Clau Berther - Salvatore Staglianó (C), Patrizio Decurtins

Reservas: Pierin Monn, Mattias Candinas, Carlo Gautschi, Remo Alig

 

bènaltè! - il magazin dil cb

   
1. ediziun - 2016   2. ediziun - 2017   3. ediziun - 2018