contact

CB Trun/Rabius

Caum postal 153

7166 Trun

+41 78 789 74 36

secretari@cb-trun-rabius.ch 

 

© 2018 by cb-trun-rabius.ch

cura ch'il co-trenader sto dar siu comeback...

La fin dalla sesiun da primavera s'avischina cun gronds pass. "Tgei cletg" pon ils trenaders dall'emprema equipa dil CB tertgar... Quei buca muort munconza da motivaziun per nies bellezia sport da ballapei - mobein muort munconza da giugadurs. Suenter ina pluna blessuras ed ulteriuras absenzas nunplanisadas da buca meins che 8 giugadurs han ils 11 restonts ed il co-trenader (!!!) stuiu procurar per treis puncts encunter Domat. 

Da bialaura e temperaturas pulit cauldas dat igl arbiter liber il giug a Pustget. Ils giugadurs dil CB ein gia naven dall'entschatta premurai e lantscheschan enqual bun'acziun sin gol da Domat. La quarta minuta metta il Patrizio il bal per l'emprema ga vid la latta; quei suenter ina corna. Entginas minutas pli tard sesanfla il medem attaccader puspei persuls avon il goli, damogna denton buca il bal sper lez vi. Malgrad che Trun/Rabius vegn adina puspei tier schanzas, gartegia ei era als hosps cun far spert da vegnir malsegirs tscheu e leu avon il gol dil cau-casa. Ils siets dils da Domat vegnan la defensiun ed il goli denton da sclarir - ils auters van sur il gol ora. Suenter 20 minutas san ins tschintschar d'in schinumnau "offener Schlagabtausch": Omisduas equipas vegnan el tact da duas-treis minutas tier schanzas. La 34avla minuta eis ei allura la finala aschi lunsch ch'ils aspectaturs a Pustget astgan giubilar. Suenter ina liunga flanca dall'ala seniastra entras il Dani Monn vegn il Patrizio da menar il bal cul tgau ellas maschas - 1:0 per Trun/Rabius! Avon pausa sieta il Dani Monn allura sez aunc duas ga sin gol; denton parescha il goli omisdus siets. Era Domat vegn malsegirs avon il gol - quei oravontut suenter malprecauziuns ella defensiun dil CB. Per cletg va denton tut ora bein, aschia ch'ei resta tochen tier la pausa tier igl 1:0. 

Suenter pausa vegnan puspei omisduas equipas tier schanzas. La 53avla minuta sto il Clau schizun sclarir sin lingia suenter ina corna. Als aspectaturs sepresentan ils 11 giugadurs sil plaz en uorden: il cumbat constat, denton ein las acziuns buc adina ponderadas a fin e per part empau malexactas. Sco denton menziunau sesprovan ils 11 giugadurs presents da tut temps da far lur pusseivel per la fin saver bandunar il plaz cun treis puncts. Per consequenza vegn il CB era vinavon tier bunas occasiuns da gol. La 57avla minutas va la tgaua dil Patrizio suenter ina flanca dil Dani cnap sur il gol ora. La 66avla minuta vegn il Dani Monn lantschaus d'in defensur da Domat; malgrad ch'el vegn da menar ora il goli, sieta el silsuenter sper il gol ora... La medema minuta lantschescha Domat in conter e vegn da sittar sin gol. Il Flavio ha denton neginas miserias e tegn la nulla per Trun/Rabius. Il 2:0 croda allura la minuta suandonta entras il Clau: La biala flanca dall'ala seniastra spedescha il Clau cul tgau el gol. Finalmein gartegia ei puspei da finir giu in'acziun cun success. Silsuenter predominescha hectica il giug a Pustget; giugadurs e per part era aspectaturs scomian plaids da pauc bunaveglia in cun l'auter. Era igl arbiter para dad haver piars la survesta per in cuort mument. Il davos quart d'ura restan las emoziuns agitadas e la tensiun aulta. 

Domat dat denton buca si ed entginas minutas pli tard gartegia ei schizun agl adversari da sittar il 2:1. In bal liung dall'ala seniastra siadora vegn daus viaden ella da sedisch sin in attaccader, il qual fa ina fenta e setta il bal denter dus-treis giugadurs ora el cantun liung. Quater minutas pli tard va in culp liber cnap sper la crusch ora. Quei havess muntau il 2:2... Pauc pli tard denton ha il Tiz puspei la schanza dad alzar il resultat sin 3:1. L'emprema acziun parescha il goli miraculusamein e meina il bal alla corna. La corna sezza smacca il Tiz allura suenter in caos ella da tschun cul tgau ellas maschas e marchescha aschia il 3:1. Ussa sentan ins il levgiament da tuts involvai. Las minutas suandontas vegnan il Dani Monn ed il Patrizio mintgamai aunc tier in'occasiun da gol. Il goli parescha denton bein ni ch'il bal va sperasvi. Il 4:1 croda la finfinala suenter ina corna: Il bal che vegn rebattius sieta il Salva (postaus bein avon la da sedisch) ord biebein 20 m cun tutta forza el cantun seniestar e lai puspei giubilar la gronda part da quels ch'ein serimnai a Pustget. 

Il punct culminont dil giug succeda perencunter la 87avla minuta dil giug: Il co-trenader ed ex-giugadur dall'emprema equipa Carlo Tuor vegn midaus en pil Patrizio Decurtins, il qual ha da batter cun "crampfs" - in comeback nunspitgau. Tgi havess tertgau ch'ins stoppi reactivar "Il da Vitg" havend entschiet la sesiun cun in cader da 20 giugadurs?! Seigi tgei che vegli - il Carlo ha dau in comeback sco s'auda e pachetau ora gia l'emprema minuta ch'el ei staus sil plaz ina "Blutgrätsche". Sinaquei ha el secapescha retschiert in fervent applaus dils aspectaturs. ;-) Gie schizun in gol ha il Carlo sittau; deplorablamein ha quel denton buca valiu. Aunc mai han ins viu a Pustget in siet dil Carlo Tuor ella crusch dil gol. Tgei historia che quei fuss stau... 

La finala schula igl arbiter allura giu il giug cul resultat da 4:1 pil cau-casa. Igl ei ina victoria meritada, cunquei ch'il CB ha mussau sur 90 minutas grond engaschi ed adina puspei creau schanzas da gol. Priu il cass che Trun/Rabius ha giu sulettamein ina reserva, san ins veramein esser cuntents cul resultat e culla prestaziun mussada. 

In grond engraziament admettein als aspectaturs che han duront questa sesiun adina puspei anflau la via a Pustget e che han susteniu nus duront nos giugs da casa - sco era en quels ordeifer. Ei fa plascher dad astgar dar ballapei avon ina tala culissa. Per quei aunc inaga: ENGRAZIEL FETG!

 

Informaziuns: 4:1 - 1:0 34' Patrizio Decurtins, 2:0 67' Clau Berther, 2:1 75' Domat, 3:1 81' Patrizio Decurtins, 4:1 87' Salvatore Staglianó

Formaziun: Flavio Schuoler – Sandro Orlik, Carlo Gautschi, Livio Janka, Fabian Cajacob – Orlando Monn, Salvatore Staglianó (C), Beat Cadruvi, Clau Berther –  Daniel Monn, Patrizio Decurtins (87’ Carlo Tuor)

Reservas: Carlo Tuor (!!!)

 

 

bènaltè! - il magazin dil cb

   
1. ediziun - 2016   2. ediziun - 2017   3. ediziun - 2018