contact

CB Trun/Rabius

Caum postal 153

7166 Trun

+41 78 789 74 36

secretari@cb-trun-rabius.ch 

 

© 2018 by cb-trun-rabius.ch

fatg ils pensums da casa

Gliendisdis Tschuncheismas ei il giug encunter l'equipa da Val S. Pieder staus sil program da 4. ligia. Suenter duas terradas consecutivas ha ei giu num seprender ensemen e recaltgar treis puncts. Quei pensum han ils giugadurs dall'emprema adempliu - buca dapli e buca dameins. 

L'entschatta dil giug ei empau stentusa per omisduas equipas; ei va vess da crear schanzas e tscheu e leu fan ins grev a sesez la veta cun pass e flancas malexacts. Malcapientschas domineschan il giug dil CB, denton era quel da Val S. Pieder. Aschia dat ei avon pausa paucas occasiuns da gol che meritassen da vegnir numnadas en quest rapport. Quei fatg ei forsa era d'attribuir in cert ton alla formaziun dall'equipa da vart da Trun/Rabius: Cun ina pluna blessuras han ils trenaders Mario e Carlo stuiu metter si l'equipa culs giugadurs ch'ein avon maun. Da menziunar specialmein ei il debut da Ramon Orlik e Denis Monn denter ils emprems endisch giugadurs. Gia ils davos giugs a Schluein e Bogn Ragaz han els fatg part dil cader ed han astgau ferdar l'emprema ga l'aria dalla 4. ligia. En quels giugs han els mussau ch'els han potenzial e ch'igl ei da quintar cun els il futur! Era oz muossan ils dus giuvens ina prestaziun fetg solida en lur posiziuns. 

La 39avla minuta da giug pren il Clau il bal e cuora dall'ala dretga giuadora, tila viers miez e survescha il bal al Salvatore, il qual setta il bal bein ponderau el cantun liung ad ault. Quei siet lai al goli da Val negina schanza e munta aschia igl 1:0 per Trun/Rabius. Igl ei stau ina dira via tochen tier quei gol; denton vegn svens era la pazienzia remunerada. Davostier han ins tochen dacheu schau tier ton sco nuot e davontier han ins nezegiau la schanza cura ch'ella ei stada cheu. Nuot spectacular - denton il principal ei el ballapei la finfinala il resultat. Quel constat - silmeins da pausa. 

Da pausa vegnan il Kevin ed il Beat el giug. Els portan empau slontsch el giug, denton domineschan aunc adina malexactadads il giug dil CB. Aschia van savens bals "sempels" a piarder. Als giugadurs san ins perencunter buca reproschar ina munconza d'engaschi e d'ambiziun; anzi vesan ins vid mintgin ch'el ei premuraus da far siu meglier pusseivel per l'equipa. Deplorablamein gartegian ils bals denton buc adina la finamira ch'ins ha priu en mira. 

Legreivlamein ston ils aspectaturs bua spitgar ditg sil 2:0 quietond: La 51avla minuta spedescha in defensur il bal plitost nunvuliu (crei jeu silmeins) viers il miez. Leu semetta il Patrizio atras encunter il defensur e sa la finfinala stuschar il bal el cantun liung dil gol. Silsuenter reussescha ei allura pli e pli fetg al CB da prender il giug enta maun. Suenter ina flanca digl Orlando vess il Tiz saviu far il 3:0 cun ina biala tgaua. Quella vegn denton parada a moda miraculusa dil goli. Cheu in pèr ch'ein dil meini ch'el sa buca co el ha fatg quei... Treis minutas pli tard, pia la 69avla minuta stat il Tiz puspei persuls avon gol. La flanca dil Clau vegn el denton mo da smaccar els mauns al goli. Aschia resta ei pil mument tiel 2:0... 

La 76avla minuta vegn allura in ulteriur giugadur tier siu debut per l'emprema equipa: il Mirco Pfister remplazza il Clau s. Era el fa siu pensum en uorden ed ei fetg premuraus sill'ala dretga. 

Suenter in'acziun malgartegiada ed in bal piars fa Val spert e vegn cun plirs giugadurs encunter la defensiun da Trun/Rabius. Il miez ei tut libers ed aschia eisi grev co secuntener pils defensurs; la finfinala vegn il giugadur da Val da lantschar in agen attaccader, il qual vegn da cuorer persuls viers il Flavio. Cun in bien reflex spendra el per cletg, aschia ch'el mantegn sia vesta alva. Ils siets da Clau e Salvatore van silsuenter tuts sperasvi ed aschia resta ei pia tiel 2:0. Igl ei in 2:0 che vala buca dapli e buca dameins che treis puncts, gest sco la gala avon duas jamnas encunter Vaz-sut. Suenter duas terradas e sin fundament dalla situaziun da blessuras actuala san ins esser cuntents culla victoria. Adina san ins buca spitgar in spitachel dils giugadurs. Oz han els denton mussau ch'els san tener la nulla e gudignar in giug era cun haver pazienzia. 

 

Informaziuns: 2:0 - 1:0 39' Salvatore Staglianó, 2:0 51' Patrizio Decurtins

Formaziun: Flavio Schuoler – Ramon Orlik, Damian Schmed, Livio Janka, Orlando Monn (79' Denis Monn) – Sandro Orlik, Carlo Gautschi (45’ Beat Cadruvi), Denis Monn (45' Kevin Albin), Clau Berther (76’ Mirco Pfister) – Salvatore Staglianó (C) (81' Carlo Gautschi), Patrizio Decurtins (82’ Clau Berther)

Reservas: Beat Cadruvi, Kevin Albin, Mirco Pfister

 

 

bènaltè! - il magazin dil cb

   
1. ediziun - 2016   2. ediziun - 2017   3. ediziun - 2018